بەسەر کردنەوەی سەرپەرشتیاری یانەی بەختیاری

والی مەعروف محەمەد، رۆژی 1/7/1971 لەگوندی توڵەبی ناوچەی شەمێرانی سەر بەقەزای دەربەندیخانە لەدایکبووە، لە ساڵی 1984وە یاری دەکات.
 بۆ تیپەکانی شەبابی زەمەقی و سەربەستی و زانکۆ لە شارەزوور یاریی کردووە، دواتر ساڵی 1992 تیپی شەبابی دامەزراندووە، چەند ساڵێک وەک راهێنەر و دڵی بەرگریش یاریی دەکرد، بەڵام ساڵی 1994 توشی نەخۆشیەک بووە، کە بەیەکجاری وەک یاریزان، وازی لە یارییکردن هێنا و دواتر تەنها راهێنەرایەتیی تیپی شەبابی لەقەزای شارەزوور دەکرد .
 لە دیدارێکیدا لەگەڵ کوردستانی نوێ پێی وتین؛ هاندەری یانەی بایرن میوشن -ی ئەڵمانیام و لە دڵەوە یانەی لیڤەرپوڵی ئینگلیزی و ریاڵ مەدریدی ئیسپانیشم خۆش دەوێ.
ئەوەشی خستەڕو: دوای نەخۆشیەکەم، جگە لەوەی راهێنەریی دەکەم، سەرپەرشتیاری یانەی بەختیاریشم، لەگەڵ وەرزشەکەشدا، فەرمانبەری بانکی شارەزووریشم لە قەزای شارەزوور، ئێستاش تەنیا بەم دوو کارەوە خەریکم.
  سەبارەت بە وەرزشیش بە گشتی وتی؛ ئێستا وەرزش ئەو تام و چێژەی جارانی نەماوە، مەبەستیشم وەرزشی تیپە میللییەکانە،  چونکە کەس هاوکارییان ناکات، بۆیە پێویستە کاربەدەستانی حزبی و حکومی پاڵپشتی تیپە میللییەکان و وەرزشی قەزا و ناحیە کان بەگشتی بکەن،  چونکە پێشکەوتنی وەرزش، پێشکەوتنی وڵاتە.
لە کۆتایی دیدارەکەدا بە ستادیۆمی وت؛ جگە لەوەرزش حەزم لەبواری ئەدەبە و بەتایبەت حەزم لە چیرۆک و رۆمانە کوردییەکانە و لەسەروی ئەمانەشەوە ئاوێزانی شیعر و هۆنراوە کوردیەکانم و خۆشم کۆمەڵێک شیعرم هەیە و کۆمەڵێک شیعری جوانم لەتەمەنی لاویدا نوسیوە،  زۆر سوپاسی ڕۆژنامەکەتان دەکەم بۆ ئەم بەسەر کردنەوەیە، ئەوەش راستییەکی حاشاهەڵنەگرە کەهەمیشە کوردستانی نوێ سەرمەشق و پێشەنگ بووە.