ئایا شەهید ئارام گەورەیە یان گەورەكراوە؟

هەندێك جار لە تۆڕە كۆمەڵایەتییەكاندا، كەسانی بێئاگا یان خاوەن هۆشیاری و ئاگادارییەكی فیكری و سیاسی زۆر تەنكۆڵە، ئەم پرسیارە لەرزۆكە  دەوروژێنن:
ئایا شەهید ئارام بیرمەند و تیۆرسیۆن بووە؟ 
ئایا سەركردەیەكی سیاسی گەورە بووە، یان لە لایەن هاوڕێكانییەوە گەورەكراوە؟
نازانم  بۆ پاش 47 ساڵ قسەیەكی شەهید غاندی ( مەجید كەریم ئەحمەد 1947-1979 )م بیردەكەوێتەوە. ئەو سەرەتای ساڵی 1977 پێیگوتم كاك ئارام  بۆ من لینینی كوردە، بڕوانە: چۆن رێكخستنەكانی كۆمەڵە دەگرێتەوە. بڕیاری شۆڕش هەڵگیرساندن دەدات، جوڵانەوەیەكی بەرەنگاری سیاسی و چەكدار دژی رژێمێكی فاشی دەتەقێنێتەوە. سەركردەیەك لە سەردەمی نسكۆ و سەرنەكەوتن و ماڵوێرانیدا، بتوانێت دەستپێشخەری پڕۆژەیەكی سیاسی نوێ بكات، ئەمە مەزنایەتی ئەو سەركردەیە پیشان دەدات، ئەمە راستییەكی مێژوویی گرنگە.
راستە لینین دەیان كتێبی تیۆری و سیاسی نووسیوە، راستە ئەو رابەری شۆڕشی ئۆكتۆبەری 1917 بووە، ئەو لە سێبەری پلیخانۆڤ، نیكۆلای ڤالنتینوڤ و لیۆ دۆیتش پەروەردە كراوە. بەشێكی زۆری ژیانی لە شاری زیورخ - سویسرا بەسەر بردووە، ئەو لەناو جوڵانەوەی سیاسی ئەوروپادا، بە یارمەتی پلیخانۆڤ توندترین رایەڵەی لەگەڵ گروپ و رێكخراوە سیاسیە سۆشیالیستەكانی  ئەوێدا گرێداوە. 
كاك ئارام  كێ مامۆستای بووە؟ كامەیە ئەو كەڵە بیرمەند و فەیلەسوفانەی  پێش 1975 هاوچەرخی بوون؟  ئاستی بزاڤی سیاسی ئەم وڵاتە وشك و برینگ و كڕێنەی  ئێمە چەند پێشكەوتوو بووە؟ سەیری رادەی دڕندایەتی رژێمی بەغدا بكە!

كاك ئارام شایەنی ئەوەیە لە ئاستی شۆڕشگێرە مەزنەكان دابنرێت، با ئەم سەركردەیە هیچ كتێبێكی بڵاو نەكردبێتەوە، با پێشتر ئەو ناو و ناوبانگەی نەبووبێت، بەڵام لەم شەوەزەنگەدا، بەبێ ئامادەكاری مادی و فیكری و زەمینەسازی، رووبەڕووی گەورەترین هەڕەشەی لەناوبردنی گەلێك وەستاوەتەوە. ئەمە قوتابخانەیەكی نوێیە لە كوردستاندا، دەبێ هەموومان شانازی پێوە بكەین.
ئەو كەسانەی لێرە لە دایكبوون یان لە وڵاتانی تر، لە ئەنجامی رووداوێك و هەڵوێستێك بوونە كاریزما و سەركردەی مەزن. ریكلام و میدیای سێبەر  كاریزما دروست ناكات.
روودی دوتشک 1940 -1979 لە شۆڕشی خوێندكارانی 1968   لە هەڕەتی لاویدا لە ناو بزاڤی خوێندكاراندا وەكو ئەفسانەیی دەركەوت، بە یەك پەیڤی ئەو، سەرجەم خوێندكارانی ئەڵەمانیای دەهێنایە سەر شەقام. 
بەداخەوە روودی دوتشك ساڵی 1968 گەنجێكی گەلحۆی راستڕەوی دواكەوتوو، فیشەكێك بە سەریەوە دەنێت و ئیفلیجی دەكات و لە ئەنجامی ئەم تیرۆرە لە تەمەنی 39 ساڵیدا كۆچی دوایی دەكات.

گیڤارا تەنیا ماوەی دوو ساڵ و نیو لە شاخەكانی  سییرا مایسترای كوبا بوو. پێشتریش رەنگە كەم كەس ناسیبێتی! كەچی تراجیدیای كوژرانی لە پۆلیڤیا، بە هەموو جیهانی ناساند!
راستە شەهید ئارام كەلتوری سیاسی و هەل و مەرجی ژیان، زەمینەسازی بۆ نەكردووە ببێتە بیرمەند و فەیلەسوف، بەڵام ئەو ژیانی لە سەر لەپی دانا، لەپێناوی ئەوەی رژێم گەلێك لە رەگ و ریشەوە هەڵنەكەنێت. 
ئەم هەڵوێستە لە تاریكترین رۆژەكانی گەلی كورد، ئارامی گەورە كرد، نەك هات و هەرای میدیای سێبەر.

  شەهید ئارام