تەها عەبدوڵڵا
بێگەرد تاڵەبانی وەزیری كشتوكاڵ لە لێدوانێكدا بە كوردستانی نوێ-ی، راگەیاند: سەردانێكی سەركەوتوومان بۆ ئیسپانیا كرد و هەماهەنگیش كراوە بۆ پەرەپێدانی كەرتی كشتوكاڵ لە چەندین رووەوە.
بەئامانجی سوودوەرگرتن لە ئەزموونی وڵاتانی ئەوروپی و هەماهەنگی نێوان كەرتی كشتوكاڵی هەرێم و وڵاتە پێشكەوتووەكان، وەزیری كشتوكاڵ و سەرچاوەكانی ئاو و وەفدێك لە وەبەرهێنەران و كۆمپانیاكانی كەرتی كشتوكاڵ، بە رەسمی بانگهێشتی ئیسپانیا كران.
سەبارەت بە ئامانجی سەردانەكەیان، بێگەرد تاڵەبانی، ئەوەی خستەڕوو كە لەو وڵاتە بەشدارییان كردووە لە پێشانگەیەكی نێودەوڵەتیی وەبەرهێنانی كشتوكاڵی و زنجیرەیەك دیدار و سەردانی مەیدانییان بۆ رێكخراوە بۆ دەزگا و دامەزراوە كشتوكاڵییەكان و بەشێوەیەكی گشتیش ئاشناكراون بە ئەزموونی پێشكەوتوویان و پێشخستنی سێكتەری كشتوكاڵ و هەماهەنگیش بۆ رەخساندنی دەرفەتەكانی سەرمایەگوزاری و ئاشنایەتی نێوان وەبەرهێنەران و خاوەن پرۆژەكانی هەرێم و ئەو وڵاتە، كراوە.
وەزیری كشتوكاڵ، وتیشی: لە دیدارەكانماندا پرۆژەكانی هاریكاری، داهێنانی كشتوكاڵی، كەرتی خۆراكی كشتوكاڵی، ئاو و وزەی نوێبووەوە، ئاژەڵداری، سامانی ماسی و راهێنانی كشتوكاڵی، تاوتوێكراون و بڕیاریشدرا تیمێكی هاوبەش پێكبهێنرێت بۆ پەرەپێدانی كەرتی كشتوكاڵ و بازرگانیی نێوان هەرێم و هەرێمی مورسیا لە ئیسپانیا.
