هیچ دەسەڵاتدارێک هێندەی دەسەڵاتی تاکڕەهەند و دەسەڵاتداری لاڕێکار و تاکڕەو، لەگۆڕان و گۆڕانکاری ناترسێت، هەر کاتێک بینیت یان بیستت کۆمێنتارە زار قەرەباڵغەکانی میدیا و سۆسیال میدیا گرژبوون و کەوتوونەتە هۆنینەوەی چیرۆکی درۆینە و داتاشینی سیناریۆ، یان فڕێدانی قسەی نزم و زبر و چەواشە، ئەوا بزانە ترس لە گۆڕانکاری ئەوکی گرتوون.
فرەبازنەیی و هاتنە پێشەوەی هەڵبژاردنی خولی شەشەمی پەرلەمانی کوردستان، کێچی خستووەتە کەوڵی دەسەڵاتدارە تاکڕەو و دەسەڵاتخوازەکان، تەنانەت کاری بەوە گەیاندون یاری بەقووت و مووچە و مافەکانی مامۆستایانی وانەبێژ و فەرمانبەران و خەڵکەوە بکەن، ئێستا وەک کارتی گوشار بە ئامانجی تێکدانی دەروونیی دەنگدەر و پرۆسەی دیموکراسی یا دواخستن و دوورخستنەوەی زیاتری هەڵبژاردن بەکاریاندێنن.
تاكڕەوەکان مارکێتینگ بەترسەوە دەکەن
ترسی تاکڕەوەکانی هەرێمی کوردستان لە گۆڕانکاری، ترسە لە خەڵک، ترسیش لە خەڵک ترسە لە پێگرتنی دەسەڵاتی خەڵک، ترسان لە دەسەڵاتی خەڵک، ترسە لە کەش و هەوای ئازاد و ترسیشە لە ژیانی دیموکراسی، داڕێژەرانی تێزی نەخێر هیچ گۆڕانکارییەک لە رێگەی هەڵبژاردن و بەبنەماگرتنی دیموکراسی بە دینایەت، شیرەخۆرەی دەسەڵاتداری تاکڕەو و دەسەڵاتخوازی لادەرن.
ترسناکترین دوژمنەکانی دیموکراسی، دژبەرەکانی دیموکراسی نین، ئەوانەن بەناوی دیموکراسییەوە، دژایەتی دیموکراسی دەکەن، دروستکردنی ئەم هەموو ترسە لەسەر ژیانی خەڵکی کوردستان، وەک ترسی سەلامەتی سیادی، ناوخۆیی، یاسایی، تیرۆر، توانای دامەزراوەیی، تەنانەت ترسی لەدەستدانی شەرعییەتی قەوارەیی و دیموکراسی، شتێک نییە قەدەر لەگەڵ خۆیدا هێنابێتنی، ئەمە مارکێتینگە بە ترسەوە کە دەخوازرێ لە رێگەیەوە بەر بەبیرکردنەوە و هزری خۆییبوونی خەڵک و گەشەی هزری هاووڵاتیبوون بگرن.
پرسەکە لەکوێی یەکێتی و یەکێتیی لەکوێی پرسەکەدایە؟
تاکڕەهەندگەرایی لە ژیانی سیاسی و حزبی کوردیدا، لەو رۆژە بە کۆتا دێت کە (ی.ن.ک) لەدایک دەبێ و دادەمەزرێ، لەو رۆژەوە تێکست و دەقی زیندوو، فرەیی سیاسی و حزبی، سەرکردایەتی بە کۆمەڵ و دەنگی خەڵک دەبنە بنەما و سەرچاوەی بڕیار، ئەوە یەکێتییە لە قەندیلەوە دڵی بەغدا دەهەژێنێ، ئەوە یەکێتییە داینەمۆ و بگۆڕی قۆناغ و واقیعە سەپێنراوەکانە، ئەوە یەکێتییە سەرمەشقی راپەڕینە و پەرلەمان دەکات بەواقیع و حکومەت دادەمەزرێنێ و فیدڕاڵی دەچەسپێنێ، ئەوە یەکێتییە ئاو بە ئاگڕی شەڕی کورد کوژەدا دەکات و ئاشتەوایی دەکات بە جێگرەوە و هەزاران پێشمەرگە و فەرماندە و سەرکردە و باشترینەکانی خۆی لە تێکۆشەرەکانی دەبەخشێ و بەرگری لە خاک و نیشتمان دەکات.
ئەوە یەکێتییە بەغدا وەک چەقی چارەسەری کێشەکانی هەرێم دەبینێت و کۆتایی بە یاری پێکهاتەیی دەهێنێ و یاسایی هەڵبژاردن هەموار و پاکدەکاتەوە لە دەنگدەری هاوردە و مردوو، ئەوە یەکێتییە پارێزگاری کورد دەبەخشێتەوە بە کەرکوک.
یەکێتییەک بە درێژایی مێژووەکەی هەر خۆی بگۆڕ و سەرمەشقی گۆڕانکارییەکان بووبێ، نەک هەر لە گۆڕان و گۆڕانکاری ناترسێت، بەڵکو رووبەڕووی هەر لاڕێکارییەک و هەر دۆخێک دەبێتەوە، کەواتا یەکێتی هێزی بگۆڕ و چەقی گۆڕانکارییەکانە.
بۆچی دەبێ رێڕەوەکە راستبکرێتەوە؟
بێزاریی ئەمڕۆی خەڵکی هەرێمی کوردستان، بەتەنها هەر لێکەوتەی دۆخە قەیراناوییە ناوچەیی و گشتییەکە نییە، بەرهەمی خراپەکاری ئیداری و ئابووریی و سیاسی و سەپاندنی سیاسەتی تاکڕەوییە لە حکومڕانییدا، ئەوەی ناتوانێ ئەم هەموو گەندەڵی و جیاکارییە لە خزمەتگوزارییەکاندا ببینێ و تێبگات لەم هەموو خەمساردییە، دیموکراسی و خەسارنەناسی خەڵک نییە، بەڵکو هەڵاتنی لاڕێکارەکانە لەبەرپرسیارێتی.
کێشەکانی کارەبا، ئاو، رێگەوبان، رەوشی تەندروستی و خانووبەرە، دامەزراندن، خوێندنی بەبنەما و کوالێتی، کێشە ناوخۆیی و فیدراڵی و سنوورییەکان، بودجە و مووچە و قۆرغکاری بازاڕ و دەیەها ئاریشەی گەورە و ستراتیژی تر، تادێت بە ئازارتر دەبن لەسەر ژیان و گوزەرانی خەڵک، کەچی حکومەت تادێ قەرزارتر دەبێت و بێباکتر دەبێت.
حکومەتێک، خۆی بە قەرزاری خەڵک و هاونیشتمانییەکانی نەزانێ، ناشتوانێ لەموعاناتیان تێبگات، ناتوانێت رێز لە هەڵبژاردن و دەنگدەر بگرێ و لەبەهای دەنگدان و ژیانی دیموکراسی تێبگات، بۆیە پێویستمان بە راستکردنەوەی رێڕەوەکە هەیە، لەم پێناوەدا دەبێ تێکەڵکردنی تواناکانی چاکەخوازی لە ویژدان و خۆبەخشی و دڵسۆزی و راستگۆیی و خۆشەویستی و پێکەوەژیانی ئاشتییانە و گرنگیدان بەیەکتردا رەنگ پێبدەینەوە.
