كوردستانی نوێ/هەولێر
ئاڤان فارس جاف، ناوێكی دیاری بواری رۆژنامەوانی و كاری رێكخراوەییە و نیشتەجێی شاری هەولێرە، ئەزموونی بیست ساڵەی لەو دوو بوارەدا هەیە، جگە لەوەی مامۆستای زانكۆیە، لێپرسراوی پەیوەندییەكانە لە رێكخراوی(ئێمە بۆ گەشەپێدانی مرۆیی).
لەبارەی سەرەتای کارەکەیەوە بە کوردستانی نوێی راگەیاند: كاركردنم لە بواری رۆژنامەنووسیدا، دەرئەنجامی خوێندنەوە و ئاشناییم بە كاری رێكخراوەیی و نزیكیم بوو لە راگەیاندن، لە تەمەنێكی بچووكدا، گوێگرێكی باشی رادیۆ بووم، خوێنەرێكی بەردەوامی رۆژنامە و گۆڤارەكان بووم، زۆر بەوردی وتار و هەواڵ و راپۆرتەكانم دەخوێندەوە، ئەم هۆكارانە هاوكار بوون خۆم لە بواری رۆژنامەنووسی ببینمەوە.
لەبارەی رێژەی رۆژنامەنووسی ژن لەهەولێر وتی: لە رووی چەندایەتییەوە رێژەی ژن لە ئاستێكی باشدایە، بەڵام لە رووی چۆنایەتییەوە، لە ئاست چاوەڕوانی ئێمەدا نییە، بیریشمان نەچێت كاركردن لە بواری رۆژنامەوانی هەروا ئاسان نییە، بەربەست و كێشە و ئاڵنگاریی زۆری هەیە، لەگەڵ ئەوەشدا رۆژنامەنووسی زۆر بە توانا و لێهاتوو لە هەولێر هەن و بەردەوامن.
وتیشی: زۆربوونی دەزگا و دامەزراوەی راگەیاندن پایەیەكی بەرزی دیموكراسییە، وای دەبینم گەشبینانە بڕوانینە دۆخەكە، لە كوردستاندا بەگشتی رۆژنامەنووسی هێشتا نەبۆتە كەلتور، لەگەڵ ئەوەشدا هەولێر ناوەندیی رووداو و پێشهاتەكانە، بۆیە رەنگە بەربەست و رێگریی و رووداوی زیاتر هەبێت لە هەولێر، بەڵام فراوانی زیادبوونەكە كاریگەریی گەورەی نەكردۆتە سەر كاركردنی پیشەییانە.
لەبارەی کاریگەریی کاری رۆژنامەنووسی وتی: رۆژنامەنووسیی بوێرتری كردم، كاری رێكخراوەیی بەرچاوروونتر و بەرپرسیارێتی و دڵسۆزیی فێر كردم، رۆژنامەوانی لە ناو دەسەڵاتی چوارەمدایە، كاری رێكخراوەیی، دەسەڵاتی پێنجەمە، كەواتە هەردووكیان كاریگەریی گەورە و گۆڕان دروست دەكەن، بۆیە بەردەوامم.
