ئێستا پرسی هەڵبژاردن زیاتر لە هەر پرسێکی دیکە، پێویستی بە گوتاری دوور لە بریندارکردن و تێکدانی یەکڕیزیی گەل و نەتەوەیە، هەر حزب و لایەنێک مافی خۆیەتی بانگەشەی هەڵبژاردن بۆ قەوارە و کاندیدەکانی خۆی بکات، بەڵام لە چوارچێوەی ئیتیکی حزبیبوون و ئاسایشی کۆمەڵایەتی و سیاسیدا نەک رووشاندن و هەڵدانەوەی برینی کۆن و لاپەڕە رەشەکانی ساڵانی شەڕی ناوخۆ.
بانگەشە پێویستی بە گوتاری کوردایەتی و یەکتر پەسەندکردنی نەتەوە جیاوازەکان و هاووڵاتیبوون و هاوشاریبوون هاوزمانیبوون هەیە، ناکرێ لە ململانێ سیاسییەکاندا، بۆ یەکلاکردنەوەی پۆستە هەستیارەکان وشەی زبر و توندوتیژ بەکاربهێنین بەرامبەر بە لیست و قەوارە جیاوازەکانی دیکە. وەک دەبینین ئێستا لە سنووری سەرجەم پارێزگاکانی کوردستان بە تایبەتی لە چەقی شاری هەولێردا، پارتی دوور لە ئیتیکی حزبی، تیمی حکومەت لە وەزیر و قایمقام و بەڕێوەبەری ناحییەکان و بەڕێوبەری فەرمانگەکانی سەربە پارتەکەیان بەکار دەهێنن بۆ دەنگ کۆکردنەوە، وەک حکومەت بەڵێن بە خەڵک دەدەن.
لە راستیدا ناکرێ گوتاری حزبی لە گوتاری کوردایەتی و نەتەوەیی باڵاتر بێت و حکومەت لە پێناوی حزبدا بەکاربهێنرێت، وەکو چۆن لە سنووری پارێزگای هەولێردا بە ئاشکرا و بێ شەرمانە کارەکتەرە حکومییەکان بۆ خزمەتی پارتەکەیان بەکاردێنن و خزمەتکردنی هاووڵاتیانیش بەلاوە نراوە و پەراوێزخراوە.
لەپێناوی جوانترکردنی پرۆسەی هەڵبژاردندا، چ لە رابردوو و چ لە ئێستا و چ لەداهاتووشدا، پێویستمان بە گوتاری پێکەوەژیانی ئاشتییانەیە، نەک حزبایەتی رووت و خۆشۆڕکردنەوە بە ئەجێندای وڵاتانی دژە کورد و دژە ناوچەکەدا. گرنگە سەرۆکی قەوارە و لیستەکان دەمارگیر نەبن، بەڵکو پێویستە ئاسایی بن لەگەڵ یەکتریدا.
هێنانەدی ئامانجی سیاسی هەر حزبێک و کێبڕکێ و پێشبڕکێ و رکابەریی لەسەر وەرگرتن و پێدانی پۆستە سیاسییەکان، دەکرێ مەدەنییانە بێت و لۆژیک و عەقڵ بەکاربهێنرێت، هەولێر چەقی ململانێیەکانە بەو پێوەری هەرسێ سەرۆکایەتییەکەی هەرێم (وەک دامەزراوەی یاسادانان و جێبەجێکردن لەوێ هەن، بۆیە لەهەر ململانێیەکی سیاسی و کارگێڕی و بگرە لە پرسی هەڵبژاردنیشدا پێویستی بە شەڕە دەنگە نەک شەڕە تفەنگ، سەرکردە و سەرۆک و بەرپرسی هەر حزبێکی کوردی ئەگەر بە قسە و وتاری ئاگرین دژایەتی بەغدا بکات. راست ناکات، تەنیا مەبەستی ئەوەیە هەست و سۆزی دەنگدەرەکانی بۆ حزبەکەی رابکێشێت.
پێویستە ململانێ سیاسییەکان بۆ یەکلاکردنەوەی هەر پۆستێکی سیادی یان بۆ بەدەستهێنانی هەر پۆستێکی تر لە هەر دامودەزگایەکی دیکەوە بێت، پێویستە بە ئاڕاستەی پێکەوەژیانی ئاشتییانەی پێکهاتە و چین و توێژەکانی شارەکان بڕوات، نەک دروستکردنی دووبەرەکی و دڕدۆنگی بەرامبەر بە یەکتر.
بۆیە سیاسەتی حەکیمانە و سەرکردایەتیکردن و سەرۆکایەتیکردن بە خۆ بەزلزانین نایەتە دی، بەڵکو پێویستی بە خاکیبوون و سادەیی و جەماوەریبوون و خۆشەویستیی ناو خەڵکە.
