من کێشەم گریانەکەی راکان جبوری نییە و ئەوەش بە کێماسی نازانم، لێ کێشەم ئەوەیە راکان دەڵێت یەکێتی هەموو شتێکی لێسەندین و هیچی بۆ عەرەب نەهێشتەوە، بێگومان ئەمە بۆچوونی ناسیونالیستی کوێربینە، دەنا قسەکە بۆنی نیازپاکی لێنایەت و واش نییە، لەبەرامبەر ئەو قسەیەدا وەسفی عاسی دەڵێت: هیچمان بەدەست کوردەوە نەهێشتووە، ئەمەش دیسان دیدێکی ناسیونالیستانەیە و دەبێ لەقاو بدرێت، نابێت بابەتەکان وەک ململانێی نەتەوەیی وێنا بکرێن کە جۆرێک لە دڕدۆنگی دروست بکات، زۆرێک لە کوردی بەلەنگاز، بەمەبەست، قسەکەی وەسفی دەقەبێنن و بەلای قسەکەی راکاندا ناچن، زیاد لەپەنجا جاریان بۆ ناردووم، وەک بڵێی پێمبڵێن ئەوە دەستی تۆشی تێدایە.
بە باوەڕی من دەبێت یەکێتی قسەی کەس لەسەر خۆی خۆش نەکات و وەڵامی دروستی هەبێت.
پرسیار ئەوەیە هەندێک لەوانەی قسە دەکەن بۆ دوو کورسییەکەی کوردیان لە پێنجەکە دوورخستەوە، بەڕادەیەک ئەرشەد ساڵحی بڵێت چوار کورسییەکەی ئێمە، ئەو مەبەستی دووەکەی پارتی و دووەکەی بەرەی تورکمانی بوو، پارتییەکیش پێی نەگوت شەکرت شکاند.
لە ساڵی بیستی سەدەی بەرێوە تا ساڵی سێیەمی 2000 ەکان کورد لە کەرکوک لاقە کورسییەکی فەرمانگەیەکی بەدەست نەبوو، لەوەش بەدوا تا شازدەی دەی 2017 ململانێی خۆیی کورد، هەرگیز نەیهێشت وا دەربکەوێت کورد پۆست و پلە و پایەی هەن، ئاخر شەڕ لەسەر پاکەوانی جادەش بوو، چ جای مودیری پۆلیسخانەیەک، ئێستا دوای حەوت ساڵ بێنەوبەرە یەکێتی و کوردی کەرکوکیش پارێزگارێکیان هەیە، دەکرێت بەجۆرێک کار لەسەر ئەو بابەتە بکرێت، بۆ چاکەی گشتی و چاکەی کوردیش بشکێتەوە، ئێستا خەریکی خوێندنەوەی بیرەوەرییەکانی رۆژ نوری شاوەیسم، ئەو دەڵێ لەسەر کەرکوک، مەلا مستەفای بارزانی یەخەی بەرپرسێکی عەرەبی گرتووە، کە وتویەتی کەرکوک عیراقییە یان شتێک لەو جۆرە، کەچی ئێستا هەندێک یەخەی کوردەکە دەگرن دەڵێن چۆن پارێزگارت وەرگرت؟ قسەی بەرپرسێکی پارتیان بۆ ناردووم کە چاوی کامێرای لێ دیار بێت، دەکەوێتە پیاهەڵدانی پارتی و لە مەجلیسی بێ کامێراشدا رەخنەی وا لە پارتی دەگرێت حەبەز بووزیش نەیدەگرت.
یەکێتی و پارێزگارە کوردەکە لە کەرکوک ئەرکیان یەکجار قورسە، کەرکوک لیپە لە کەموکووڕی، دام و دەزگاکان پڕن لە رۆتین، گەندەڵی و ناجۆری هەیە، لە کوێوە بواری چارەسەر هەیە، دەبێت دەستپێبکرێت، دەزانم پارێزگار لەبەردەم ئاڵنگارییەکی گەورەدایە، بەڵام نابێت گرەو لەسەر شکست و نەتوانینی ئەو بکەین، گەلۆ کێ لەو گرەوە قازانج دەکات؟ ئەوە ئەسڵی بابەتەکەیە، رەخنەمان هەیە، سەرنج و تێبینیمان هەیە، لێ ئەوەی هەشمانە خاوەندارێتی شارێکە 100 ساڵە لە شاریی دەخرێت، دڵنیام هێواش هێواش دەگەینە مەنزڵ، مەرج نییە بەم دوو ساڵە، پێرێ بەیانی کەرکوکم پاکتر و بێدەنگتر لە سەردەمی راکان بینی، بەڵام چوونم بۆ فڕگە لەتەک کۆمەڵێک دۆستا بۆ بەخێرهێنانەوەی کاک مەریوانی وریا قانع، هەندێک دڵی تەنگ کردم، چونکە پرۆسەی چوونە ژوورەوە بۆ فڕگە کێشە و بێشەی زۆرە و دەکرێت چاک بکرێت، هەر خۆشە فڕگەش هەیە، خۆزگا دەبووینەوە خاوەن سینەمایەک لەو پێنج سینەمایەی جاران، من بیری بەر دەرگای سینەماکان و لاساییکردنەوەی بۆد سبنسەر و جۆلانە جیمە و ئەزبەری خواردنەکەی هەرزەکاری دەکەم.
