ئا: هێدی گەڵاڵی
ئەگەرچی لە رابردوودا بڕیاری دروستكردنی نەخۆشخانەیەك بۆ قەزای مەخموور دەرچوو، بەڵام بەهۆكاری جیاواز ئەو نەخۆشخانەیە دروست نەكرا، بۆیە تاكو ئێستا تەنیا دوو بنكەی تەندروستیی تێدایە، ئەمەش لەكاتێكدا مەخموور سنوورێكی فراوانی هەیە و چەندین و ناحیە و گوندی بەسەرەوەیە، ناتوانرێت وەكو پێویست خزمەتی هاووڵاتیان بكرێت.
لەوبارەیەوە سەردار مامەند وەك كارمەندێكی كارگێڕی بە كوردستانی نوێی راگەیاند: ساڵی 2016 د. مەجید حەمەد ئەمین، كە ئەوكات وەزیری تەندروستیی حكومەتی فیدڕاڵ بوو(ئێستا لێپرسراوی مەڵبەندی هەولێری یەكێتیی نیشتیمانیی كوردستانە)، بڕیاریدا نەخۆشخانەیەكی 100 قەرەوێڵەیی لە قەزاكەمان دروستبكرێت، بەڵام بەهۆی تەرخان نەكردنی زەوی لەلایەن ئیدارەی ئەم سنورەوە، نەتوانرا ئەو نەخۆشخانەیە دروست بكرێت.
وتیشی: هەر بەهۆی تەرخان نەكردن زەوی، پڕۆژەی دروستكردنی ئەو نەخۆشخانەیە لەمەخموورەوە بۆ ناحیەی گەیارە گواسترایەوە.
ئەو كارمەندە نەیشاردەوە كە هۆكاری بنەڕەتی دروستنەكردنی نەخۆشخانە 100 قەرەوێڵەییەكە بەهۆی ململانێی سیاسییەوە بووە و دواجار لەمپەر لەبەردەم جێبەجێكردنی ئەو پڕۆژەیە دروستكرا.
لەلایەن خۆیەوە شوان جەلال كارمەندی تری كارگێڕی بنكەی تەندروستی مەخموور پێی راگەیاندین: لە قەزای مەخموور دوو بنكەی تەندروستی هەیە، بنكەی تەندروستیی مەخموور كە سەر بە ئیدارەی تەندروستیی پارێزگای نەینەوایە و بنكەی تەندروستیی قەرەچووخ سەر بە ئیدارەی تەندروستیی پارێزگای هەولێرە.
ئاماژەی بەوەشكرد: جگە لە نەبوونی نەخۆشخانە، بەهۆی كێشەی كۆنی بینای بنكەی تەندروستی كە بۆ ساڵی 1957 دەگەڕێتەوە، هەروەها بەهۆی نەبوونی ئێشكگری و كەمی پزیشكی پسپۆرەوە، نەتوانراوە وەكو پێویست خزمەت بە هاووڵاتیان بكرێت، ئەمەش لەكاتێكدا رۆژانە 100 تا 150 نەخۆش بەمەبەستی چارەسەر رووی تێدەكەن.
بەهۆی ململانێی سیاسی و تەرخان نەكردنی زەوی، دروستكردنی نەخۆشخانەی مەخموور بۆ ناحیەی گەیارە گواسترایەوە.
