محەمەد كوردۆ
ئایا دەتوانیت پێم بڵێیت
ئەوە چۆنچۆنییە
كە تۆ لە یەك كاتدا
مرۆڤیشیت و (زەری)شی؟
دەتوانیت فێرم بكەیت
مرۆڤ چۆن بۆی دەكرێت لە یەك كاتدا
وەك ئەڵقەیەكی ترساو
بچێتە پەنجەی خۆشەویستەكەیەوە و
هەر هەمان كات
وەك دوو دەستی تینوو،
خۆی بئاڵێنێتە كەمەریشی؟
دەتوانیت فێرم بكەیت
چۆن دەكرێت لە یەك كاتدا
مرۆڤ بۆ خۆشەویستەكەی
پەنجەرەیەكی كراوە بێت بە ڕووی دنیادا و
تا ئاستی شێتییش غیرەی لێ بكات و
ببیتە لەمپەریشی؟
ئایا دەتوانیت پێم بڵێیت
ئەو كاتانەی هەست دەكەم
كەوتوومەتە ناو ئاوێكەوە
كە هەر جارەی بە لایەكدا شەپۆل دەدات،
تۆ چۆنچۆنی
هەم لەوبەری ئاوەكەیت و
هەم لەمبەریشی؟
ئایا دواجار
دەتوانیت فێرم بكەیت
چۆن دەكرێت لە یەك كاتدا
مرۆڤ لە یەك كەس زیاتر بێت؟
چۆن دەكرێت
لەوسەری دنیاش بێت و لەمسەریشی؟
*زەری، واتە پەریی دەریا
