مانگی ئازار لە مێژووی خەڵكی كوردستاندا پڕە لە بەسەرهات و بۆنە و كارەساتە خۆش و ناخۆشەکان، ساڵانە لەو رۆژەدا یادیان دەكرێتەوە، هەندێكیان كراوەتە پشوو و بۆ ئەوانی تر، تەنیا وەك بۆنەیەك سەیر دەكرێت و بە شێوازی جۆراوجۆر یادیان دەكرێتەوە.
ئەگەرچی بەر لە ساڵی 1988 لەو مانگەدا تەنیا رۆژێكمان هەبوو ئەویش 21/3 رۆژی نەورۆز بوو، لەو رۆژەدا خەڵكی بە چەندین شێواز یادیان دەكردەوە، هەندێكجاریش بەهۆی سیاسەتەكانی رژێمی ئەوكاتەوە، رێگریی لە یادكردنەوەی ئەو بۆنە نەتەوەییە دەكرا، بەتایبەتی لە شارە گەورەكانی كوردستان.
بەڵام دوای كیمیابارانكردنی هەڵەبجە و سەرهەڵدانی راپەڕینەكەی مانگی ئازاری 1991ی خەڵكی كوردستان، ئیتر تەنیا نەورۆز نەبووە تاكە بۆنەی ئەم مانگە بۆ گەلی كورد لەم پارچەیەی كوردستان، بەڵكو كیمیابارانكردنی هەڵەبجە و رۆژانی راپەڕین و كۆڕەوە مەزنەكەی هەمان ساڵ، وەك مێژوویەكی دیكە لەو مانگەدا تۆمار كران، هەربۆیە مانگی ئازار بوو بە مانگێكی تایبەت بۆ خەڵكی كوردستان، بەجۆرێك زۆرترین بۆنەی خۆش و ناوخۆشی تێدا تۆمار كرا.
ئەوەی لێرەدا پێویستە ئاماژەی پێ بكەین، رێكخستنی پشووەكان و چۆنیەتی یادكردنەوەی ئەو رۆژانەیە لە هەرێمی كوردستاندا، بەتایبەتی لە مانگی ئازاردا، چونكە ئەوەی ئەمساڵ خەڵكی كوردستان بەتایبەتی شاری هەڵەبجەی نیگەران كرد، بڕیاری حكومەتی هەرێمی كوردستان بوو، كە 16ی ئازاری نەكرد بە پشووی رەسمی، لەكاتێكدا حكومەتی فیدڕاڵ ئەو رۆژەی كرد بە پشوو، هەرچەندە پاساوی حكومەتی هەرێم، لەبارەی بڕیاردان لەسەر پشووی ئەو رۆژە بۆ دەسەڵاتی پەرلەمان گەڕانەوە، بەڵام دەكرا وەك هەر بڕیارێكی دیكە ئەو رۆژە بكات بە پشوو.
لێرەدا هەرێمی كوردستان پێویستی بە رێكخستنەوەی تەواوی پشووەكانی ساڵ و چۆنیەتی یادكردنەوەیان هەیە، بۆئەمەش پێویستە هەڵسەنگاندێكی ورد بۆ ئەو بابەتە بكرێت و هەر بۆنەیەك لە ئاست گەورەیی و پیرۆزی ئەو رۆژەدا سەیر بكرێت، هەروەها رەچاوی پێكهاتە ئایینی و نەتەوەیی و مەزهەبییەكان بكرێت، تا هەموو خەڵكی كوردستان، ئەو بۆنە و یادانە بە هی خۆیان بزانن و ببێتە هۆی بەهێزكردنی بەیەكەوەژیان لە هەرێمی كوردستان.
