فەرسەت عبدالرحمن
بەری سالەکێ بوو دەما ب كارەكێ گرنگ چوویمە باژێرێ بەغدا و ماوێ چوار شەڤان ل ئوتێلا (بابلیون روتانا) مام. ل ڤێ ئوتێلێ مەلەڤانگەهەکا گەلەک خۆش هەبوو، ناڤا وێ هەمی سیرامیک بوو و ئاڤەکا زور پاقژ. ئەڤ مەلەڤانگەهە ژلایێ کچەکا زور جوانڤە دهاتە چاڤدێریكرن و ئەرکێ وێ پاراستنا سەلامەتیا مەلەڤانکەران بوو. ل دەرڤەی مەلەڤانگەهێ ئامیرێن چێکرنا شەربەتێن سروشتی هەبوون و دگەل هەمی جورێن خوارنێن سڤک و شریناهیێن پێچایی. مەلەڤانگەهـ زور یا پاقژ و بژین بوو، تا نوکەژی گەلەك جاران دەمێ چاڤێن خو دنقینم، بیریا ویستگەهێن خۆش دگەل مەلەڤانیا دکەم. لێ هەر ئەز داخبارێ برکا گاخێرکی مە ئەوا رووبەرێ وێ نەدبوو (10) مەترێن چوارگوشە و ژ بەرێن نە تراشی هاتی چێکرن و د سەڤیکێن شڤکێن (دارێ بیێ)دا مە خو فێری مەلەڤانیا دکر. دیوارێن وێ د هنی بوون و ژ کەڤزێ و ترسا مە، ئەو بۆ ئاڤ کێم ببیت و دەرکەفتن دێ نەخوش بیت، یان ژی خودێ ژێ رازی (محمد یان عبدالله) بهێن و دێ کیڤە خلاس بین.
یان بیرهاتنێن گەرێن رویبارێ گوندی، ئەوێن مە ل چەمپیرکی چێدکرن، کو ل دەمێ مە خو د ئاڤێدا درێژکر، زکێ مە ب بنێ گەرێ دکەفت و ل بنێ دارێن بیا و سپیندارا و ل ڤەگەریانێ ژی ئەگەر دبن دارەکا فێقی را دەرباز بباین، هەر کتەکا وی فێقی یێ کەفتی بنێ دارێ، مە دخوار و بێ شویشتن و هندەک جارا ژی شوین دمێن بالندا ژی لێ هەبوون. چ سەرشوو ل وارا نەبوون، جلکێن خو لێ بگوهورین، لێ وەسان مە لبەرخو دکرن، هەتا د گەهشتینە مال و لبەر پێلێن هەوای د بەرمەدا زها دبوون... و سەرەرای ڤێ هەمیێ ئەم نەساخ ژی نەبوین.
من گەلەک گەشت نەکرینە. ئەو باژێرێن پێشکەفتی و جاددێن وانا دپاقژ و ئاڤاهیێن ژێهاتی و سەنتەرێن مەزن یێن بازرگانی، هەمی رەنگێن مروڤان و تشتان لێ هەبوون، ل وان دەما من وەسان هزردکر، ئەڤ گەشتە دێ بیتە ئێک ژ خۆشترین ویستگەهێن ژیانا من و دێ پێ دلخۆش مینم. لێ پشتی ڤەگەریایم بیردانکا خو، بتنێ بیرهاتنێن گوندێ من یێ بچویک بۆ من ڤەدگەریان. ئەو گوندێ ڤالە ژ ئاڤاهیێت مەزن و خوارنگەهێن ئیتالی و هندی. جادەیەک هەبوو ل دەستپێکێ ب بەروملێن گوندیا هاتبوو ڤەکرن و و رۆژێ سیارەک یان دوو تێدا دبورین و ئەو ژی ژ جورێن کەڤن و تژی سەر ئاخ و توز دبوو. چ کریکارێن پاقژکرنێ لێ نەبوون و نە جۆکێن ڤەرێژ یێن بن ئەرد و نە هیچ ئالاڤەکێ پێشکەفتی، لێ هەمی ئەو رۆژێن مە لێ بوراندین گەلەک دخۆش بوون. مە خۆشی ژ لێگەریانا ترشووکێ و بەلالێزا و پیڤۆکا ددیت یان ژی مێژتنا مێژمێژۆکا، حەتا هندەکا هندەک جارا خۆشی ژ تاما ئاخێ ددیت.
ئەگەر نوکەژی پسیارا خوشترین جهـ ل جیهانێ ژمن بکەن؟ دێ ئاماژێ ب گوندێ خو دەم دەمێ یێ بچویک، وی گوندێ ئاخفتن و سحبەت ل سەر ئەڤینداریێ شەرم و فهێتی بوون، چ ژڤان بۆ سەرەدانا نەبوون، لێ ل هەمی مالا سپێدە و مەغرەبا چا لێ دهاتە چێکرن و هەر کەسەکێ گوندی ل کیرێ ڤیابا، دا چایێ ل وێرێ ڤەخوت. ل وی دەمی کەسێ هەست ب نەڤیانا کەسێ نەدکر و هەمی ل زبارێت ئێک ئامادە دبوون و من حەژ هەمیان دکر.
هەر مالەکێ ل وی دەمی تایبەتمەندیێن خو نەبوون لێ خۆشی یا هەمیان و نەخۆشیان ژی هەمی د بەشدار بوون. ئامیرێن فێنک کرنا کەش هەوای نەبوون و ئەلەکتریک بخو ژی نەبوو، لێ کەسێ گازندە ژ گەرم و سەرمایا نەدکر، و بایێ خودێ ددا و ستێر هەیڤ بەس بوون دل پێ ئارام ببان، ل سپێدەهیا هەلاتنا روژێ ئاگەهیا هەمی کەسان بوو و هندەک ژی بەری هەلاتنا رۆژێ د هشیار بوون. هندەک جارا دا ژخەو رابین و تژی ب دەڤ و لێڤێت مە ڤە مێشن و دچونە ددەڤێ مەدا و هندەک جارا وێ چوونێ دوماهیک ب ژیانا وێ مێشێ دئینا و ئەم نەساخ ژی نەدبوین.
بیرا من ل نانێ تەنیرێ یێ خەجا سەعیدی دهێت یان مریەما نوری یان شرینا رەمزی، وان تەنیرێن ب زرۆکا هەلدکرن و چاڤێ مە دما ل وی نانی و وان ب دل خۆشی و ڤیان ڤە گازی مەدکر «وەرە بۆ خوە نانی» و چەند خوشتر بۆ دەمێ پاریەک د وی ماستی دهەلاند یێ شوین دەستێت وان یێت زێرین هزار تام ژێ دهاتن... ژخو ترشکا خەیریایێ بەحس نەکە دەمێ دگەل ئەنەسی و ئەیاسی پێگڤە ل سەر سێنیکەکێ من خاربا. دەنگێ چیچک و زەنگلۆکا خوشترین مۆزیک بۆ مە گوهـ لێ دبوو و غاردانا پێخاس خوشترین یاری بوون ماین دناڤ دل گیانێ مەدا، هندی تەکنەلوجیا خۆشی و ئاسانکاریا بدەت من، ناگەهن خۆشیا وان تشتێن ئاسایی یێن وی سەردەمی.
