ل بەر خۆدیکێ بەرێ خۆ ددەمە خۆ. کەنگی داوی جار بوو، من ب ئەڤی ڕەنگی خۆ دیتی؟ ئەو پەیوەندییا د ناڤبەرا کەیفخۆشیێ و ڕۆخساری دا، هەر جار بیرا من ل سێربەندێ من دئینیت. ب تنێ سێربەندێ من، هەمی نهێنیێن ڕۆخسارێ من دزانیت! د ناڤبەرا مەدا بیت، جاران ئەو من پاڵددەت ڕۆخسارێ خۆ ب گوهۆرم.
ڕۆخسار کوگەهەکا نهێنییە، ژبلی ناخی کەس نزانیت چ دناڤدا هاتیە ڤەشارتن، دۆر نینە گورستانا وان هەمی تەرمان بیت، یێن پشتی هەڤرکییەکا درێژ لبن توندییا سزایێ شکەستن و بێزاریێ وەغەرکرین! کی نابێژیت زیندانا هزارەها نەخۆشی و کەڤتن و کوپییێن مە یێن ڤەشارتی بیت.
وی زەلامی جاران لبەر گۆهێ من، هێدی دگۆت: «ژبلی من کێ ماف هەیە، پەسنا نازکییا دێمێ تە و ڕەشاتییا پرچا تە بکەت؟». پەیوەندیەک دناڤبەرا پەسنا ڕۆخساری و جورەکێ بندەستیکرنێ هەیە، دبیت ژبەر ڤێ چەندێ بۆ من پەسنا ڕۆخساری تشتەکێ بێ ڕۆح بوو. لەورا وان هەمی جاران، ب بێدەنگی من ستێرکا خۆ ل لێڤا وی یا خارێ دگرت. ئەز بووم ئەو ڕێبەرزەیا، ل ناڤ دێمێ وی، ل ئاماژەیەکێ دگەڕیام سەمتا من پێ ڕاستەڕێ ببیت، لێ من نە ددیت. مانە ئەڤە بوو، ئەو زەلامێ هەلگرێ سەرنجڕاکێشترین ڕۆخسار؟ کێ ژبلی من ڕەشاتییا چاڤێن وی دەربازکربوو و دزانی زیندانەکا ئاسێ ل پشت ڤێ هەمی جوانییا ڕۆخساری هەیە. زێرەڤانەکێ دلۆڤانە هەر تشتی پێشکێش دکەت ب مەرجەکی نەگەهیە کەنارێن ئازادییێ.
هێش پرچا من یا ڕەشە و هێش چاڤێن وی دڕەشن، ل ناڤ ڤێ قەدەر ڕەشاتییێ، بیابانەکە ژ بێ هەستییێ. تو دبینی بێ عەشق، ڕەشاتی دشێت چ بکەت؟ دێ بێژی داڤەکا ڕۆناهییێ نەبوو خۆ بڤێ تاریێڕا بگەهینیت. وووف ژڤێ بێ مەژییاتیێ، ما کەنگی ڤێ ڕەشاتییێ پەیوەندی ب تاریێ ڤە هەیە؟!
پێش هەر دیدارەکێ دگۆت: «بەلکی ئەز ڕەنگێ وێ گۆلا تو حەز ژێدکەی ل سەر لێڤێن تە ب بینم؟». جارەکێ ژی من هند گرنگی بڤێ گۆتنێ نەدابوو، پرسیار بکەم کیژ ڕەنگ؟ ئەز ژی تێرا خۆ یا خەمسار بووم، دبیت هەگەر ڕەنگەکی گرێبەستەک دگەل ڕەشی مۆرکربا ئەڤ ڤەقەتیانە نەبا، دبیت! ژ خۆ ل پشت پەیڤا (دبیت) ب خۆ ئاقارەکێ بێ داوییە!
هەر جار ل کەنارێ داوییێ، باوەرییا وی دگەهشتە بترسترین خال و هەر حەز دکر، هێزا گۆمانێ زاڵتربیت. ب کەنیەکا تژی غرور دگۆت: «تو ئەوی یا نەشێی ڕەنگەکی ب دانییە جهێ ڕەنگێ پرچا خۆ، من تێبگەهینە چەوان باوەر بکەم، یان قەبیل بکەم کو ئێک دێ جهێ من گریت؟»
نەشێم!!!
چ دکتاتۆرەکێ ئێکانەیە ژ تەرزێ خۆ، وااای چەند ئێکانەیی ژێ دهات.
ئەرێ هەمی جارا بەرێخۆدانا من یا بێدەنگ، هێزا وی د بژکاند، دبیت هەکە بڤێ هەمی باوەریێ عەرشێ خۆ مۆکم نەکربا، بێدەنگیا من دەست ب سەر دەستهەلاتا ویدا نە دگرت!
ل پشت وێ هەمی باوەریێ، ترس هەلگرا ڕاستیەکێ بوو، ئەو ڕاستییا ل سەر ڕۆخسارێ وی ڕەنگڤە ددا، هەر ئەوە یێ لناڤ هەمی ڕەنگان ل ڕەنگەکی دگەڕیت قابلی گوهورینێ نەبیت.
