رەوەندی کوردستانی، یان کوردستانیانی تاراوگەنشین، کوردستانیانی دیاسپۆراشی پێدەڵێن، ئەمانە ئەو ئازیزانەن، کە لە نیشتمانی خۆیان جێلەق بوونە و روویان لە جوگرافیایەکی دیکە کردووە، بە مەبەستی ژیانکردن لە خاکێکی دیکەدا، لە ئەدەبیاتی دنیادا زاراوەی کۆچکردن بەکاردەهێنرێت، واتا لە زێد تاراون و ئەوێ دەکەن بە نیشتمانی دووەم.
گەشت و کۆچ، دوو هۆکارن لە یەک کایەدا، بەتاک و کۆ، پێناسەی کۆچکردن تەواودەکەن، کورد سەد ساڵ زیاترە ئاشنایە بە کۆچکردن و دوورکەوتنەوە لە کوردستان و زیاتریش رووی لە ئەوروپا کردووە، دوایش ئەمریکای هاتۆتەسەر، سەرەتا وەک تاک بە مەبەستی خوێندن و خوێندنی بەرز رووی لە دەرەوە کردووە، بەڵام دوای هەرەسی 1975، کودەتای میللیتاریی تورکیا، هێرشەکانی تاران بۆ سەر رۆژهەڵات دوای ساڵی 1981، پاشان شاڵاوەکانی ئەنفال و کۆڕەوی باشوورییەکان و شەڕی ناوخۆ، بەمدواییەش کوردی رۆژئاوا، مێژووی کۆچی تاک-ی، بۆ کۆچی بەکۆمەڵ گۆڕی.
بەهۆی ئاڵۆزیی کەیسەکان و نەبوونی دەوڵەت، ژمارەی کۆچبەری کورد لە تاراوگە نازانرێت، بەڵام بە هەر پێوەرێک ئەژمار بکرێت، ملیۆنێکی تێپەڕاندووە، کەواتە ناکرێت ئەو ژمارەیە فەرامۆش بکرێت!.
ئەمڕۆ دیفاکتۆیەک بۆ کورد لە کایەدایە، بەتایبەتیش لە باکوور و رۆژئاوا، خەریکە رۆژهەڵاتیش دێتەپێشەوە، باشووریش لەجووڵەدایە! ئەی کەواتە بۆچی میکانیزمێک ئامادەنەکرێت بۆ رێکخستن و جۆشدانی ئەو رەوەندە، بەرەو لۆبییەکی یەکگرتووی کوردستانی؟ بەمەرجێک سێبەری حزب لەسەر ئەو پێکهاتەیە کاڵ و کاڵتر بکرێتەوە، وەک دەزانرێت پێشتر رووداوگەلێک تاقیکراونەتەوە؛ هێرشی داگیرکاران بۆ سەر کوردستان و پڕۆتسۆکردنیان لە دەرەوە، هەڵەبجە، کۆڕەو، دەستگیرکردنی ئۆجەلان، لەشکرکێشیی تورکیا بۆ باشوور، هاتنی داعش، شەقامی دەرەوەیان جووڵاند، بەڵام نەتوانرا ئەو لۆبییە بخەمڵێنرێت، هۆکاری شکستەکەش پەلکێشکردنی ئەو کارتە گەرمە بووە بۆ ناو سەبەتەی حزب.
وێنەی ئاهەنگەکانی نەورۆزمان لە تاراوگە بینی، ئاماژەیەکی باش بوون، بۆ موراجەعەکردنی هێزی رەوەندی کوردستانی. تکایە با ئەو جۆشدانە لە ئۆرگانییەتی فرە حزبی، یاخود تاکحزبی لە قاڵب نەدەین، دەستپێکێکی درەوشاوە هاتۆتەپێشەوە بۆ دامەزراندنی یەکێتییەکی نەتەوەیی، تا لەو منداڵدانەدا لۆبییەکی کوردستانیی بەهێز لەدایک ببێت.
