ئا: رەوەست نەوزاد
قەڵای هەولێر خاوەن چەند دەرگایەكی سەرەكیی بووە كە مێژوویان بۆ سەدان ساڵ لەمەوبەر دەگەڕێتەوە، یەكێك لەو دەرگایانە دەرگای (ئەحمەدییە) یە، كە دەكەوێتە بەشی باكووری خۆرئاوای قەڵاكە، تەمەنی ئەو ناوە بۆ نزیكەی سەدەیەك لەمەوبەر دەگەڕێتەوە، هەرچەندە پێشتر ناوی دەرگاكە(باب عەمكا) بووە.
كەنعان موفتی شارەزا لەمێژوو و شوێنەواری كۆنی هەولێر بە كوردستانی نوێی راگەیاند: ئەو دەرگایە لە كۆندا هەبووە و پێی وتراوە(باب عەمكا)، بەهۆی ئەوەوە ناوی لێنراوە(باب عەمکا) كە بەرامبەر شارۆچكەی عەنكاوەی كریستیان نشین بووە، كە ئەوكات عەنكاوە ناوی (عەمكا) بووە دەرگاكەش ناوەكەی بۆتە(باب عەمكا)، ئێستاش لەسەر شێوازی خۆی نۆژەنكراوەتەوە.
وتیشی: ئەحمەد عوسمان ئەبوبەكر كە بەر لەسەدەیەك بۆتە یەكەم موتەسەریف واتا(پارێزگار)ی هەولێر لە ساڵی 1923 ماڵی لە قەڵا بووە، بەیانیان لەكاتی هاتنە خوارەوەی لە قەڵای هەولێر بەو دەرگایەدا هاتوچۆی كردووە، بۆیە ناوەكە بەناوی ئەو كەسایەتییەوە لێنراوە و بووە بە دەرگای(ئەحمەدیە).
باسی لەوەشكرد: رێڕەوی خوارەوەی قەڵاكە هەمانشێوەی جارانی خۆیەتی، بەڵام من بیرم دێت لە ساڵی 1959دا كاتێك شەقامی سەرەكی ناو قەڵایان دروستكرد، رێڕەوەی دەرگای ئەحمەدیشیان قیرتاو كرد، دیوارەكەشیان تا خوارەوە بە بەرد دروستكرد، بۆئەوەی خۆڵ و بەردی قەڵاكە نەكەوێتە خوارەوەی شارەكە، كە پێشتر شەقامی رێرەوەكەی دەرگای ئەحمەدیەش خۆڵ بووە.
بەپێی زانیارییە نووسراوەكان بێت، ئەو دەرگایەی قەڵای هەولێر، مێژووەكەی بۆ نزیكەی 800 ساڵ لەمەوبەر دەگەڕێتەوە، بەڵام لەوانەیە مێژووەكەی بۆ سەردەمێكی كۆنتریش بگەڕێتەوە، بەتایبەتی بەر لەو مێژووە، قەڵای هەولێر لە سەردەمی دەسەڵاتی ئاشوورییەكاندا، ئاوەدانیی. تێدابووە كە بەر لەچەند سەدەیەك لە زایینی بووە.
