بافڵ جەلال تاڵەبانی سەرۆکی یەکێتیی نیشتمانیی کوردستان لە دەباشان پێشوازیکرد لە حەمید شەتری، سەرۆکی دەزگای ئاسایشی نیشتمانیی عیراق.
لە دیدارێکدا کە شاڵاو کۆسرەت رەسوڵ، جەلال شێخ ناجی سەرۆکی ئاژانسی پاراستن و زانیاری/ زانیاری، ژمارەیەک لە لێپرسراوانی دەزگا ئەمنییەکان ئامادەیبوون گفتوگۆ کرا لەبارەی بارودۆخی ئەمنی و هەماهەنگی دەزگا ئەمنییەکانی هەرێم و عیراق و پلانی نوێ بۆ رووبەڕووبوونەوەی پاشماوەکانی تیرۆر.
لە دیدارەکەدا تەئکید لە پێویستی پەرەپێدانی پەیوەندییە سەربازی و هەواڵگریی و ئەمنییەکان و فراوانکردنی ئاسۆی هاریکارییەکان کرایەوە لەپێناوی سەقامگیری زیاتر لە وڵات و پاراستنی ئاسایشی گشتی و رێگەگرتن لە هەر مەرامێک کە ئارامی و ئاسایش بخاتە مەترسییەوە.
سەرۆک بافڵ بە گرنگییەوە ئاماژەی بە کردە سەربازی و هەواڵگرییە هاوبەشەکانی دەزگا ئەمنییەکانی هەرێم و عیراق کرد کە لە ماوەی رابردوودا ئەنجامی ئەرێنی زۆر باشی هەبووە و ئۆپەراسیۆنەکان بوونەتە مایەی سەقامگیری زیاتر و بەرقەرارترکردنی ئاسایش و ئارامی و داواشیکرد ئەو هاوکاری و هاریکاریانە زیاتر بکرێن و ژوورە هاوبەشەکان فراوانتر بکرێن لەپێناوی نەهێشتنی هیچ دەرفەتێک بۆ تیرۆریستان و رایگەیاند: ئەم هاریکاریانە لە نێوان هەردوولادا زامنی ئارامی و پاراستنی سەروماڵی خەڵکە بە تایبەت لەو ناوچانەی بۆشایی ئەمنییان هەیە کە پێویستە ئەم هەماهەنگیانە زیاتر بکرێن.
لە بەشێکی تری دیدارەکەدا چەند پرسێکی دیکەی پەیوەست بە دۆخی ئەمنی تاوتوێکران و بڕیاری پێویستیشیان لە بارەوە درا.
