هونه‌ر به گشتی و هونه‌ری نیگاركێشی له باكووری كوردستان به‌تایبه‌تی ته‌نیا بۆ جوانی نییه، به‌ڵكو ئامرازێكی گرنگه بۆ ده‌ربڕین و گه‌یاندنی په‌یام و هه‌ستی
نه‌ته‌وه‌یی
رۆكه‌ن خانمه نیگاركێشێكی خه‌ڵكی شاری باتمانی باكووری كوردستانه، ساڵانێكی زۆره له شاره‌كه‌ی خۆی سه‌رقالی هونه‌ری نیگاركێشییه و لایه‌نگرێكی زۆری هه‌یه، چونكه هونه‌ری نیگاركێشی له باكووری كوردستان زۆر گرنگی پێده‌درێت، به‌تایبه‌ت بۆ پاراستنی مێژوو و كه‌لتور و زمان و ناسنامه‌ی كوردی.
هونه‌ر به گشتی و هونه‌ری نیگاركێشی له باكووری كوردستان به‌تایبه‌تی ته‌نیا بۆ جوانی نییه، به‌ڵكو ئامرازێكی گرنگه بۆ ده‌ربڕین و گه‌یاندنی په‌یام و هه‌ستی نه‌ته‌وه‌یی.
رۆكه‌ن ئێكینجی، نیگاركێش و په‌یكه‌رسازی خه‌ڵكی شاری باتمانی باكووری كوردستان، به كوردستانی نوێی راگه‌یاند: چه‌ند ساڵێكه له بواری نیگاركێشیدا كار ده‌كه‌م و ناوه‌ڕۆكی زۆربه‌ی تابلۆكانم گوزارشت له ناسنامه‌ی نه‌ته‌وه‌یی كوردی ده‌كات. هه‌روه‌ها ئه‌و رووداوانه‌ی كه به‌درێژایی مێژوو له كوردستان و میزۆپۆتامیا روویانداوه، كاتێك ناتوانم به ئازادانه ئازاری میلله‌ته‌كه‌م ده‌رببڕم، له رێگه‌ی نیگاركێشییه‌وه ده‌ریده‌بڕم كه ئه‌مه به‌شێكه له خه‌باتی مروڤایه‌تی و نه‌ته‌وه‌یی و كوردایه‌تیم.
وتیشی: هه‌روه‌ها باس له مێژووی ئازاره‌كانی كچان و ژنانی كورد ده‌كه‌م و له هونه‌ری نیگاركێشیدا نیشانی ده‌ده‌م، له تابلۆكانمدا په‌یامێكی جیاواز به بینه‌ران نیشان ده‌ده‌م، تا ئێستا زیاتر له200 تابلۆم كێشاوه و چه‌ندین وێنه‌ی ره‌نگاوڕه‌نگ له‌سه‌ر دیواره‌كانی سه‌نته‌ری پارێزگای باتمان كێشراون. هه‌روه‌ها حه‌ز و خولیایه‌كی گه‌وره‌م بۆ هونه‌ری نیگاركێشی هه‌یه، چونكه هونه‌ر كاریگه‌ریی خۆی هه‌یه بۆ پاراستنی زمان و ناسنامه‌ی كوردی و نه‌ریتی كۆمه‌ڵایه‌تی و كورده‌واری به‌گشتی.
هه‌روه‌ها ده‌ڵێت: ماوه‌ی15 ساڵه له شاره‌وانی باتمان وانه‌ی په‌روه‌رده‌ی هونه‌ری داوه و خزمه‌تێكی زۆرم به هاووڵاتیان كردووه، به‌ڵام دوای دانانی قه‌ییوم، ئێستا بێكارم و له ره‌وشێكی خراپی ئابوورییدا ده‌ژیم. هه‌روه‌ها پێویسته توانای هونه‌ری و مێژوویی و كه‌لتوری خۆمان په‌ره پێبده‌ین. چونكه مێژوو به هونه‌ر ناسراوه و ده‌بێت مێژووی خۆمان بپارێزین، هونه‌ر به گشتی و هونه‌ری نیگاركێشی له باكووری كوردستان به‌تایبه‌تی ته‌نیا بۆ جوانی نییه، به‌ڵكو ئامرازێكی گرنگه بۆ ده‌ربڕین و گه‌یاندنی په‌یام و هه‌ستی نه‌ته‌وه‌یی.
شایه‌نی باسه رۆكه‌ن ئێكینجی شێوه‌كارێكی كوردی خه‌ڵكی پارێزگای باتمانه له باكووری كوردستان، به كاره هونه‌ری و نیگاركێشی و په‌یكه‌رسازی ناسراوه، له زۆرێك له پێشانگه و بۆنه هونه‌رییه‌كان به‌شداریی كردووه، هه‌روه‌ها نموونه‌یه‌كی سه‌ركه‌وتوو و به‌توانایه له بواری نیگاركێشیدا، هونه‌ری نیگاركێشی له باكووری كوردستان رۆڵی سه‌ره‌كی له پاراستن و به‌هێزكردنی زمان و شوناس و نه‌ریتی كوردیدا هه‌یه، به تایبه‌ت له ناوچه‌یه‌كدا كه زمانی كوردی به‌رده‌وام رووبه‌ڕووی ئاسته‌نگ ده‌بێته‌وه.
هونه‌ری نیگاركێشی بریتییه له دروستكردنی وێنه و به‌كارهێنانی كه‌لتوره ره‌نگاوڕه‌نگه جیاوازه‌كان به شێوه‌یه‌كی ناڕوون و ناڕاسته‌وخۆ بۆ گه‌یاندنی بیرۆكه‌كان، نیگاركێشی مێژوویه‌كی دوور و درێژی هه‌یه و له سه‌رده‌مه جیاوازه‌كانی مێژوودا گرنگی پێدراوه و گه‌شه‌ی كردووه.
