زۆر وتنەوە و قسەکردنی چەند بارە لەبارەی هەندێ راستییەوە سوودی زۆرە، لەلایەکەوە راستیخوازەکان متمانەیان قایمتر و بەهێزتر دەبێت و دوودڵەکانیش وردە وردە یەکلادەبنەوە و ئەوانەشی گوێی خۆیان لە راستییەکان کەڕ دەکەن و چاویان نوقاندووە، بڕوایان لەقتر دەبێت.
بۆچی یەکێتیی نیشتمانیی کوردستان، ناحەز و نەیار و دوژمنی زۆرە؟ ئایا لەبەرئەوەی حزبێکی نانیشتمانیی و دژی نەتەوەکەیەتی؟ کلکی داگیرکەرانە؟ دژی دیموکراسییە؟ بڕوای بە ئازادیی و مافی مرۆڤ نییە؟ دژی بەرقەراربونی یاساو دادپەروەرییە؟ داکۆکیکاری سەرسەختی مافە رەواکانی گەلەکەمان نییە؟
لەوانەشە هەندێ لایەن و گروپ و کەسیش هەروا و لەخۆڕا بیانووی سەیر بهێننەوە بۆ دژایەتیکردنی ی.ن.ک و لە ناهەق رۆژ تا ئێوارە لە میدیا رەسمی و سێبەرەکانی خۆیانەوە بەیت و بالۆرەی سەیر بڵێنەوە. ئێستا کۆمەڵێک قسەوباس و تۆمەت هەن کە نەیاران و دوژمنانی یەکێتی، پشتی پێ دەبەستن بۆ دژایەتیکردنی، لەکاتێکدا 49 ساڵ لەمەوبەر هیچ شتێک لەوانە نەبوو کەچی ئەوانە هەر دژی یەکێتی بوون!
ساڵی 1975 کە یەکێتی دروست بوو، هێزی ناوخۆ و هێزە ئیقلیمییەکان بە ئاشکرا دژی بوون، باشترین نموونە کارەساتی هەکارییە بە سێ دەوڵەت و هێزەکانی ئەوسای قیادە موەقەتە شەڕی یەکێتییان کرد.
لەپاش ئەوەشەوە تا ساڵی 1986 چەند هێزێک لە شاخ شەڕی یەکێتییان دەکرد. لە هەڵبژاردنی 1992 حکومەتی ئەوکاتەی عیراق بە ئاشکرا و روونی یارمەتیی رکابەری سەرەکیی یەکێتی دەدا.
لەساڵی 1994 کە شەڕی ناوخۆ هەڵگیرسا جگە لە لایەنێکی ناوخۆ، دەوڵەتێکی دراوسێشمان یارمەتی پارتیی دەدا. هەمووشمان رۆڵی رژێمی روخاوی سەدام دەزانین لە دژی یەکێتی لە 31 ی ئابدا. لەساڵی 1997 لە شەڕی گەردەلوولی تۆڵەدا دەوڵەتە دراوسێیەکەی باکوورمان لە قازانجی پارتی هاتە مەیدانی شەڕەکەوە و هێزەکانی تا نزیک پردی هیزۆپ هێنا.
هەر لەو ماوەیەشدا وەک ئەو کاتە باسکرا، دەوڵەتێکی زلهێز داوای لە یەکێتی کردبوو کە لە دێگەڵە تێنەپەڕێت.
دروستبوونی حزب، بزوتنەوە، هاوپەیمانی، رێکخراوی کۆمەڵگەی مەدەنی، زۆربەی زۆری لە سنووری دەسەڵاتی یەکێتیدایە. ناڕەزایی دەربڕین، خۆپیشاندان، هەڵمەت، بایکۆت، گردبوونەوە و مانگرتنیش هەر لەم سنوورە رێپێدراوە
لە هەموو هەڵبژاردن و پێشبڕکێ دیموکراسییەکاندا، زۆرترین رکابەری و شەڕە دەنووکی میدیا جۆراوجۆرەکان لە سنووری یەکێتیدان و زۆربەشی روویان لە یەکێتییە!
دروستبوونی حزب، بزووتنەوە، هاوپەیمانی، رێکخراوی کۆمەڵگەی مەدەنی، زۆربەی زۆری لە سنووری دەسەڵاتی یەکێتیدایە. ناڕەزایی دەربڕین، خۆپیشاندان، هەڵمەت، بایکۆت، گردبوونەوە و مانگرتنیش هەر لەم سنوورە رێپێدراوە.
سەیرەکەش لەوەدایە، هەموو حزب و بزووتنەوە و گروپەکان، سەرچاوەی سەرەکی کێشەو گرفتەکانی هەرێمیان جێهێشتووە و هاتوون یەخەی یەکێتی دەگرن. بۆچی؟ لەبەر ئەو هۆکارانەیە کە لەسەرەتای ئەم بابەتەدا ئاماژەمان پێداوە؟ نەخێر، بەڵکو لەبەر ترسیانە لە یەکێتی، لە دید و بۆچوون و بەرنامەکەی کە لە خزمەتی گەلی کوردستان و چەسپاندنی دیموکراسی و ئازادی و بەرقەراکردنی دادپەروەریی و یاسادایە.
ی.ن.ک تێکۆشانی لەپێناوی گەلەکەماندایە نەک خۆی، هەوڵەکانی بۆ خۆشگوزەرانی و سەرفرازیی خەڵکی کوردستان و بەدیهێنانی مافەکانی گەلەکەماندایە لە چوارچێوەی دەستووری عیراقی فیدراڵدا کە سەرۆک مام جەلال، پشکی هەرە گەورەی لە دامەزراندنیدا بەردەکەوێت.
بۆیە ئەگەر دەسەڵات لەڕێی سندووقەکانی دەنگدانەوە بکەوێتە دەست یەکێتی، کە هەر واش دەبێ! ئەوا بە دڵنییاییەوە هەموو خواست ویستە یاسایی و رەواکانی گەلەکەمان بەدیدەهێنێت، هەربۆیە هەر هەموویان بە هەموو هێزێکیانەوە دژایەتیی یەکێتی دەکەن و دەیانەوێت ناشیرینی بکەن. ئاشکرا و دیارە، یەکێتی هەر یەکێتییە، بە هەموو پیلان و گەلەکۆمەکێکان نەڕووخاوە، بە بوختان و قسە و قسەڵۆکی ئەم و ئەو، رێبوارانی کاروانە بەردەوامەکەی جگە لە تێڕوانین بۆ ئاسۆ، ئاوڕ لە هیچ نادەنەوە و هەر بەرەو پێش دەڕۆن.
