كـه‌ژاڵ ئه‌حمه‌د
هەر كە دەمانەوێت باسی خوێندنەوە بكەین، بیرمان بۆ ئەو كێشە و رێگرییانە دەچێت كە بەهۆی پێشكەوتنی تەكنۆلۆژیا و تۆڕەكۆمەڵایەتییەكانەوە سەریان هەڵداوە و ئەوەندەیان بابەتی سەرگەرمیی و یارییەكانی كات بەسەربردن و هەلی پەیوەندیی گریمانەیی بۆ گەورەكان و منداڵان دروست كردووە، بە زەحمەت دەتوانن خوێنەری جدیی بن و هەوڵبدەن هەموو هەستەكانیان بخەنە خزمەتی ژیان لەگەڵ كتێبێكدا. خوێندنەوە بۆ زۆرینەیەك بووە بە وەرگرتنی زانیاریی راگوزەر و خێرا لەبەرئەوەی سەرقاڵییەكان كاتی كورت و كەمیان بۆ خوێندنەوەی تێروتەسەل هێشتۆتەوە. راگوزەیی لە خوێندنەوە و تەنانەت كاركردن و تێگەیشتن لە ژیان بووە بە سیمای سەردەمەكەمان، ژمارەیان كەمبۆتەوە ئەوانەی درێژە بە تێڕامان لە دیاردەكان دەدەن بۆئەوەی لێكدانەوەكانیان بخەنەڕوو. بۆچی دەبێت لەسەردەمێكدا كە زۆرترین هەل رەخساوە بۆئەوەی لە ماڵەكەی خۆت یان لە ئۆفیسەكەتەوە دەستت بە هەزاران كتێب و سەرچاوەی دانسقە و بەهاداری مێژووی مرۆڤایەتی بگات هەر لەڕێی مۆبایل یان ئایپاد یان لابتۆپەكەتەوە كەچی سەعاتێك پۆپ جی یان كاندی كراش بكەیت یان سەیری خوێندنەوەی بورجەكان و چۆنێتی خواردن دروست كردن و ماكیاژ كردن بكەیت، بەڵام تاقەتت نەبێت وتارێك یان كتێبێك بخوێنیتەوە كە پێنج سەد وشە یان هەزار وشە بێت؟ كێشەكە چییە و بۆچی زانینی راگوزەر و بێ سود جێگەی بابەتی بە داهێنان و گرنگ بۆ ئایندە و رێكارەكانی گەشەسەندنی كەسایەتی مرۆڤەكان گرتووە. ئایا كەسەكان ئومێدیان بە كتێب و كتێبخانەكان نەماوە؟ یان مرۆڤی هەموو تەمەنەكان خۆشنودی خۆیان لە دەستبەرداربوون لە بەرپرسیارێتی و هەوڵدان بۆ كامڵ بووندا دۆزیوەتەوە؟ هۆكارەكە هەرچییەك بێت، ناتوانێت وەڵام بێت بۆ ئەو قەیرانەی نەخوێندنەوەی مرۆڤی سەرقاڵی ئەم سەردەمە دروستی كردووە. لەنێوان كتێبخانەی ماڵەوە(كتێبخانەی كاغەزیی) و كتێبخانەی ئەلكترۆنیدا چەندان هەلی زێڕین هەن بۆئەوەی هزر و رۆحمان رزگار بكەین لە جەهلی گەمارۆدراو بە سیمای هاوچەرخ و شارستانیی تاوەكو نەكەوینە تۆڕی گەمژە كردنێكی جیهانییەوە كە وەك چەكێك دژی ئینسان و خاكەكەی و خێروبێری وڵاتەكەی بەكاردەهێنرێت. هەموو كەسێك دەتوانێت هاوسەنگیی رابگرێت لەنێوان كات بەسەربردنی بێ ئەنجام و خۆ پەروەردە كردنێكی رووناكبیرانەی بەسووددا ئەو كاتەی سۆشیال میدیا و یاریی ئەلكترۆنیی زاڵترینن لە ژیانی گەورە و بچووكی میللەتاندا ئەو كاتەیە كە ماددەیەكی بێ هۆشكەر ئەو میللەتانە موبتەلا دەكات و نەخۆشیی وەك ئۆتیزم و جۆری تریش لەنێو منداڵاندا برەو پێدەدات و گەورەكانیش بەرەو نەخۆشیی دەروونیی و تاوان پەلكێش دەكات. ئێمە كە میللەتێكین داهێنەری تەكنۆلۆژیا نین، بەڵكو بەكاربەری تەكنۆلۆژیان واباشە باش بخوێنینەوە بەرلە بەكارهێنان و عەوداڵبوونمان بە داهێنراوەكانەوە.
