براوەی نۆبڵی ساڵی 1923
ولیەم پیتەر یتس -ی شاعیر لە ساڵی 1865 لە گوندی ساندیماونت لە ناوچەی دیبلن لە ئێرلەندا لەدایک بووە، باوکی هونەرمەندبووە، کاتێک تەمەنی بۆتە دوو ساڵان خێزانەکەی هەواریان بۆ شاری لەندەن گواستۆتەوە. هەرلەوێ چۆتە بەرخوێندن و دواتر بۆ تەواوکردنی دواناوەندیی گەڕاوەتەوە بۆ ئێرلەندا و چۆتە کۆلێژی هونەر بۆ ماوەی دوو ساڵ. زۆربەی ساڵەکانی ژیانی لە نێوان دیبلن و لەندەندا بەسەر بردووە. دۆستایەتی لەگەڵ زۆرێک لە ئەدیبە ناودارەکان پەیداکردووە، لەوانە(جۆرج بەرناردشۆ و ئۆسکارد وایڵد). یتس، بە ناودارترین شاعیری زمانی ئینگلیزیی دادەنرێت لە سەدەی بیستەمدا. کاریگەرییەکی زۆری لەسەر شیعر و شانۆ هەبووە و جێ پەنجەی لەو بوارانەدا دیارە. لە شیعردا بەوە ناسراوە کە هێماو فەلسەفە رەنگیداوەتەوە تیایاندا. لە ساڵی 1939 لە فەرەنسا کۆچی دوایی کردووە و هەر لەوێش بەخاکسپێردراوە، دواتر لەسەر وەسیێتی خۆی لە ساڵی 1948 تەرمەکەی براوەتەوە بۆ ئێرلەندا و لەوێ بۆ دواجار ئەسپاردەی خاک کراوە.
ساڵی 1923 خەڵاتی نۆبڵی پێ بەخشرا، لەپای شیعری ئیلهام بەخشیدا کە هەڵگری خەسڵەتی هونەریی باڵایە و ئاوێنە نمای گیانی سەراپای میللەتەکەیەتی.
کاتێک دادەڕوخێیت
کاتێک پیردەبیت و سەرت سپی دەبێت و خەودەتباتەوە،
سەرت لار دەبێتەوە، پێڵوەکانت دادەخرێن،
کاتێک لەسەر کورسییەکە، بەرامبەر سۆپاکە دادەنیشیی،
ئەم کێێبە لە رەفەی کتێبخانەکە دەر بهێنە و
بە هێمنی دەست بەخوێندنەوەی بکە.
خەون بەو رۆژانەوە ببینەرەوە، کە چاوەکانت جوانییەکی نەرمیان هەبوو.
سێبەرێکی بێ ئەندازە قووڵیان تیادا دەبینرا .
کەم نەبوون ئەوانەی بەو جوانییە سەرسام بوون و رامکران .
شەیدای جوانییەکەت بوون، جا بە راستی یان بە درۆوە
وەلێ تەنها پیاوێک هەبوو، ئەو گیانە کۆچەرییەتی خۆشدەویست
هەروەها خەمی رووخسارتی خۆشدەویست کە رۆژگار زەفەری پێ نەبردبوو.
کاتێکیش لەلای دەسکی زۆپا گەرمەکەوە دەچەمیتەوە
بەچرپە شتێک بدرکێنە:
چۆن خۆشەویستی هەڵهات و
هەنگاوەکانی خێرا کرد، بەرەو چیاکانی دەوروبەر،
رووخساریشی لەنێوان ئەستێرەگەلێکدا ونکرد؟
وەرگێڕانی لە عەرەبییەوە:
ئاوات حەسەن ئەمین
سەرچاوە:قصائد من شعراء جائزه نوبل
إختارها وترجمها د. شهاب غانم، مارس 2009
