سی و حەوت ساڵ لەمەوپێش لەڕۆژێکی وەک ئەمڕۆدا، شاری هەڵەبجە و ده‌وروبه‌ری بەدەستی حکومەتی بەعس، کیمیایی بارانکرا و نزیکەی 5000 هەزار هاوڵاتی بێتاوان شەهیدکران، بەسەدان ژن و مناڵ و پیرو گەنج بریندار بوون، شارێك وێران و خاپور كرا، ته‌نانه‌ت دارو دره‌خت و ئاژه‌ڵ و باڵنده‌كانیش بێ به‌ش نه‌بوون له‌م مه‌رگه‌ساته.
هەڵەبجە، پاش 37 ساڵ له‌و ڕووداوه، ئیتر کاتی ئەوە هاتووە، لەسەر پێی خۆی بوەستێت و خەم و خەفەت بگۆڕێت بۆ خۆشی و شادی، ماتەم بگۆڕێت بۆ شایی و دڵخۆشی، پرسه بگۆڕێت بۆ ژیانه‌وه، ژیاندۆستی ببێته سه‌ر مه‌شقی هه‌ستانه‌وه.
گومانی تێدانیە، لەدەستدانی مناڵ و دایکوباوک و کەسوکار، برینێکی سەختە، لەبیرکردنیان قورسە، ئارامگری، بەهێزی و ئیرادەی دەوێت، بەکوردییەکەی تا قیامەت لەبیرناکرێن و زامی له‌ده‌ستدانیان سارێژ نابن، بەڵام خۆ ژیان بەردەوامە و ناکرێت تا کۆتایی تەمەن، نەوە دوای نەوە، ئەم خەم و ئازارە، ئەم جەرگسووتانە، ئەم مه‌رگه‌ساتانه، ئەم هەموو دەردانە، بەردەوام بن لەسەری، پێویستە یادی ئەمساڵی کارەساتەکە، سەرەتایەک بێت بۆ ژیانەوە، هەستانەوە، بوژانەوە، ئاوه‌دانی، ته‌بایی، بۆ دادپه‌روه‌ری.
پرسه و گریان و خەم وخەفەتی کەسوکاری قوربانیان و دانیشتوانی هەڵەبجە و هەورامان و شارەزوور، دوای 37 ساڵ و پێگه‌شتنی نه‌وه‌كان ئیتر كاتی به‌خۆداچوونه‌وه و هه‌ستانه‌وه‌یه، پرسه بگۆڕین بۆ ئاوه‌دانی، ڕه‌نگی ڕه‌ش بگۆڕین بۆ ڕه‌نگی سوور و سه‌وز و سپی وه‌ك ڕه‌نگینی ئاڵای كوردستان، ئه‌م شێوازی یادكردنه‌وه‌یه بۆ ئه‌وه نییه قوربانیان و شەهیدەکان له‌بیر بكرێن، بەڵکو لەیاد و یاده‌وه‌ری هه‌ر تاكێك و هه‌موو مرۆڤدۆستێكدایه و هەرگیز لەدڵ دەرناچن، بەڵام دەبێت بۆ نەوەی نوێ، بەشێوازێکی تر و بەدیدێکی سەردەمیانە، ئەم کارەساتە لەبیرو هزردا هەر بمێنت، دوور لە شین و گریان و خەم وخەفەت.
زۆربه‌ی نه‌ته‌وه‌كانی جیهان، تووشی كاره‌ساتی گه‌وره‌ی له‌ناوبردن و سڕینه‌وه‌ی شوناسی نه‌ته‌وه‌یی و ته‌نانه‌ت ئایینیش بوونه‌ته‌وه، به‌ڵام ئه‌وان هه‌ستانه‌وه و بوژانه‌وه، بیریانكرده‌وه و بریاریاندا، به‌پلان و ئیراده‌وه، ئایینده‌یان دروستكرد، وه‌ك یابان له‌دوای كاره‌ساتی هێرۆشیما و ناكازاكی، بوژانه‌وه‌ی ئابوری و به‌رهه‌می وڵاتی یابان، گه‌واهیده‌ری هه‌ستانه‌وه‌یانه. ئه‌وه ئه‌ڵمانیای ئێستای یه‌كه‌م ئابوری ئه‌وروپایه، له‌پاش دوو جه‌نگی جیهانی هه‌ستایه‌وه. ئه‌وه نمونه‌ی ئیسرائیل له‌دوای هۆلۆكۆست و پرۆسه‌ی له‌ناوبردنیان، ئه‌وه ڕووه‌ندا له كیشوه‌ری ئه‌فه‌ریفا، هه‌ستانه‌وه له‌دوای شه‌ڕی خوێناوی ناوخۆیی وڵاته‌كه‌یان، ده‌یان نمونه‌ی تری جیهانی.
هه‌ر بۆیه پێویسته خه‌ڵك و دانیشتوانی هەڵەبجە، بڕیار بده‌ین هەستنه‌‌وە، سامانی مرۆیی ئه‌م ده‌ڤه‌ره بونیاد بنرێتەوە، ژیان و ژینگه دروستبکاتەوە، هیچ نەبێت نەوەی ئێستا و هاونیشتیمانیانی هەڵەبجە و هەورامان و شارەزوور، بۆ ئایندە بژین، هەموو هەوڵەکان لەپێناو ژیانەوەدا بێت.
له‌كۆتایدا، پێمانوایه، به‌پارێزگابوونی ئه‌م شاره، بونیادنانی ژێرخانی ئابوری له‌گرنگترین سێكته‌ره‌به‌هێزه‌كانی سنوری هه‌ڵه‌بجه (كشتوكاڵ، گه‌شتوگوزار، بازرگانی، ڕیگاوبان و ئاوه‌دانكردنه‌وه، خزمه‌تگوزارییه‌كان) ژیانه‌وه دروست ده‌بێته‌وه و تاك و خێزان و هاونیشتیمانیانی هه‌ڵه‌بجه و هه‌ورامان و شاره‌زوور، تاراده‌یه‌ك سارێژی برینه‌كان ده‌كات.
