دەکرێت بەر لە دەرکردنی هەر بڕیار و کردارێک رەچاوی بارودۆخەکە بکرێت. هەرکاتێکیش لە کار و بڕیارێکدا شکست بێنیت ئەوە دەکرێت وەک پەند وەربگیرێت نەک شانازی
باس و خواسی ریفراندۆم و پرسی سەربەخۆیی و دەوڵەتی کوردی لە 25ی 9ی 2017 دا، بە دیدی من لە نییەتەوە نەبوو، ئەوەندەی گەمەیەکی سیاسی بوو بۆ خۆدەرخستنی کەسیی و حزبی! وەک كارتێکی سیاسی بەکارهێنرا تا بەرامبەر بە خواستی خوار سەربەخۆیی رازی بێت !
زۆرینەی شڕۆڤەکارە سیاسییەکان لە لایەنگرانی ریفراندۆم، تەنانەت سەرکردە باڵاکانی هەرێم لێدوانی توند و ئاگرینیان دەدا و پەنجەی هەڕەشەیان بە رووی هەموو وڵاتانی جیهان بەرز دەکردەوە و جووڵە و سەردانی ئییقلیمی و ئەوروپی و دەرەوەیان دەکرد، لە ناوخۆی کوردستانیشدا هەر رۆژە و لە سنووری پارێزگایەکی ئەو هەرێمە کۆبوونەوەی فراوانی جەماوەرییان دەکرد، خۆیان وەک فریادڕەس نیشان دەدا، گوایە پشتگیرییە دەرەکییەکان کۆدەکەنەوە.
ریفراندۆم، بە ئامانجی سەربەخۆبوون نەبوو، بەڵکو لەپێناوی بەدەستهێنانی چەند داوایەکی کەڵەکە بوو بوو كە پێشتر لەلایەن زۆربەی حزبە كوردستانییەکانەوە خرابووەڕوو، نەک بە تەنیا داواکاری یەک حزب بووبێت!
ریفراندۆم ئەو کارتە سیاسییە بەهێزە سووتا، ئەگەر ئەوکات بەغدا ئەو داواكارییانەی خوارەوەی جێبەجێ کردبا، ئەوا بێ دوو دڵی سەرکردە باڵا دەستەکان لە ریفراندۆمەکە پاشگەز دەبوونەوە و کارتە سیاسییەکەش وەک ئێستا نەدەسووتا.
داواکاریەکانیش ئەمانەی خوارەوە بوون: چەسپاندنی بودجەی هەرێم، دابینکردنی مووچەی فەرمانبەران، جێبەجێکردنی یاسای نەوت و گاز، دابینکردنی خەرجی پێشمەرگە، جێبەجێکردنی مادەی 140.
هەرچەندە ئەو خاڵانە داواکاری بچووک نین، بەڵام بەراورد بە داواکاریی سەربەخۆیی و دروستبوونی دەوڵەتی کوردی ئاست نزمترن!! بۆیە دوای سەرنەگرتنی ریفراندۆمەکە دەرکەوت کە ئەوانەی (پەرۆشی دروستکردنی دەوڵەتی کوردی و سەربەخۆیی کوردستان بوون)، خاوبوونەوە تا ئاستی پەشیمان بوونەوە، بەڵام ئێستا کە پێیانوایە پەشیمان نین و بە شانازیی لە قەڵەمی دەدەن، ئەوە تەنیا بۆ دڵدانەوە و ئارامکردنەوەی دەروونیی سیاسیی خۆیانە تا بۆ رای گشتی پیشانبدەن دۆخەکە ئاساییە، ئەگەرچی شکستی هێنا و لە باوەشی گەرمی بەغدادا خۆیان بینییەوە!
سەربەخۆیی كوردستان لەسەر بنەمای جووڵاندنی هەست و سۆز و بەزەیی هاونیشتمانییان نابێت، ئەگەر نا هەموو تاکێکی کورد لە هەر کوێیەکی دنیا بێت، لەگەڵ سەربەخۆیی کوردستانە، بەڵام لەسەر بنەمای ژیریی سیاسیدا، نەک بێ ئاگایی لە سیاسەتی نێودەوڵەتی و بەکارهێنانی سۆزی خەڵک.
هەر لەو ڕوانگەیەوە دەکرێ بڵێین، سیاسییەکان و دەستەڵاتدارانی هەرێم گەورەترین قوماریان بەو خەڵکە خۆشباوەڕە کرد کە هەم بانگەشەیان بۆ ریفراندۆمەکە دەکردو هەم دەنگیان دا!.
بێشک هەموو تاکێکی کورد یا حزبێکی کوردی لەگەڵ سەربەخۆیی و دروستبوونی دەوڵەتی کوردییە، بەڵام لەکات و هەلی گونجاودا داوابکرێت نەک لەکات و هەلی نەگونجاو! ئەو ریفراندۆمەش کە لەو کاتەدا کرا پەرچە کردار بوو نەک کرداری راستەقینە، لە جیاتی بەرەو سەربەخۆییمان بەرێت بەرەو ژێرخۆبوون و دابڕانی بردین.
بۆیە دەکرێت بەر لە دەرکردنی هەر بڕیار و کردارێک رەچاوی بارودۆخەکە بکرێت. هەرکاتێکیش لە کار و بڕیارێکدا شکست بێنیت ئەوە دەکرێت وەک پەند وەربگیرێت نەک شانازی.
باش بوو جنسیەی عیراقی و پاسپۆرتم نەسووتاند! باش بوو کە نەموت دەبینە دراوسێیەکی بەسوود بۆ عیراق!
