ئاوات محەمەد، قائیمقامی سلێمانی لە کۆنگرەیەکی رۆژنامەنووسیدا راگەیاند، تاوەکو ئێستا بەڕوونی هۆکاری ئاگرەکەی بازاڕی دارەسووتاوەکەی سلێمانی نازانرێت، بەڵام زیانێکی زۆری ماددی هەبووە و زیاتر لە 150 دوکان زیانیان پێگەیشتووە.
وتیشی، "لە سبەینێوە و لەڕێگەی تیمەکانی بەرگریی شارستانیی سلێمانییەوە لیژنەیەک بۆ خەمڵاندنی ئەو زیانانە پێکدەهێنرێت کە بە خاوەن دوکانەکانی بازاڕەکە گەیشتوون".
قائیمقامی سلێمانی ئەوەشی وت، "هەرچییەکمان پێبکرێت بۆ هاوکاریکردنی خاوەن دوکانەکان ئەنجامیدەدەین و پێویستە هەموو رێوشوێنەکانی سەلامەتی لەم شوێنانەدا بگیرێنەبەر و بەردەوام جەخت لە جێبەجێکردنی رێوشوێنەکان دەکەینەوە و پێویستە هاوڵاتییانیش هاوکارمان بن".
