دیداری سلێمانی، كە وەك نەریتێك ساڵانە لە زانكۆی ئەمەریكی لە سلێمانی بەڕێوەدەچێت و بەدیاریكراویش خولی ئەمساڵ، كە لەماوەی دوو رۆژدا بوو، بە بزاوتێکی فراوانی سیاسی و دیپلوماسیی و جارێكی تر پایتەختی رۆشنبیریی كردەوە بە چەتری کۆکردنەوەی بۆچوونە جیاوازە کوردستانی، عیراقی، ئیقلیمی و نێودەوڵەتییەكان، دیاردەیەكی دڵخۆشە بۆ هەموو لایەك.
ئەمجۆرە چالاكی و دیدارانە گرنگ و پڕ بایەخن، بەڵام هەرگیز بەبێ خەوش و كەموكوڕی نابن، بۆیە لە خولی ئەمساڵی دیدارەكە، ئەگەر پێشتر کارنامەی بەر دیدەم بکەوتایە و دەنگم بەئەندامانی لیژنەی ئامادەکار گەیشتبا، ئەوا بێ دوودڵی وەک چاودێرێک دوو پێشنیارم دەخستە بەردەمیان:
یەکەم : سەبارەت بە رەچاوکردنی واقیعی ئێستای سیاسی و ئیداریی هەرێمی کوردستان و هاوسەنگی و باڵانسی هێز، پێشنیارم دەکرد لەسەر بنەمای ئەو واقیعە رەچاوی هاوسەنگی بكەن و دەرفەتێک بڕەخسێنن تاوەکو بەرپرسێکی حكومی یان سیاسی ئەم زۆن و ئیدارە خانەخوێیەش پەیامی هەبێت و دید و دیدگای خۆیان بگەیەنن بە ئامادەبوان و رای گشتی کوردستانی و عیراقی و جیهانی، چونکە جۆرەها پرسیاری راست و ناڕاست و دروستکراو لەسەر مژارە سیاسی و ئەمنی و ئیداری و بوارە جۆرا و جۆرەکانی دیکە لە سلێمانی دەکرێن، بەتایبەتی لە حزبی دەسەڵاتداری دەڤەرەکە، راستییەكەشی هەندێك لەوانە پرسیاری گرنگ و هەستیارن و چاوەڕوان دەکرا لە دیدارەکەدا وەڵام بدرێنەوە، وەلێ دیدارەکە کۆتایی هات و پرسیارەکانیش بێ وەڵام ماونەتەوە.
دووەم: پێشنیارم دەکرد پارێزگاری کەرکوک لە دیداری سلێمانی دەرفەتێکی بۆ بڕەخسێت، کە لەسەر دۆخی کەرکوک پەیامی خۆی بگەیەنێت و ئەویش وەڵامی پرسیارە هەمەجۆرەکانی ناوخۆی کەرکوک و هەولێر و بەغداو دەوروبەر بداتەوە، چونکە کەرکوک بۆ هەموو پێکهاتەکانی عیراق و وڵاتانی ئیقلیمی زۆر گرنگە و چاوی جیهانیشی لەسەرە و یەکێکە لەپرسە گرنگەکان.
ئەم دوو پێشنیار و داخوازییە شتێك نییە تەنها بۆ راگرتنی هاوسەنگی بێت، بەڵكو بۆ ئەوە گرنگە كە دەرەنجامی دیدارێكی لەمجۆرە، ئەگەر كۆبەندی بیركردنەوە و هەڵوێست و دیدگای هەموو لایەنەكان و پرسە هەنۆکەییەکانی هەموو دەڤەر و پنتە گرنگەکانی ناوچەکە لەخۆی نەگرێت و فیگەر و كارەكتەرە سەرەكییە سیاسی و كارگێڕییەكانی زۆنی خانەخوێی تێدا نەبێت بەتایبەت هێزێكی وەك یەكێتی كە خۆی ژینگەی دیدار و چالاكیەكانی سلێمانی سازاندووە، بەدڵنیاییەوە کەسانێک هەن بەو دیدە سەیری دیدارەکە دەکەن کە راستە گرنگ و مفاداربوو بەڵام کەموکوڕیێکی پێوەدیاربوو.
