مێژووی دوور و نزیکی کورد و کوردستان لیپاولیپە لە تاوانلێکردن، لەنێویاندا تاوانی جینۆساید، کە ئامانجی بکەرەکانی (داگیرکەران) لەناوبردن و سڕینەوە بووە وەک نەتەوە و زمان و نیشتمان، سەرباری ورد و خاشکردنی تەواوی سێکتەرەکانی ژیان و بەردەوامبوون لەژیان، ئەمە لە تێگەیشتنە هەرە سادەکانە و تێنەگەیشتن لەمە سەردەر دەکێشێ بۆ بەدحاڵیبوون و نەبوونی ئاوەز بۆ بینینی فەلسەفەی پشت تاوانەکە.
با ورد و روونتر هەڵوەستە بکەین، لە ئاست کۆی تاوانەکاندا (جینۆساید) گوتاری سیاسیمان لە کوێی ئەم پرس و بابەتە گرنگەدا بوە و ویستوێتی چۆن توخم و رەگەز و مەترسییەکانی شیبکاتەوە؟ ئایا بەڕاستی لەئاست تاوانەکان و مەترسییە جدییەکانیدا، کورد و سەرکردایەتییەکەی خاوەنی ئایدیای سیاسیی پێویست بووە و توانیوێتی رەهەندەکانی شرۆڤە بکات و بۆ رای گشتی بسەلمێنێ؟ ئایا بەڕاستی توانیومانە لە رێگای سیاسەتەوە پێش لە تاوانەکانی جینۆساید و دووبارە نەبوونەوەی بگرین؟
یەکێک لە گرفتە سەرەکییەکانی سیاسەت لە بیرکردنەوەی ئێمەدا لە (ستراتیژیی دوور و نزیکدا، لە رابردوو و ئێستادا) ئەوە بووە یان ئەوەیە، هەمیشه چاوەڕوانیمان لە هەڵوێست و کردارمان زۆرترە، نەمانتوانیوە لە جیاتی هەڵپە و چاوەڕوانی بێسوود هەنگاوی کرداری بنێین و لەسەر بنەمای نەخشەڕێگای دروست خشت لەسەر خشت دابنێین و باشترین نموونەش ئەوەیە؛ لە دوای هەر وێستگەیەک لە وێستگەکانی تاوانەکان، دانیشتووین و بەکوڵ بۆ بەختی خۆمان گریاوین، سەرنجی جەوهەریش ئەوەیە پێمان وابوە ئەم گریانە دەمانگەیەنێتە شوێنی مەبەست، کە دروست پێچەوانەکەی راستە.
ئایا توانیومانە لە رێگای سیاسەتەوە پێش لە تاوانەکانی جینۆساید و دووبارە بوونەوەی بگرین؟
هەربۆیەش گوتاری سیاسیمان لەبەردەم تاوانەکانی جینۆسایدکردنمان، نەیتوانیوە دیواری تەلبەندکراوی کوردستان ببڕێ و بگاتە سەر سەکۆی سیاسیی نێودەوڵەتی و ئەگەریش پریشکێکی کەمی گەیشتبێ، ئەوە ئەو پریشکە نەیتوانیوە وەزیفەی سەرەکی خۆی بپێکێ و بەزوویی بێ کاریگەر و کاڵ بوەتەوە و نەیتوانیوە ببێتە زمانحاڵی تاوانەکە (جینۆساید) و ناساندنی!
بۆیه لەم ئاستە یەک ئاڕاستەی بەرپرسیار نییە وەک (حکومەت یان حیزبی حکومڕان و حیزب و هێزی بەرهەڵستکار) بەڵکو بەرپرسیارێتییەکە گشتی و تەنیا جیاوازی ئەوەیە، پلەبەندی لەبەرپرسیارێتییەکەدا هەیە، وەک بەرپرسیارێتی حکومەت و حیزبی حکومڕان جیاوازە لە بەرپرسیارێتی حیزب و هێزە بەرهەڵستکارەکان، بەرپرسیارێتی رێکخراوەکانی کۆمەڵگای مەدەنی جیاوازە لە بەرپرسیارێتی نووسەران و رووناکبیران و... هتد.
ئەگەریش بڕیار وایە نەترسین و دەمانەوێ، گوتارێکی تەندروست و کاریگەرمان لە ئاڕاستەکردنی دۆسییەکانی تاوانی جینۆسایدکردنمان هەبێت، دەبێت کۆی جومگەکانی گوتاری سیاسیمان شەن و کەو بکەین، بیخەینە بەردەم نەشتەرگەری رەخنەی شێلگێرانە، بۆ ئەوەی لەمەزیاتر بەم فەقیری و دەستکورتییە لەئاست تاوانەکانی جینۆسایدکردنمان، کە پێش مەرجی مانەوە و هەڵسانەوە و دامەزراندنی قەوارەی راستەقینەی (نەتەوەیی - نیشتمانی)مانە، رانەوەستین و دنیابینی سیاسیمان لە رەگەوە بگۆڕین، کە نەکردنی لە ئێستا خراپترمان لێ دەکات لە ئاست فەلسەفە و پەیامی پڕ مەترسی تاوانەکان.
