پێشهاتێكی سیاسیی ترسناك و ئاقیبەت خراپە كە پارتی دیموكراتی كوردستان بچێتە هەر رێككەوتنێكەوە لەگەڵ نفوزی توركیا لە كەركوك بۆ ئەوەی پارێزگاری ئەو یەكە ئیدارییە هەستیارە لەو هێزەی كوردییە نەبێت كە بە گەمەی دیموكراتییانە لە هەموو قەوارە بەشداربووەكانی تری هەڵبژاردنی پارێزگاكەی بردۆتەوەو بۆتە هێزی بنەڕەتیی داكۆكیكردن لە ناسنامەی كوردستانیبوونی پارێزگاكە.
لە ئەزموونەكانی رابردوودا،(پ.د.ك) لە قۆڵی نەینەواوە نەیهێشت(هاوپەیمان)ەكەی لە هەرێم لە حكومەتدا كە مەبەستمان یەكێتییە، لە ئیدارەی خۆجێی ئەو پارێزگایە بەشدار بێت. ئەوكات دەتوانرا هەڵوێستی پەرچەكردارانە بنوێنرێت چ لەسەر ئاستی ناوچە كوردستانییەكان و چ لەسەر ئاستی هەرێم، بەڵام یەكێتی ئەوەی نەكرد، چونكە پێگەی بەرەی كوردی خۆی لە ناو پرۆسەی سیاسیی عێراقدا بەرگەی گرژیی تری لە پەیوەندییەكانی هەردوولادا نەدەگرت. یەكێتی پێچەوانەی ئەوە، بۆ هەڵبژاردنی ئەمجارەی پارێزگاكانیش لە زیاتر لە ناوچەیەكی كوردستانیدا بانگەوازی بۆ یەك لیستی كوردستانی كرد، لە كاتێكدا پێشوەخت، بە داتاو زانیاریی ورد، دەیزانی كە لانیكەم لە سێ پارێزگا، لە كۆی چواریان، كە ناوچە كوردستانییەكانی تێدایە، هێزی یەكەمی عێراقی(كەركوك)، یان كوردستانی(دیالە و سەڵاحەدین) دەبێت.
ئەم بابەتە هەموو جارێك لای پارتی دیموكراتی كوردستان، نادیدە دەگیرێت، لەناوخۆی هەرێمی كوردستانیشدا، پرەنسیپی شەراكەت و دابەشكردنی سەروەت و سامان و دەسەڵاتیش بە لاسەنگی و نادادپەوەرانە بەڕێوەدەچێت و درێژەیان هەیە، لە بەرامبەردا یەكێتی هێشتا هەر نایەوێت، كورد وتەنی، بیگاتە مریشكە رەشە. نە قەوارەی لاوازی هەرێم و نە حاڵی خراپ و نائاسایی دانیشتووانەكەشی لە رووی ئابووری و گوزەران و لایەنی دەروونی و مەعنەوییەوە توانای گێمی تری ململانێی توندو خوێناویان نییە.
راستترین رێگا تەنها لێكگەیشتن و رێككەوتنی كوردستانییە وەك بەرەیەكی هاوبەش، جەمسەرگیریی نیشتمانییە وەك كۆبوونەوەی ئەمڕۆی هێزە كوردستانییەكان بۆ پرسی سەرژمێری و مەترسییەکانی
پاشان با شتێك واقعی بین، لە بنەڕەتدا هەرێم خۆی، ساڵ بۆ ساڵ لە پاشەكشەدایە، بەشێكی خاكەكەی بەردەوام لەژێر زەبری ئۆپەراسیۆنی دەوڵەتی توركیایەو ژیانی تیا نەماوە، قوتی زۆربەی دانیشتوانەكەشی كەوتۆتە ژێر كۆنترۆڵی بەغدا، پەیوەندیی نێوان هێزەكانیش باش نییەو، دۆستانی دەرەوەش، زلهێزەكان و رێكخراوە نێودەیوڵەتییەكان، چ بە سەردانە دیبلۆماسییەكانیان بێت، یان بە راپۆرتە وەرزییەكانیان، پیشانیان داوین كە چ وێنەیەكی نائاسایی ئێمەیان لە فەرمانڕەوایی و بەڕێوەبردنی هەرێمەكە لەلایە، خۆ ئەگەر سەرسەختیی یەكێتی و داكۆكیكردنی نەبووایە لە پرۆسەی هەڵبژاردن و مووچەی فەرمانبەرانی هەرێم، ئەوا دۆخەكە ئێستا لە قۆناغێكی ئاڵۆزترو زۆر پڕ قەیرانتردا دەبوو.
بۆیە لە پرسی دانانی پارێزگارێكی كوردیش بۆ كەركوك، نابێ بەڕێزان لە(پ.د.ك) ئیستیغلالی هەلومەرجی ئێستا بكەن كە ملنەدانی نفوزی توركەكانە لەكەركوكدا بۆ گێڕانەوەی لەسەرخۆی ناسنامەی راستەقینە بۆ پارێزگاكە. ناكرێت ئەو هێزە كوردییە بچێتە بەرەیەكەوە كە ستراتیژی دوورو نزیكیان لاوازكردنی تەواوەتی بەرەی كوردییە لەو پارێزگایەدا، بەڵام ئەمجارەیان بە ناوی چییەوە؟ بەناو دیموكراسی و رێككەوتنەوە لەگەڵ هێزێكی كوردیی دیاریكراودا.
پاشان وا پێویستە عەقڵمەندانی ناو پارتی شتێكیش دیراسەی ئەوە بكەن كە ئەگەر بێت و ئەو رێككەوتنە رووبدات كە پێچەوانەی ئەنجامی هەڵبژاردنەكانی پارێزگاكە بێت، هێزی براوەی شارەكە بێ پلان و بێ تەگبیر نییە!، بەڵام هیواخواز نییە لە بنەڕەتدا ئەو هەڵە ستراتیژییە رووبدات كە نەخشەكەی لە پایتەختی وڵاتێكی هەرێمایەتییەوە داڕێژرا بێت. پاشان، بەشێكی دیار لە هێزە عێراقییەكان، بۆ رێگرتنیش لە هەر تەماحێكی سیاسی و مێژوویی هەرێمایەتی، ناهێڵن نفوزی نیشتمانی لە پارێزگاكەدا لاوازبێت. لە نەینەوا لە ئاراستەی رووداوەكان تێگەیشتوون، لە كەركوكیش دەزانن یارییەكە چییە!، بۆیە راستترین رێگا تەنها لێكگەیشتن و رێككەوتنی كوردستانییە وەك بەرەیەكی هاوبەش، جەمسەرگیریی نیشتمانییە وەك كۆبوونەوەی ئەمڕۆی هێزە كوردستانییەكان بۆ پرسی سەرژمێری و مەترسییەکانی، تەنها دانوستانە بەو ئاراستەیەی كە پارێزگاكە لە چوارچێوەی عێراقدا بمێنێتەوەو لە گەمەی هەڵبژاردنیشدا هەموو جارێك، وەك ئەمجارەیان، كوردستانییانە دەربكەوێتەوە.
