لەتیف نێروەیی*
پشتی دەربازبوونا نێزیكی هەشت مەهان بسەر هەلبژاردنا جڤاتا پارێزگەهێن عیراقێ، لداویێ ئیرادەیا رێکەفتن و چارەسەرکرنا پرسگرێکا پێکئینانا ئیدارەکا نوی بۆ کەرکوک سەرکەفت و ل پێشيا دوو رۆژان ل باژارێ بەغدا، دجڤینا جڤاتا پارێزگەها كەركوك دا پارێزگارەكێ كورد لسەر پشكا ئێكەتی بۆ كەركوك هاتە هەلبژاردن و ئیدی کەرکوک دێ کەڤیتە دقوناغەکا نویدا، قوناغا تەبایێ و پێکڤەژیانێ و خزمەتکرنا هاوڵاتیان بێی جوداهی .
ئێكەتیا نیشتمانی یا كوردستانێ هەردەم لگەل تەبایی و ئێك رێزیا گەلێ كوردستانێ بوویە، بتایبەتی ل كەركوك و دەڤەرێن دن یێن ڤەقەتیای، بو وێ مەبەستێ بزاڤەكا زۆركر كو هەمی هێزێن كوردستانی ل كەركوك ب ئێك لیست پشكداریا هەلبژاردنان بكەن، دابكارن پرانیا دەنگا و پرانیا كورسیێن جڤاتا پارێزگەهێ مسوگەر بكەن و ئیدارا نویا هەڤسەنگ و خزمەتگوزار پێکبینن. لێ پێشوازی ژ وێ داخازیا ئێكەتی نەهاتكرن. ل دەمێ بانگەشێ ژی ئێكەتی دخاست كو پەیاما هەمی ئالیێن كوردستانی بۆ هاندانا هاولاتیێن كورد بیت داكو بچنە سەر سندوقێن دەنگدانێ و دەنگ وکورسیێن ئالیێن کوردستانی زێدەببن ، دبەرامبەردا پەیاما هندەك ئالیێن سیاسی یێن کوردستانی تنێ بۆ دژایەتیكرنا ئێكەتی بوو. ئەڤەژی بۆ سەدەما وێ چەندێ کو هژمارەکا زۆر یا دەنگدەرێن کورد پشکداریا دەنگدانێ نەکەن.
ژلایەک دنڤە، بسەدەما فرە لیسیتیێ ژی کو دەنگێ هندەک ئالیان نەدگەهەشتە کورسییەکێ، ئەڤەژی ب زیان بۆ لایەنێ کوردی ڤەگەریا و ب کێمی کورسییەکی دی ژدەست لایەنێ کوردی چوو.
پشتی راگەهەندنا ئەنجامێ فەرمیێ هەلبژاردنان، دیسان ئێكەتی دپەیامەكا فەرمی و نیشتمانیدا داخازكر كو ئێكەتی و پارتی كۆمبوونەكا دووقولی بكەن و بگەهنە ژهەڤ تێگەهەشتنەکێ و ب ئێك تیم و ب ئێک ئیرادە ل كەركوك و نەینەوا لگەل پێكهاتێن دی یێن عيراقی دانوستاندنا بكەن بۆ پێكئینانا ئێدارێن هەردوو پارێزگەها، هەروەسا داكو ل كەركوك بکارن پارێزگارەكێ كورد بهێتە هەلبژاردن و داوی ب دەستهەلاتا پارێزگارێ خۆسەپێنێ كەركوك بهێت. هەروەسا دا بکارن رەوشا شەنگال و دەشتا نەینەوا ئاسایی ببیت و دەرفەتەک پەیداببیت کو ئاوارەیێن شەنگال ڤەگەرنە سەر جهێن خۆ. مخابن پارتی نەكو پێشوازی لڤێ پێنگاڤا نیشتمانی یا ئێكەتی نەكر، بەلكو ب ئێكلایەنی دەست ب دانوستانا كر لگەل بەشەك ژ پێكهاتێن دی، ژوێژی خراپتر ئەو بوو كو دخاست ل هەردوو پارێزگەها ئێكەتی ژ ماف و ئیستحقاقێ خۆیێ هەلبژاردنان بهێتە بێ پشككرن!.
دبەرامبەردا ئێكەتی ب سەرۆكایەتیا سەرۆك بافل جەلال تاڵەبانی ب سیاسەتەکا نەرم و حەکیمانە و عەقلمەندانە بزاڤكرن كو ئەو پرسگرێك ب رێیا دانووستاندنا و لسەر شەنگستێ سازانا سیاسی بهێتە ئێكلایكرن بێی كو هیچ لایەنەكێ سیاسی یان پێكهاتەیەك بهێتە بێ پشككرن. ئانكو ئێكەتی چاڤ ل پشك و مافێ چ لایەن و پێكهاتەیەكێ نەبوویە ، هەروەسا رێزێ ل ئەنجامێ هەلبژاردنان دگرێت و ناخوازیت مافێ دەنگدەرێن ئێكەتی ژی بهێتە هنداكرن.
لسەر ڤی بنگەهی، ل پارێزگەها نەینەوا ئەندامێن ئێکەتی بێ ی مەرج، دەنگی خۆ دانە كاندیدێ پارتی بۆ پۆستێ جێگرێ ئێكێ یێ پارێزگاری.
ل كەركوك ژی ل گور ئەنجامێ هەلبژاردنان هەرچەندە ئێکەتی ئێکەمە، لێ دخازیت ب ئاوایەکێ هەڤسەنگ و دادپەروەرانە بۆ هەر لیست و پێكهاتەیەكێ پشك و مافێن وان لگور ئەنجامێ هەڵبژاردنان بهێنە مسوگەر كرن.
لسەر سیاسەت و شێوازێ نوێی حكومرانیا ئیدارا كەركوك ژی، كودێ قوناغەكا نوی لەوێ پارێزگەهێ دەست پێ كەت. هەر وەكو د ئێكەم پەیاما سەرۆكێ ئێكەتی دا هات، ئێكەتیا نیشتمانی یا كوردستانێ ل كەركوك دێ بەردەوامبیت لسەر سیاسەتا هەڤاڵ مام جەلال و ب ئێك چاڤ دێ خزمەتا هەمی خەڵك و پێكهاتێن كەركوك كەت. هەروەسا كەركوك دێ كەینە نموونەیا ئاشتیێ، تەناهیێ، پێكڤەژیانێ، ئاڤەدانیێ و خزمەتکرنا هاولاتیان بێی جوداهی.
ب وێ سیاسەتێ دێ كارین خەلكێ كەركوك ئاشت كەین و ژوێ رەوشا دژوار دەربازکەین کو ئەڤە نێزیکی حەفت سالانە د رەوشەکا ئالوزدا دژین .
ئەڤ رێیا ئێکەتی هەڵبژاردی، رێیەکا راست و دروستە و بجهئینانا وێ سوزێیە ژی کو ئێکەتی چ جارا کەرکوکی یا بجیهناهێلیت و دێ بیتە هێڤینکێ پێکڤەژیانا هەمی پێکهاتێن وی باژێڕی .
*ئەنداما جڤاتا سەرکردایەتیا ئێکەتی یا نیشتمانیا کوردستانێ
