هەولێر جگە لەوەی شارێكی دێرینە، چەندین شوێنی گەشتیاریی هەیە، لە گرنگترینیان(گەلی عەلی بەگ و بێخاڵ و جوندیان و ناوچە دڵڕفێنەكانی بارزان و سیدەكان) و چەندین شوێنی دیكە. هەموو ئەو ناوچانە كەشوهەوایەكی لەباریان هەیە و خاوەنی چەندین سەرچاوەی ئاون، دەكرێ وەك سەرچاوەیەكی گرنگی داهات سوودی لێوەربگیرێت و بایەخی زیاتری پێبدرێ.
هەندێك لە وڵاتان وەك سەرچاوەی سەرەكیی داهات پشت بە گەشتوگوزاری دەبەستن، بەجۆرێك سەرجەم سێكتەرەكانی دیكەی لەخزمەت ئەو كەرتە و بەرەو پێشبردنی ناوچە گەشتیارییەكانیان تەرخان دەكەن، ئەمەش وادەكات جگە لە داهاتەكەی، هەلی كار بۆ خەڵكەكەی بڕەخسێت و وڵاتەكەی بەردەوام جوانتر و پاك و خاوێن تر بێت، هەربۆیە كار بۆ چاككردنی رێگاوبانەكان و رێكخستنەوە و دابینكردنی پێداویستییەكانی شوێنە گەشتیارییەكان دەكەن.
ئەو وڵاتانە هەمیشە بەوڵاتێكی ئارام و دوور لە توندتیژیی و میواندۆست دەناسرێن، چونكە هیچ كارێك ناكەن ببێتە هۆی تێكدانی ژینگە و ئارامی وڵاتەكەیان، لەهەمووشی گرنگتر ئەوپەڕی ئاسانكاریی بۆ هاتنی گەشتیاران دەكەن، لە پێدانی فیزە تا ئامادەكردنی رێبەری گەشتیاریی و وەرگێڕ و نووسینی تابلۆی شوێنە گەشتیارییەكان و شوێنی حەوانەوە و خواردن و خواردنەوە، لەوەش گرنگتر بایەخی تەواو بە كەمكردنەوەی نرخەكان دەدەن، تاكو گەشتیاریی هەموو شوێنێك بتوانێ سەردانی بكات.
بەڵام بەداخەوە لە پارێزگایەكی وەك هەولێر كە هەموو زەمینەیەكی گەشتیاریی تێدایە، دەبوو یەكێك بێت لەشارە گەشتیارییەكان جیهان و خەڵكی لە هەموولایەكەوە رووی تێبكەن. كەچی تائێستا نەتوانراوە سوود لەو ناوچە گەشتیارانە وەربگیرێت و وەك سەرچاوەیەكی سەرەكی داهات سەیر بكرێ، هەر ئەمەش وایكردووە جگە لە خەڵكی ناوەڕاست و باشووری عیراق، رێژەیەكی زۆر كەم لە گەشتیاریی دەوروبەر و وڵاتانی دەرەوە روو لە ناوچە گەشتیارییەكانی پایتەخت بكەن.
خراپی رێگاوبان یەكێكە لەو گرفتانەی گەشتیاران ناتوانن بەئاسانی بگەنە ناوچە گەشتیارییەكان، تەنانەت هەندێك شوێن بەهۆی نەبوونی رێگای ئۆتۆمبێبل هیچ كەس نەیتوانیوە سەردانی بکات، ئەمە جگە لە زۆری ژمارەی بازگە و خاڵی پشكنین، كە زۆرجار ئاستەنگی هاتوچۆ دروست دەكات.
هەروەها رێگریی لە گەشتیاران دەكرێت روو لە هەندێك شوێن بكەن، بە بیانووی مەترسی ئەمنی و تێكدانی ژینگە و نزیكی شوێنی حەوانەوەی بەرپرسان، ئەمانە هەمووی وادەكات هەولێر نەبێتە شارێكی گەشتیاریی گرنگ و لەوبارەیەوە بوژانەوە بەخۆیەوە نەبینێت.
