مەردم كنارنشین ئەڵوەن دایمە لە گشت بوونەو وەختێگ پەیام و وتەی تایبەت خوەیان دیرن و هەڵویست ڕوون و ئاشكرای خوەیان وەبی شەرم و وەزوڵاڵی و وەدەنگ بەرزەو ئیوشنەی، وەك ئەی ساڵ كە نەوروز جیاوازی خوەی بی وەگەرد ساڵان ترەك، ئەڵوەنەیل پەیامێگ دانە گلایەگ، نەخێرێگ كە قەت لەبیرەو ناچد، نەخێرێگ ئەرا فرامووش نەكردن فەرهەنگ و داب و نەریت هەزاران ساڵەمان، نەخێرێگ ئەرا چەوساندن، نەخێرێگ ئەرا ئەوەی زوڵم و زوور وەژیر ناو و هەر پاساوێگ بووگ قبوڵ نێكەین، ئیمەی خانەقینی وەك گشت كوردێك باوەڕدارترین مللەتین لەڕووی جیهان و پیرووزەیەیلمان لە نەژاد و ئایینی لامانەو فرەگرنگەو پابەنین وە تقوسات خوەمانەو. یەكێك لەو پیرووزەیەیلمان ئاگر نەوڕوزەو هەر ساڵە لە ئیوارەی دواڕووژ ساڵ كوردی ئەی گڕ ها دەروونمانەو ڕوشنی كەین و چینە پیشواز ساڵ نووی خوەمان و وەچەژن و خوەشی و هەڵپەرگەش وە تشك و بلیسەی ئاگر ژیانمان گەرمی كەیمن، وەلی ئیساڵ وەڕێكەوت شەو ئەوڵوەهار لەمانگ پیرووز ڕەمەزان و ڕوژ بریندار بیون مەولا عەلی كەفتی، دیارە ئەو مەولاو ئیمام و خەلیفەو پیرتەریقەت و تەجەلی ڕووحانیەتی تایبەتی خوەی هەسی لەلای گشت دانشتوان شارەگە، وەمەزهب و بیڕوباوەریەلە جیاجیاگانی. لەوەریەش پیرو جایەل، كووڕ و دویتەیل ئی شارەش، وەپەڕی حورمەت و رێزگرتن ئەی بوونە ماتمەگە، بڕیاریاندا وەبی هەڵپەرگەو شادیگیران، ئاگر هەزاران ساڵەی وەجیما لەباپیریەلیمان ڕوشن بكەن و خڕ لەدەوری تەنیا سرود ئەی رەقیب بیوشن.
دیارە خانەقینەیل هەمیشە لەدیرزەمانەو وەیە ناسریانە فرەكلتور و پڕ لە جیاوازی ئایینی و كۆمەڵایەتی بینەو هەروا پێگهاتەیەلەی پەیوەندی پتەویان وەلیەكەو بیەو هیچوەختەیگ كەلین و ناڕاحەتی نەكەفیەسە نیوانیان و وەتایبەت نمونەی فرەی قەومیاتی و ژنخوازین لەنیوان ئی پێگهاتەیەلە بوونی بیە، وەئیسەش ئەی قەومایەتیە وەردەوامە.
ئەرایە ئمساڵ نەوروز، كورد شارەگە وەوپەڕی ڕیزگرتن لەوەر یاد ماتەم مەولا عەلی، بڕیاردان تەنیا ئاگر نەوڕوز لە فلكەی مامۆستا عەزیز پشتیوان ڕوشن بكەن و ئیوارەی دوای بانگ، ئاگر ڕوشنایی و تێریكی كوش، ڕوشن كریاو وەسرود ئەی رەقیب چینە پیشوازی ساڵ نوو خوەیان و خەریكی بمارگ وتن وەیەك بین، ولێ لە ناوكاو شوماریگ كەس ناموو و بیگانە وەكلتور و فەرهنگ مەردمەیەل شارەگەمان وەتونی و وەزوورو وەمەرام سڕین و خامووشكردن ئاگر نەوڕوز پیرووز، كەفتنە ناو مەردمەو وەلێ ورەی پوڵایین و چەونەترسی و ئازایەتی جوانجایەلەلمان، كە وەدەنگ بەرز و زوڵاڵ وەسرود ئەی رەقیب و دروشم و هوتاف «كوردە ئەی خانەقینە دوشمن بمرد لەقینە»، پاشەكشە وەپیان كردن و دەرس و وانەیەگ دانەپیان، كە تابمینن وەهویریان نەچید، یە خانەقینەو كە هیچ كەس و لایەن و حوكمەتیگ لەمیژوو نەتوانست كوردبیوون ئەی مللەتە بسڕدەو ئیوەو كەسگەلیگ ترەگ ناتوانن ئەوە بكەن. نە لەئیسەو نە لەئایندەش و یەش دوپاتكردنەو عەشق و سووزیان، ئەرا باوەڕەیل ئایینی و نەژادی، ڕاسەقینەس و بازرگانی وەپی ناكەن و ئامادەن ڕێگەی شەهیدەیلیان بەردەوامی وەپیبدەن و ناهیڵن ناحەزو دوژمن، سیاسەت چەفت و قین خوەی بسەپندە سەریان و ئەی شارە كوردی بیەو كوردی میند.
