رێزان جەعفەر
ل بەرانبەر قودیکێ ل سەر چۆکێن خو روینشت بووم، گەلەک ڤەدلەرزیم. هێشتا کێر د دەستێن من دا بوو، لەشێ من و جلکێن من ژ خوهـ و خوینا وی سۆر و شل ببوون. دەنگێ ترۆمبێلا پولیسان گەهشتە گوهێن من. کەنیا من، خوینا ل سەر دێمێ من دەرز دەرز کر. پولیسان دەستێن من كەلامچەكرن و برمە بنگەهی و هێشتا ئەزا دکەمە کەنی و جار د کەمە گری، جار هەواریان رادهێلم و جار تلیلیان ڤەددەم. ڤەکولەر ل بەرانبەر من روینشت.
-ئاڤەکێ ڤەخو و گەر تە بڤێت، دێ تە بەین داخو پاقژ بکەی، پاشان دێ ئاخڤین؟ من ل جلکێن خو نێری و بهێن کرە خوو، من ب کەنیڤە گوت: بەس خوینا وی گەلەک یا پاقژە و بێهنەکا خوش یا ژمن دهێت. ڤەکولەری ب تورەی سەحکرە من و گوت: باشە دێ هوسا بەردەوام بین؟
- ما ئەم راوستییا بوین دا بەردەوام بین! چاڤێن خو یێن تژی کەرب دانانە سەر من.
- تە ئەو کوشتییە؟
- ئەرێ من کوشت، ب دەستێن خوو.
- بوچی تە کوشت؟
- چونکی یێ نەفرەتی بوو، دەنگێ وی و دێمێ وی ئەز د ترساندم و من ژ نەفرەتکرنا وی ئەو ئازاد کر.
- بەسە بەس، نەفرەتکرنا چ ئازاد کرنا چ؟ ئەز دبێژم تو پێدڤی هندەک لێدانێی دا بهێیە سەر هشێن خوو.
من کرە کەنی و من گوت: ژ تە هشیارترم بەرێز
ب تورەیڤە جارەکا دی گوتە من: باشە بەسە، تە چەوا کوشت؟!
-من دەرمانێن خەوێ کرنە ناڤ شەربەتا وی و من ب چار لێدانێن کێرێ ئەو کوشت، ژبەر وان چار سالێن نەفرەتی یێن کو من دگەل نەخوشەکێ وەکی وی بوراندین.
-بەلێ ئەو دەرمان د قەدەغەکری نە، تە چەوا ب دەست خوڤە ئینان؟
- نوژدارێ منێ دەروونی بۆ من د نڤیسان.
-تە بوچی ئەڤ رێکە بۆ کوشتنا وی هەلبژارت؟
-چونکی ئێکانە رێک بوو من ھزركری، دگەل لێدانا هەر کێرەکێ دێ ئەو نەفرەتە ژ لەشێ وی دەرکەڤن.
-بەس ئەو هەڤژینێ تەبوو، چەوا تە شییا وەبکەی؟
-من ئازاد کر ئازااد.. من خۆشیەکا مەزن دیت دەمێ من ب وان لێدانا ژ نەفرەتکرنا وی دوماهیک دئینا.
ڤەکولەری هەردو دەستێن خو ب سەرێ خوڤە گڤاشتن و چاڤێن وی، هند نەما بوو ژ سەرێ وی دەرکەڤن. گازی پولیسان کر و گوتێ: وەرن ئەڤێ ببەن.
ل بەر دەرگەهی ل ڤەکولەری زڤریم و بکەنیەکا پر ژ گریێ من گوت: نەکەڤە دناڤ چ پەیوەندیێن ژەهرکریدا، دا تو ژی بەر نەفرەت و ئاریشێن دەروونی نە کەڤی.
