دۆخی ئەمڕۆی سوریا و ئایندەی کورد لە رۆژئاوا

سەرکۆ یونس


کوردی رۆژئاوا کە نزیکەی سێ ملیۆن کەس دەبن، لەدوای رووخانی دەوڵەتی عوسمانی و دروستبوونی دەوڵەتی سوریا، لە زۆربەی مافە سەرەتایی و خزمەتگوزارییەکانی هاووڵاتیبوون بێ بەشن.
لەگەڵ دەستپێکردنی بەرخۆدانی خەڵکی سوریا بە گشتی و کوردی رۆژئاوا بەتایبەتی لە دژی رژێم، کورد لەپێناوی پاراستنی خاک و کوردبوونیان، ئیدارەی خۆبەڕێوەبەرییان لەگەڵ پێکهاتەکانی عەرەب و مەسیحی و تورکمانەکان، پێکهێنا، بەڵام گروپ و دەستەی تیرۆریستیی بەناوی بەرەی نوسرە و  قاعیدە و چەندین گروپی تر، لە دژیان وەستانەوە. بێگومان هەموو ئەمانە بە پاڵپشتیی تورکیا بوو، بەڵام خۆشبەختانە، کورد بەرپەرچی هەموویانیان دایەوە و سەرکەوتنیان بەدەستهێنا. 
پاشان داعش پەیدابوو بە پیلانی تورکیا، بەڵام دوای چەندین قارەمانیی و نەبەردی شەڕڤانان لە کچان و کوڕانی رۆژئاوا، پاڵپشت بەهێزی پێشمەرگەی کوردستان و تیمێکی بە توانای هێزەکانی دژە تیرۆر، توانییان خاکی پیرۆزی کوردستان لە تیرۆرستان پاک بکەنەوە.
دواجار و لەپاش نزیکەی 13 ساڵ، لە شەڕ و کوشتار، رژێمی بەشار نەما و(هێزەکانی تەحریری شام و سوپای ئازادی سوریا و...هتد) بە پاڵپشتی تورکیا، کۆنترۆڵی ناوچەکانی ژێردەستی رژێمیان کرد.
ئەوەی پەیوەندیی بە رۆژئاوا و دەسەڵاتی هێزەکانی سوریای دیموکراتەوە(هەسەدە)هەیە مەترسیدارە، چونکە ئەم حکومەتە نوێیە، خودی سەرکردەکانیان، سەر بە تورکیان، بە دڵنیاییەوە هەرگیز ئەنقەرە رازی نابێت کورد دەسەڵاتی هەبێت لەم وڵاتەدا، ئامانجی تورکیا، لاوازکردن و نەهێشتنی ئەو قەوارە کوردییەیە.
سەرەتاکانی ئەم خواستەی تورکیا، لە منبج و دێرەزوور و رەقە و بەشێکی تری ژێر دەستەڵاتی هەسەدە، دەرکەوت، بە هێرشی چەکدارەکانی سەر بە تورکیا و بەپاڵپشتی سەربازیی و درۆنی تورکی.

ئەم حکومەتە نوێیە، خودی سەرکردەکانیان، سەر بە تورکیان، بە دڵنیاییەوە هەرگیز ئەنقەرە رازی نابێت کورد دەسەڵاتی هەبێت لەم وڵاتەدا

ئەگەر رێکەوتنی سیاسی و پشتگیریی ئەمریکا نەبێت،  پێدەچێت جارێکی تر کورد بکەونەوە نا ئارامی و ئاوارەبوونی هەزاران هاووڵاتی لێبکەوێتەوە.
هەرچەندە مەزڵوم عەبدی، داوای گفتوگۆی کرد، لەگەڵ سەرکردەکانی تەحریری شام و حکومەتی نوێی دیمەشق و تورکیا، بەئامانجی دوورخستنەوەی شەڕ.
بڕیارە ئەم هەفتەیە، وەزیری دەرەوەی ئەمریکا، بچێتە ئەنقەرە، بە مەبەستی هێورکردنەوە و نزیککردنەوەی لایەنەکان.
پێویستە دۆستەکانی کورد بەهەر شێوەیەک بێت، داکۆکی بکەن لە رۆژئاوا بۆ پاراستنی ئازادیی و سەقامگیری.