هەموو هەڵبژاردنێک چارەنووسسازە، ئەمەی ئەمجارە چارەنووسسازترە، یەکلاکەرەوەیە و گەڕانەوەیە بۆ هاوسەنگی هێز، گەڕانەوەیە بۆ ڕاستەڕێی حومکڕانییەکی دروست کە دەربەستی ژیان و گوزەرانی خەڵکەکەمان بێت، گەڕانەوەیە بۆ ئیدارەیەکی چالاک و چاپوک بۆ یەک قەوارەی هەرێمی کوردستان کە هیچ شار و پارێزگایەکی بە بارمتەی جیاکاری و قۆرخکاری وەرنەگیرابێت، هیچ دەڤەرێکی پاوانی ئۆپەراسیۆنی بێگانە و ئۆپەراسیۆنی سەرکوتکردن و زیندانیکردن نەبێت و هیچ هێزێکی سیاسییش تێیدا پشت بە حیلەبازی و کەڵەگایی نەبەستێت.
ئەم هەڵبژاردنە بۆ پەرەپیدانی ئەزموونی سیاسیی وڵاتەکەمانە و دەرفەتێکە مەگەر لە راپەڕینی 1991 ی کوردستان و پڕۆسەی ئازادی عیراق لە ساڵی 2003 هی وا لوابێت.
گەلی کوردستان شایانی باشترینە و سەربەرزی خاک و وڵاتی خۆیەتی، ئەرکی هێزە حەریفەکانی کوردستانە ئەم دەرفەتە لەبار نەبەن و بیقۆزنەوە بۆ سەرخستنی دیموکراسی و حوکمڕانییەکی خەمخۆر کە نەوت و داهات و سەرمایەی کوردستان لە قوماری سیاسیی درۆزنانە و سەرچڵی ناکامڵ و بێباکی تەسکی حزبایەتیدا بە خەسار نەدات.
هەموو ئەوانەی دوو دەیەیە داخوازی چاکسازی و گۆڕانکاری و نوێکردنەوەی سیاسەت و کوردایەتی بەرز دەکەنەوە ئێستا باشترین هەلە، ئێستا دەرفەتە بەهرە لە هێز و وزەی بێ پایانی یەکێتیی نیشتمانیی کوردستان وەربگرن و بە دەنگی بەرز و بە سەنگی خۆیان پشتیوانی لە خیتاب و خەباتی هەڵسانەوەی یەکێتیی بکەن.
دیموکراسی و هەڵبژاردن بەرپرسیارێتییەکی گەورەیە. بۆ ئەمڕۆش زۆر گەورەیە و نزیکە لە خەباتی شۆڕشگێری و پێشمەرگایەتی کە میللەتەکەمان خوێن و فرمێسک و قوربانی گیانیی زۆری بۆ داوە و بۆ دوارۆژی کوردستان شان لە شانی رابردووی پڕ شانازی دەدات.
جا ئەگەر گەرەکمانە دواڕۆژ ببەینەوە و مسۆگەر بکەین، ئەگەر نیەتمانە مناڵ، کچان و کوڕان، نەوەکانی داهاتوومان خەم و پەژارەی سەردەمی ژێردەستی جارانی حوکمی بەعس و ناخۆشی کەم دەرامەتی و کەم دەرفەتی دەساڵی رابردوو تێپەڕێنن کە بەهۆی داعش و بە هۆی قۆرخکاری و سیاسەتی چەوتی کەمینەی دەستبەسەراگرتووی بڕیاری پارتی تووشی هاتین، ئەگەر بە ڕاستمانە کە بێگومان بە ڕاستمانە، هەنوکە ئەم رێوشوێنە ئاشتیخواز و مەدەنییەی هەڵبژاردن باشترین و جددیترین رێگای ئاوەدانییە.
هێزە پەرۆش و کەسە دەربەستەکان لێیان روونە دەنگدان و دەنگکردن و هاتنە جواب لەسەر دواڕۆژی میللەتەکەمان بەرپرسیارێتییەکی قورسە و هەر بە هیممەتەوە هەڵیدەگرن.
نەبەردی گەورە قوربانی گەورەی دەوێت، دەنا مامۆستا هێمن گوتەنی (شوێن دیکە زۆرە بۆ گاڵتە و جەفەنگ).
