ئا: هێدی گەڵاڵی
دوانزە ساڵە خاوەن زەوییەكانی كەمپی كەورگۆسك، داوای قەرەبووكردنەوەی زەوییەكانیان لە پارێزگای هەولێر و بەڕێوەبەرایەتی گشتی شارەوانییەكانی دەوروبەر دەکەن، بەهۆی ئەوەی زەوییەكانیان بۆ نیشتەجێبوونی پەنابەرانی كوردانی رۆژئاوا و دروستكردنی كەمپ تەرخانكراوە، بەڵام لایەنی پەیوەندییدار، داواكانی خاوەن زەویەكانیان پشتگوێخستووە و تا ئێستاش قەرەبوویان نەكردوونەتەوە.
پارێزگای هەولێر بیانووی جۆراوجۆر دەهێننەوە و هەرجارە و بابەتەكە دەخەنە ئەستۆی لایەنێك، بۆئەوەی قەرەبووی خاوەن موڵكەكان نەكەنەوە
تاریق مستەفا، بەنوێنەرایەتی خاوەن زەوییەكان دەڵێت: لە ساڵی 2011دا زیاتر لە 10هەزار دۆلارم بەو زەوییە داوە، كە ئێستا لەلایەن پارێزگا و بەڕێوەبەرایەتی گشتیی شارەوانییەكانی دەوروبەر، داگیركراوە. دەشڵێت: چەندینجار داواكارییم ئاڕاستەی بەڕێوەبەری ناحیە و شارەوانییەكانی دەوروبەر و پارێزگای هەولێر كردووە، بۆئەوەی قەرەبووم بكەنەوە، بەڵام داواكانم پشتگوێخراوە.
هەر لەوبارەیەوە ئەو هاووڵاتییە رایدەگەیەنێت: هەموو ئەو موڵكانەی بەر كەمپی كەورگۆسك كەوتووە 300 موڵکە و قەرەبوومان ناكەنەوە، ناچار ساڵی 2020 سكاڵای یاساییمان لەسەر پارێزگاری هەولێر تۆمار كرد، كەچی تا ئێستا پارێزگاری هەولێر بەدەم كێشەكەمانەوە نەچووە و چارەسەر نەكراوە.
روونیشیكردەوە: پارێزگای هەولێر بیانووی جۆراوجۆر دەهێننەوە و هەرجارە و بابەتەكە دەخەنە ئەستۆی لایەنێك، بۆئەوەی قەرەبووی خاوەن موڵكەكان نەكەنەوە.
