چل ساڵ لەمەوبەر لە رۆژێکی وەک ئەمرۆدا لە دێی حەسەن مەحەی گەرمیان، یادی (9) ساڵەی دامەزراندنی یەکێتیی نیشتیمانی کوردستان و (8) ساڵەی هەڵگیرساندنەوەی شۆرشی نوێی گەلەکەمان کردەوە، بەکردنەوەی پێشانگەیەکی فۆتۆگرافی کە تایبەت بوو بە شۆرش و پێشمەرگە لە حەوشەی مزگەوتی دێیەکە، پیشانگاکەش لەلایەن کاک عەباس عەبدولرەزاق ناسراو بە (عەباسی ڤیدیۆ) ئامادەکرابوو.
جارێکیان دایکی تارا لە شارەوە هاتبوو بۆ لامان، وەزعی ماڵ و بارەگا و ژیانمان و کچە نازدارەکەی بینی، هات بۆ لام و بە توڕەبوونەوە وتی: عیماد ئەفەندی من کچم داوە بە تۆ بۆ ژیانێکی ئاوەها ؟
خوالێخۆشبوو عەلی شامار و عیماد ئەحمەد
لە گەرمیان یەکەم چالاکی لەو جۆرە بوو
شەوی ( 1/ 6 /1984) هەموومان تا درەنگانێک خەریکی هەڵواسینی وێنە و پۆستەربووین لەسەر دیوارەکانی حەوشەی مزگەوتەکە، یەکەمجار بوو لە گەرمیان چالاکییەکی لەم شێوەیە ئەنجام بدرێت. خەڵکی حەسەن مەحە و دێهاتەکانی دەوروبەری و هەندێ خەڵکی کەلار و خانەقی ئامادەی مەراسیمی کردنەوەی پێشانگاکە بوون، وەکو چالاکییەکی ئەو سەردەمەی کەرتی رێکخستنی خانەقی کە تازە دامەزرابوو بەفەرمانی ناوەندی کۆمەڵە و پشتیوانی کاک نەوشیروان و کاک ئازاد هەورامی لێپرسراوی دەزگای رێکخستنی ئەوسای کۆمەڵەی رەنجدەرانی کوردستان، لەگەڵ ژمارەیەک گەنجی دڵسۆز و بە توانا لە ماوەیەکی کەمدا، کەرتی رێکخستنی خانەقیمان دامەزراند و چالاکی باشی رێکخستن و پەیوەندی جەماوەریی فراوانمان ئەنجامدا بە پشتیوانی کاک عەلی شامار و هێزە سەربازییەکەی و بە یارمەتی کادری دڵسوزی شاری خانەقی و دەوروبەری کەلار.
بارەگای کەرتەکەمان لە دێی حەسەن مەحە بوو، هەر لەوێش لەگەڵ تارای هاوسەرم لانکەی ژیانمان لە ژوورێکی تەنها و لە دەرەوەی دێیەکە لە نزیک ماڵی کاکە حەمە و دادە تەلە دانابوو، کەپرێکمان بە قامیش و حەسیر وەکو بەر هەیوان بۆ ژوورەکە دروستکردبوو، ژیانی رۆژانەمان و خواردنی کادر و پێشمەرگە بە یەکەوە بوو، تارا کابانی چێشتلێنانی هەموان بوو، بێجگە لە نانەوایی کە زۆرجار دادە تەلە هاوکار و یارمەتیدەری بوو، ژمارەیەک لە خزمانی نزیکمان بوون بە پێشمەرگەی کەرتەکەمان، ئەمانیش بوون بە یاریدەدەرێکی باش بۆ ئیش و کاری رۆژانەی تارا، بە خەفارت بەردەستی و قاپ و مەنجەڵ شۆردنیان بۆ دەکرد. هەموومان لەسەر یەک سفرە نانمان دەخوارد، بێجگە لە عەلی شامار و مەحمود چاوشین و تارا کە ئەوان بەشەکەی خۆیان لە مەنجەڵی برنجەکەدا دەخوارد.
کاکە حەمە و دادە تەلە و مناڵەکانیان زۆر هاوکار و یارمەتیدەرمان بوون، کاکە حەمە پیاوێکی ئەسمەر و چاوڕەش، باڵا کورت و قنج و قیت و تاڕادەیەک لاواز بوو، کارمەندی دائیرەی کارەبای کەلار بوو، کاری ماڵ و لادێ و مەڕوماڵات ئەرکی دادە تەلە بوو، ئەمیش ژنێکی ئەسمەر، رەنگ قرچاو بە خۆری گەرمیان و چاو رەش، برۆ ئەستور و بەهیمەت و سەخی تەبیعەت بوو، دەنگ کرخ، خەوتنی لێدەرکەی بەردەوام جگەرەیەکی بەدەستەوە یان بەدەمەوە بوو! ئەرکی بەخێوکردنی خێزانەکەیانی لە ئەستۆ بوو.
ئاشنابوون بە ژیانی لادێ و نەریتی گەرمیان
تارا بۆ ئاشنابوونی ژیانی لادێ و نەریتی دەڤەری گەرمیان، زۆر سودی لەم شێرەژنەی گەرمیان وەرگرتبوو، هەربۆیە بوبوو بە دەستەخوشکی، ئەم خێزانە ماڵی ئێمەیان بێبەش نەدەکرد لە شیر و ماست و پەنیر و دۆ و کەرە، بێجگە لە کەشک و دۆینە و جارجاریش لایەکی لە گۆشتی گیسکیان دەنارد بۆمان، هەروەها لە ئاوی بیرەکەیان کاری رۆژانەمان ئەنجام دەدا، بۆ خوادنەوەش ئاوی کانیاوەکەی سەر گردەکەی نزیک بارەگای هێزەکەی کاک عەلی شامار - مان بەکاردەهێنا.
دوای راپەرین
دوای راپەرین پەیوەندیمان لەگەڵ ئەم خێزانە و خەڵکی دێیەکە بەردەوام بوو، ئەوەی پێمان کرابێت و لە تواناماندا بووبێت درێخیمان نەکردووە، لە جێبەجێکردنی ئەرکی ئینسانی و نیشتمانی بۆ ئەم خزمانە و دێی حەسەن مەحە، چ وەکو پرۆژەی خزمەتگوزاری یان دامەزراندن و هاوکاری و یارمەتیدانی خەڵکی دێیەکە.
تارا لە تافی لاویی و وەرزی پەپوولەییدا، شەرواڵێکی پیاوانەی لەبەردەکرد، هەموو رۆژێک خەفەر بوو، پاک و خاوێنی ماڵەکەشمانی لە ئەستۆدا بوو، داخەکەم کەمجار توانیم یارمەتیدەری بم!
جارێکیان دایکی لە شارەوە هاتبوو بۆ لامان، وەزعی ماڵ و بارەگا و ژیانمان و کچە نازدارەکەی بینی، هات بۆ لام و بە توڕەبوونەوە وتی: عیماد ئەفەندی من کچم داوە بە تۆ بۆ ژیانێکی ئاوەها ؟ سەیریکە بە شەڕواڵێکەوە وە کو باجی خەستەخانەکان ماندو و شەکەتە، خۆت دەزانی لای ئێمە لە ماڵەوە کچەکەمان چەند نازدار بوو.
منیش بەڕێزەوە وتم: خۆ من بەزۆر نەمهێناوەتە ئێرە، ئەگەر پێی باشە و دەتوانێ با لەگەڵتا بگەڕێتەوە ناو شار، منیش لاریم نییە، کە تارا ئەمەی بیست یەکسەر وتی: نا دایە، هەر لێرە دەبم لەگەڵ هاوسەرەکەم و بە خۆشی و ناخۆشیەوە ھاوبەشی ژیانی دەبم، خۆم ئاسوودە و خۆشحاڵم بەم ژیانە، یەک خولەکی ژیانی ئێرە نادەم بە هەموو ژیانی ژێردەستی بەعسی خوێنڕێژ !
ئا ئەم هەڵوێست و وفا و دڵسۆزییەی ھاوسەر و هاورێی تەمەنم چۆن لە یاد دەچێتەوە؟ لە هەموو خۆشی و ناخۆشییەکانی سەردەمی شاخ تا راپەرین لە گەڵمدا بووە، هەموو ئاواتم ئەوەیە بتوانم لە ئاستی ئەو پەرۆشی و هەڵوێستە دڵسۆزانەی ئەودا بم و بتوانم قەرەبوی ئەو رۆژگارە سەختانەی بۆ بکەمەوە.
خۆشەویستی تارا، بەتێپەڕینی رۆژگار گەورەتربووە لە دڵمدا، بەڵام بیرمە جارێک بە زمانی عەرەبی بۆ یادی لەدایکبوونی پێش (25) ساڵ ئەمەم بۆ نووسی و لە رۆژنامەی (الاتحاد) دا بڵاوم کردەوە:
عيد ميلاد سعيد
الشتاء .. فأنت فاكهته
الربيع .. فأنت خضرته
الصيف .. فأنت حرارته
الخريف .... فأنت حزنه
*
عندما تمطر السماء .. تمطرين معها !!
عندما تمشط الشلالات .. تمشطين معها !!
عندما ترقص النوارس .. ترقصين معها !!
عندما تفرش الثلوج .. تفرشين معها !!
*
تبزغين هنا .. اذا بزغ الفجر
تهجين عندنا .. اذا هاج البحر
تغردين ههنا .. اذا غرد العصفور
تولدين فينا .. اذا ولد العمر
جفرەکەی کاک عەلی
لەو ماوەیەی لە گەرمیان بووین زۆر چالاکیمان ئەنجامدا، ئەمەش بوو بە مایەی دەنگدانەوەی باش بۆ کەرتی رێکخستنی خانەقی، کەرتەکەشمان بوو بە جێی متمانەی خەڵکی ناوچەکە.
لەو ماوەیەدا لە گەڵ کاک عەلی شامار بەردەوام بەیەکەوە بووین، کاک عەلی جفرەیەکی تایبەتی هەبوو لە نێوانماندا، لە دانیشتن لەگەڵ خەڵک و لە کۆبوونەوەکانماندا بە کاری دەهێنا وەکوو: لەسەر دارەکەیە (واتە عیناد و کەلەڕەقە) و کونجییە (واتە عەقڵی بە قەد کونجیەکە) و مایخوش بلعەقل (وازی لێبێنە) و ثقیل عەلمەعیدە (ناچێتە دڵەوە) و قاچی لەسەری بەرزترە (بێکەڵکە)...هتد.
لەڕاستیدا هەرگیز ئەو نۆبەرە چالاکییەم لەو رۆژگارەدا لەیاد ناچێت ئەویش یادکردنەوەی دامەزراندنی یەکێتی بوو.
ئای زەمانە، نازانم چۆن بەراوردی ئەو رۆژگارە بە ئەمڕۆ بکەم..؟!
ئەوسا لە دێیەکی گەرمیان بە پێشانگەیەکی سادە و بە چەند وێنە و پۆستەرێک، یادی دەمەزراندن و هەڵگیرساندنی شۆڕشمان دەکردەوە، کەچی بە قەد دونیایەک خۆشحاڵ و پڕ ئومێد بووین
محەمەد فەتاح، موفەق حەمید، تاراخان لە سەردەمی شاخ
پر ئومێد بووین
ئەوسا لە دێیەکی گەرمیان بە پێشانگەیەکی سادە و بە چەند وێنە و پۆستەرێک، یادی دەمەزراندن و هەڵگیرساندنی شۆڕشمان دەکردەوە، کەچی بە قەد دونیایەک خۆشحاڵ و پر ئومێد بووین.
ئێستاش بەم هەموو دەسەڵات و توانای راگەیاندن و جۆرەهای پەخشەوە، یادی (49)ساڵەی یەکێتی و (48)ساڵەی شۆڕشی نوێ دەکەینەوە و جار و باریش گلەیی لەبەختی خۆمان دەکەین .
راستە سەردەمەکان جیاوازن و دنیا گۆڕاوە، بەڵام نابێت ناشوکر و بێ ئومێدبین ... دەبێت بڕوامان بەو لۆجیکە بێت بۆ هەر سەردەمێک یەکێتی ئامادەیە و ئامرازێکە بۆ بەدیهێنانی ماف و ئاواتی کورد و کوردستان و خۆری مام جەلال - یش ئەبەدییە بۆ یەکێتی و یەکێتیش بۆ گەلەکەمان.
