د.عەدالەت عەبدوڵڵا
یەكیك لە كارە خاسەكان مەكتەب راگەیاندن یەكیتیی و وەتایوەتیش روژنامەی كوردستانی نوێ لەی ماوە كە وە رەئی ئیمە بیە خەیر ئەرا گشت لایەكمان و وەرچاومان رووشن كرد، سەردانێگمان بی ئەرا شارە فرە دڵگیرەكەی كوردستان كە شار خانەقییە. ئەی شارە ئەرا خەڵكەیلیگ وەك ئیمە، هویچ غەریب نییە وە حس وەغەریبیش نیەكەید. ئەیە ئەوەڵەن ئەرا من شار بابام و باوگمە، وەك د.لوقمان برامیش ئیشید عومریك لەتیی بینە و ژیانكردنە لە یەكیگ لە مەحەلە قەدیمەگانی كە مەزرەعە-س، حەتا هەتا ئیسایش قەورەگەی بابام هالەناو مزگەفتەگەی شیخ فەتاح لە حەمیدییەو جاروەجاری سەردانی كەیمن.
لەلایەك تر، خانەقی وە توڵ عومرو تاریخ خۆی، هەر شار مەردمە ناودارو خاوەن شەخسییاتەگان بییە لە گشت مەجالیگ، لە سیاسەتەو بگر تا رەسیدە ئیدارەو هونەرو ریازەو مەجال تریش.. هەركیگ كتابەكەی ماموستا ریزان عەزیز پشتیوان بخوینت كە قەرار لێواس وەی زووانە دەری بكەت لەبان ئەعلام و ناودارەیلی شار خانەقی، ئەی حەقیقەتە وە رووشنی ئارای دەركەفت، هەركیگیش فرە نا، بەس ئەرا یەكجار سەریگ بەت لە هۆڵەگەی مەتحەف خانەقی كە هالەناو جەرگەی شارەگە، وەچاو خۆی دوینت ئەی شارە چ تاریخیگ دیریت كە گشتی جیگەی فەخرو شانازییە ئارا خەڵكەگەی.
ئەوەی لەی سەردانەمان ئەرا شار خانەقی وەك یەكیگ لە داواكارییەگان لەلیمان كریا و توان ئیهتمام بەینە پی، مەسەلەی لایەن رۆشنبیری و ئیعلامە. لەی ناحیەو، حەیف ئارا گشت قەنەوات ئیعلام كوردستان كە زوریگیان پەیامنێر یان هویچ نوسینگەیەگ نەیرن لە شارەگەو وە تەواوەدی ئیهالی كردنە، ئەیە لە وەختیگ لە موقابیل ئەیە سی و حەفت قەنات عەرەبی لە شارەگە هەس و ئیوارەو شەوەكی كاركەن و حەوڵ دەن تەئیسیر بكەن لەبان فكرو هوش سیاسی و مەزهەبی خەڵكەگەو وە گشت ریگەیەكیش وەلای خۆیان كیشیان بكەن، كە ئەیەش فرە خاس دیارە ئەرا چەس و چ مەرامیگیش هالە دویای!، چوینیش دویاخر بوودە هوكاریگ ئەرا ئەوەی ناسنامەی كوردیی شارەكە كاڵ بووتەو زوان كوردیش كەم كەم نەیلن و خەتەریاتیش ئەرا لەهجەی شارەكەگە زیاتر بوود.
ئیمە لەی سەردانەمان ئەرا شارەگە، رەسینە قەناعەتیگ كە قسوری فرەس دەرحەق خەڵگ شارەگەو بایەد ئیتر لەیەدوا دریژە نەكیشد، ئەوەی كە واجبە لەبان شان راگەیاندن یەكیتی و روژنامەگەمان كەینەی و دریغی نیەكەین، هەرچیگیش وەك واجبیگ كەفتە بان شان مەسئولەیل شارەگەو لەناو شارەگە خۆی و باقی مەسئولەیل تر كە هان هەولیر و سلێمانی و كەلار و شارەیلی تر، بایەد وە واجب خۆیان هەڵسن و تیكەڵ مەردم خانەقین بن و گوش بتەكەنن چە توان و چ موعاناتیگ دیرین ئەرایان عیلاج بكەن. تەمەناش كەیمن روژیك زویتر وەدەم ئەی مەسەلەوە بان و خوشی و فەرحانی بڕەسننە خانەقینییەكان.
