ئا: ژوان باقی
ناونیشانی ئەم تابلۆیە "ماڵئاوا باوکە"یە و لەلایەن هونەرمەندی هۆڵەندی(بێرنارد بلومەرس) کێشراوە. مێژووەکەی دەگەڕێتەوە بۆ کۆتایی سەدەی نۆزدەهەم و ساڵی 1885، دیمەنێکی ژیانی رۆژانەی هۆڵەندا لەو سەردەمەدا نیشان دەدات. لەلایەکی دیکەوە هەڵگری رەهەندێکی قووڵە، وەك دەبینین لە ناوەڕاستی تابلۆکەدا ژنێك لەسەر کەناری دەریا وەستاوە، منداڵەکەی بەرز دەکاتەوە بۆ ئەوەی ماڵئاوایی لە باوکی بکات کە بە کەشتیی بۆ گەشتێك دەڕوات. لە تەنیشتییەوە کچێکی بچووك بە کراسەکەیەوە دەنووسێت، بە خەم و خولیاوە سەیری ئاسۆی پڕ لە شەپۆلی تێکشکاوی دەریا دەکات.
وردەکارییەکانی تابلۆکە هەستیارن، لە جوڵەی منداڵەکەوە کە کڵاوەکەی بە پەرۆشییەوە رادەوەشێنێت بۆ ماڵئاوایی، تا سیمای دایکێك کە هێز و خەم تێکەڵ دەکات. دەریای ئەودیو، بە درێژبوونەوەی بێ کۆتایی، رەنگدانەوەی هەستی جیابوونەوە و نامۆبوون لە کاتێکدا دوورکەوتنەوەی کەشتییەکە ئاماژەیە بۆ سەختیی ژیان کە پێویستیی بە جیابوونەوەیە. ماڵئاواییەکان و جیابوونەوەکان چەند بەئازاربن، زۆرجار ژیان ئەوەمان لێ دەخوازێت، دەرئەنجام هەرچییەك بێت لەو کاتانەدا ئەوە چارەنووسمانە. لەم تابلۆیەدا هونەرمەند(بێرنارد بلومەرس) دەریدەخات سەرەڕای ئەوەی چەند گەورەبین یاخود منداڵ بین لە هەر تەمەنێکدا بین، ئێمە پێویستمان بە دایكمان و باوکمانە، بەڵام ئایا ئەمە بۆ هەموومان وەکو یەك دەگونجێت؟ بێگومان نەخێر، بارودۆخەکان دێن و بەتەنها دەمانهێڵنەوە، ئەوەی گرنگە هەنگاوەکانی خۆمانە.
