كاروان عومەر
لەكاتی خۆگۆڕینی دا، بە بزەیەكەوە پێی وت: زۆر پیر بوویت، دیارە تووڕەبوون و رووخسارە گرژ و مۆنەكەی لە خۆیدا بینی، بۆیە نەیهێشت وەڵام بداتەوە و هیچ بڵێت.
وتی: چەند شەوێكە تەواوی سەرنجەكانم لەسەر تۆیە، ئاگاداری جووڵە و پرخە پرخەكانی تۆم، تەنانەت هەستانی چەند جارەیشت بۆ میزكردن، هەتا ئەو (با)یانەیش كە لەخەودا لێت بەردەبنەوە، ئاگاداریانم، هەندێك لەوانە بۆنێكی زۆر ناخۆشیان هەبوو، نازانم هۆكارەكەی ئەوە بوو خەوی ناخۆشت دەبینی، یان خۆراكی ناخۆشت خواردبوو. ئەگەر قاچم هەبووایە دەڕۆیشتم و ژوورەكەتم بەجێدەهێشت. تۆ بەهۆی گرانبوونی گوێچكەكانتەوە، شت گەلێك لە ژوورەكەتدا دەوترێن و باس دەكرێن، نایانبیستی. هەر وەك چۆن بەهۆی كزبوونی چاوەكانتەوە ئەو تاڵە رەق و سپییانە نابینی كە وەك قەوزەی قەراخی ئەستێڵ رووتووشی كونی گوێ و قەراخەكانیان کردووە.
بوەستە جارێ، قسەكانم تەواو نەكردووە، هەر دوێنێ بوو گوێم لێ بوو قایشی پانتۆڵەكەت دەردە دڵی لەگەڵ پانتۆڵە رەشەكەت دەكرد و دەیوت: هەر ئەوەندە دەزانم خۆم لەبەردەم نووكی چەقۆیەكی كولدا دەبینمەوە. سەیر كە چۆن هەموو گیانی كون كون كردووم، وا خەریكە دەگاتە سەر قورگم.
پانتۆڵ وتی: خەمت نەبێ منیش هێندەی تۆ كونم تێدایە، كاتێك جگەرەیەك دادەگیرسێنێت تا دوا نەفەسی تەواو دەبێ وەك خۆیان دەڵێن سەد كفن زەرد دەكەم، ترسی سووتان و ئازارەكەشی لەولاوە بوەستێ. لەمانەش خراپتر پاشماوەی ئەو میزەیە كە پێمدا دەكات، خەریكە دەمخنكێنێ. لەوكاتەدا كە گوێم لە دەردە دڵەكەیان بوو، چاكەتە قاوەییەكەی قسەكانی بەوان بڕی و خۆی خستە ناو باسەكەیانەوە، ئەی بۆ پەڕۆیەك لە من دانادڕن؟
ئەم پیرە پیاوە لەرزۆكە، نازانم چی منی چووە بە دڵدا وا هەر من لەبەر دەكات، نە لە سەرما دەیپارێزم و نە گەرمییەكی ئەوتۆی پێدەبەخشم، نە ئەوەندەش گرانبەهام هەتا نەمفەوتێنێ. بۆ نەگبەتیم چەند جارێكیش لەملاو لەولا بەجێیهێشتووم، كەچی رێك گەڕاندوویانمەتەوە بۆ لای. ئێوە نابینن كاتێك لەبەرم دەكات چەند ناشیرین دەوەستم؟ رێك شانەكانم دەكەونە سەر ئانیشكەكانی. هۆهۆ پیرێ، بانگت دەكەن، بڕۆ بزانە كێیە؟ تەنها شتێك لە هەموویان كۆنتر بوو، كاتژمێرەكەی دەستی بوو، كە مێژووەكەی دەگەڕێتەوە بۆ رۆژی هاوسەرگیرییەكەی. كاتژمێرەكە هاواری بەسەریاندا كرد و وتی: بەسە ئیتر، بەس تانە و توانجی لێبدەن، تەنها من دەزانم رۆژەكانی تەمەنی چۆن تێپەڕاندووە؟
من چركە بە چركەی كاتەكانم بۆ دەژمارد، ئەو كاتانەی كۆڵان بە كۆڵان دەگەڕا تا پاشماوەی ماڵەكان كۆبكاتەوە، بەس من دەزانم هەموو ساتەكانی گەنجی و جوانیی خۆی چۆن لەگەڵ تەنەكەی خۆڵ و پاشماوەكاندا بەسەر دەبرد. تەنها منی لەگەڵ بووم ئەو شەوانەی تا رۆژ دەبۆوە، چۆن بیری لای پارووە نانێك بوو بۆ جگەرگۆشەكانی.
من دەنگی منداڵەكانی دەناسمەوە، تەنانەت ئاشنام بە دەنگی دراوسێكانیشی، ئەی ئەم دەنگە غەریبە ترسناكە كێیە و چی لێ دەوێ؟ لە شێوەی منداڵێكی تازە پێگرتوو ئاوێنەكەی بەجێهێشت و بەرەو دەنگەكان هەنگاوی نا، تا ژوورەكەی چووە دەرەوە. ئیتر بۆ هەمیشە نەگەڕایەوە.
ئێستا کەس نازانێت كاتژمێرەكە لە دەستی كێ دایە؟!
