خوێندنەوەیەکی ستراتیژی بۆ دیداری یەکێتی لە روانگەی خانەقینەوە

گوڵدانێک لە بەرەبەیانی نوێبوونەوەدا
لەم سەردەمەدا کە گۆڕانکارییەکان بەردەوامن، دیداری ساڵانەی یەکێتیی نیشتیمانیی کوردستان، دەبێتە رووناکییەک بۆ رێگای داهاتوو، ئەم دیدارە تەنها شوێنێک نییە بۆ هەڵسەنگاندنی کاری ئۆرگانەکانی حزب، بەڵکو بەشێکی گرنگیشە بۆ جێبەجێکردنی ئەو بڕیارانەی لە کۆنگرەدا دەدرێن.
ئەرکی سەرەکی ئەم دیدارە، داڕشتن و شیکردنەوەی ئەو هێڵە گشتییانەیە، کە وەک نەخشەڕێگایەک بۆ کاروانی سیاسی یەکێتی کار دەکەن، لە رێگەی ئەم دیدارەوە، هەموو بڕیارەکان دەگەنە دەستی سەرۆکی یەکێتی و مەکتەبی سیاسی و لە ناو راپۆرتێکی تەواودا، دواتر، مەکتەبی سیاسی لیژنەیەکی پسپۆڕ بۆ هەڵسەنگاندنی راپۆرتەکە دادەنێت و بڕیاری گونجاوی لە بارەوە دەدات.

خاڵە بەهێزەکان: گۆڕانکاری لە رەگەوە بۆ پەل و پۆ
1 - بەرنامەی ژیرانە بۆ داهاتوو: ئەم پڕۆسەیە وەک ئاوێنەیەک هەموو دیوەکانی ناو یەکێتی نیشان دەدات و دەرفەتێکی باشە بۆ ئەوەی حزب توانای خۆی بناسێت و بەرنامەی نوێ دابڕێژێت، وەک چۆن باخەوان چاودێری گوڵەکانی دەکات، یەکێتیش لە رێگەی ئەم دیدارەوە پێشنیازی هەموو ئەندامان وەردەگرێت و بە وردی دەیانخوێنێتەوە.
2 - نوێبوونەوەی بەردەوام: هەر ساڵێک، ئەو خاڵانەی کە کاریگەرییان کەمە یان سوودیان نییە بۆ پێشخستنی حزب، دەگۆڕدرێن، ئەمەش وەک بەهارێکی هەمیشەیی بۆ دارستانی یەکێتی وایە.
3 - دۆزینەوەی کەسە بەتواناکان: لەم پڕۆسەیەدا، کادرە بە تواناکان کە بیرۆکەی نوێیان هەیە، وەک گەوهەر دەدرەوشێنەوە و دەرفەتیان پێدەدرێت.
4 - پەروەردەکردنی سەرکردەی داهاتوو: یەکێک لە خاڵە باشەکانی ئەم پڕۆسەیە، کردنەوەی دەرگایە بۆ گەنجان تاکو هێزی نوێ بدەنە حزب و توانا و خەونەکانیان لە بواری سیاسەتدا بێننە دی.
5 - دامەزراندنی بوونیادی یاسایی: دیدار، کلیلی کردنەوەی دەرگای هەر بەشێکی حزبە، کە پێویستی بە دروستکردن یان نوێکردنەوە هەیە، بە شێوەیەک کە یاسایی و لە چوارچێوەی رێساکانی حزبدا بێت.

خاڵی مەترسییەکان - ئاستەنگەکانی‌ رێگا 
1 - گۆڕانکاری لە ناکاو: گۆڕانکاری زۆر گەورە و لە ناکاو رەنگە زیان بگەیەنێت، بۆیە پێویستە گۆڕانکارییەکان بە وردی و بە پێی پێویست بن.
2 - ترس لە گۆڕانکاری: هەندێک کادر لە گۆڕانکاری دەترسن و پێیانوایە، رەنگە ببێت بە هۆکاری لەدەستدانی پێگەیان، پێویستە کولتورێکی نوێ بۆ پێشوازی لە گۆڕانکاری دروست بکرێت.
3 - پێویستی بە لێکۆڵینەوەی ورد: هیچ بڕیارێک نابێت بەبێ لێکۆڵینەوەی قووڵ بدرێت، هەر بڕیارێک بدرێت پێویستە هەموو لایەنەکانی لەبەرچاو بگیرێت.
4 - چارەسەرکردنی کێشەکان بە خێرایی: کێشەکان وەک برین وان، ئەگەر زوو چارەسەر نەکرێن، خراپتر دەبن، لە دیداردا، دەبێت کێشەکان دەستنیشان بکرێن و بە خێرایی چارەسەر بکرێن.
5 - رێگرتن لە بە فیڕۆدانی کات: ئامادەکاری بۆ دیدار کە جار وایە دوو مانگ یان زیاتر دەخایەنێت، کاری ئاسایی ئۆرگانەکانی حزب پەک دەخات و کاریگەری خراپی هەیە.
 چرای رێنما - پێشنیازەکانی بەرەوپێشچوون
1 - خێراکردنی پڕۆسەکە: ئێمە لە سەردەمی خێراییدا دەژین، بۆیە پێویستە سیستەمێکی نوێ بۆ دیدارەکان دابنرێت، پێشنیاز دەکرێت دیدارەکان لەهەر مەڵبەندێک لە یەک رۆژدا بکرێن و پاشان بۆ سێ رۆژ راپۆرتەکان ئامادە بکرێن، دوای پێشکەشکردنی راپۆرتەکان، دوای دوو هەفتە دیداری گشتی بکرێت، ئەم سیستەمە هەم کات دەگەڕێنێتەوە و هەم لە رووی داراییەوە باشترە.
2 - گرنگیدان بە ناوچە دابڕاوەکان: لە سەرتاسەری پڕۆژەی دیداردا، پێویستە گرنگی تایبەت بە ناوچە دابڕاوەکان بدرێت، چونکە ئەم ناوچانە لەژێر هەڕەشەدان و پێویستیان بە گەشەپێدان و پشتگیری هەیە.

 ئەو پردەی خانەقین و یەکێتی پێکەوە دەبەستێت
خانەقین، ئەو شارەی کە لەسەر سنووری هەرێم و عیراقدا هەڵکەوتووە، وەک گوڵێکی جوان بەڵام بریندار وایە، کە پێویستی بە چاودێری هەیە، خەڵکی خانەقین و کادرانی یەکێتی لەم شارە، بە هیواوە چاوەڕێی دیدارەکانی یەکێتین، ئەم دیدارانە وەک دەروازەیەکن بۆ گەیشتنی ناوچە دابڕاوەکان بە مافەکانیان.
بۆ کردنی ئەم هیوایانە بە راستی، پێویستە لە رێگای مەڵبەندی یەکێتییەوە بوودجەیەکی تایبەت بۆ ئەم ناوچانە دابنرێت و گرنگی بە دروستکردنی بارەگا و پتەوکردنی رێکخستنەکان بدرێت، بەوەش خانەقین دەبێتە نموونەیەک بۆ نیشاندانی سەرکەوتنی یەکێتی لە ناوچە دابڕاوەکان.
پێویستە خانەقین گرنگی پێ بدرێت پێش ئەوەی وەک مەندەلی لێ بێت کە ئێستا کوردی تێدا نەماوە، ئێستا کە هەوڵ بۆ خانەقین هەیە، پێویستە یەکێتی بە بەرنامەیەکی باش بۆ ئاوەدانکردنەوەو زیادکردنی رێکخستنەکان کار بکات، بە پشتگیری سەرۆکی یەکێتی، کاک بافڵ، دەکرێت داهاتوویەکی روون بۆ خانەقین دروست بکرێت.
ئەم هیوایە لە دڵی هەر خانەقینییەکدا هەیە: گرنگیدانی زیاتر، چاودێری باشتر و یارمەتی زیاتر بۆ ئەم شارە.

 دەرئەنجام: پەڕەگرتنی گوڵی هیوا
دیداری یەکێتی وەک بارانی بەهارە، بۆ زەوی تینووی حزبایەتی، ئەم دیدارە دەرفەتێکی زێڕینە بۆ نوێبوونەوەی حزب و گەشەپێدانی تواناکانی، بۆ هەر کادرێک، ئەم دیدارە پەنجەرەیەکە بۆ گەیاندنی پێشنیاز و بیرەکانی بە سەرکردایەتی.
هەروەک چۆن دایک گرنگیی تایبەت بە منداڵی نەخۆش دەدات، یەکێتیش پێویستە گرنگیی تایبەت بە ناوچە دابڕاوەکان بدات، ئەم ناوچانە پێویستیان بە چاودێری و گرنگیدانی زیاترە.
بە هیوا و باوەڕەوە، چاوەڕێی سەرکەوتنی ئەم دیدارەدا دەکەین، با ئەم دیدارە ببێتە هەنگاوێک بۆ داهاتوویەکی رووناکتر و یەکگرتووتر!.

کۆنفرانسی پێنجەمی گەرمیان و خانەقینی دیداری دووەمی یەکێتی