ئا: هێدی گەڵاڵی
ئەحمەد محەمەد حەمەدەمین بابە خەلیفە، نازناوی شیعریی (ئەحمەد چاوشین)ە، یەكێكە لەو شاعیرە جواننووس و فۆلكلۆردۆستانەی كە دەیان و سەدان شیعری حەیرانیی نوسیووە و لەلایەن حەیرانبێژانی كوردستانەوە وەك حەیران و بەستە وتراوەتەوە.
ئەو جگە لە نووسینی شیعر و پەخشانی تایبەت بە حەیران و بەستە، وەك شاعیرێكی نوێخوازیش سەدان شیعریی جۆراوجۆری لە بوارەكانی سیاسیی و كۆمەڵایەتیی و ئایینی و لە بواری منداڵانیشدا دەنووسێت و بەرهەمی چاپكراویشی هەیە.
ئەحمەد چاوشین، لەبارەی ئەزموونی شیعری حەیران بۆ كوردستانی نوێ وتی: حەیران پەخشانە شیعرە و جیاوازە لەگەڵ جۆرەكانی تری شیعر، بەشی زۆری لەسێ بەند پێكدێ، سەر بەند و ناو بەند و دوا بەند، بۆیە دانانی شیعری حەیران قورسە و دەبێ چیرۆك ئامێز بێت و پێشینەییەكی كەلتوریت هەبێت، بۆئەوەی تێكستێك یان شیعرێكی حەیران بنووسیت.
وتیشی: نووسینی شیعری بواری حەیران و بەستە، چەند مەرجێكی تێدایە، لەوانە:(دەق و وشەكان) فۆلكلۆری بن و شارەزاییەكی باشت هەبێت لە جل و كەلوپەلی جاران و بەكارهێنانی لە شوێنی خۆی، وەك كراسی بەرباغەر و قەزمە و هیزار و گۆبەرە و خەناوكە.....هتد، واتا چەندین كەرەستەی فۆلكلۆری كوردەواریت هەبێت .
ئەو شاعیرە باسی لەوەشكرد: دەبێت شاعیر یا نووسەرانی بواری شیعری حەیران، شارەزا بن لە نەخشەی جوگرافیای ناوچە و شوێنەكان، بە ڕیزبەندیی ناویان بهێنی، خۆناكرێت لە سەفینێ راوێ بكەی و لەقەراج و كەندێناوە لە عاردی بدەی، بۆیە شارەزایی دەوێ، بەتایبەتی ئەو شوێنەی حەیرانەكەی تێدا هەڵدەستێنی، دەبێت بەدوای وشەی فۆلكلۆریدا بگەڕێی، وەك شیعری ئاسایی نییە.
هەروەها دەڵێت: نامیلكەیەكم لە شیعری حەیران و بەستە ئامادەكردووەو بەم نزیكانە بە چاپی دەگەیەنم. جگە لە شیعری بواری حەیران و بەستە، شیعری سیاسیی و كۆمەڵایەتیی و ئایینی و شیعری منداڵانیش دەنووسم، دوو نامیلكەم لە شیعری منداڵان بە چاپ گەیاندووە.
