من بە سروشت دوو شارە کوردییە هاوئاوازەکانم خۆش دەوێت، هەست دەکەم لە رووی مرۆیی بوونی خۆمانەوە، وەک کوردی ئاشتیخواز، بۆنی کوردایەتی عەیار بیست و چوار لەو شارانە زیاتر دێت، سنە و سلێمانی، دەرسیم و دهۆک، کەرکوک و کۆبانێ، هەموو شار و شارۆچکە و گوندێکی کوردستان، شوناس و رومەتی کوردن، لێ هەندێکیان سومبولێکن، یان لە خاڵێکدا لە شوێنێکی تر جیاوازترن، هەڵەبجە و هەولێر هەردووک دیرۆکی قوربانی و بەرگریان هەیە.
کەرکوک و کۆبانێ، دوو سومبول و ناسنامەی کوردن، کەرکوک سومبولی قوربانی و بەگژداچوونەوەی عەرەباندن و بەعساندن و تاراندن و لێسەندنەوەی ناسنامەیە، لێ کوردی ئەم پارچە هەشبەسەرەی خۆمان، هێشتا لەسەری ناکۆکە و کاکم لە بری عیلاجی دەردەکەی، دێ میعری بە سەردا هەڵدەڵێ و دەڵێ نابێ، جگە لە ناوی فڵانی کەسی تر ناوی لێبنێت، کەچی ئامادەنین ساڵی جارێکیش سەردانی بکەن، کۆبانێش سومبولی بەرخودان و نەکەوتنە، ئاخر جگە لە چەقەڵ و گورگەکانی وڵاتێکی زل و زەبەلاح، وڵاتەکە خۆیشی بەهەموو کەرەسە جەنگییەکانی ناتۆوە، بەر بووەتە ئەو شارە بچوک و قشتەی کوردان و دەیەوێ بیخات، لەکاتێکدا داعش بەهەموو توانا و دڕندەیی خۆیەوە نەیتوانی بیخات، داعشێک لە پڕێکدا ئەو موسڵە گەورەو گرانەی خست، کێشە ئەوەیە ئەوەی بەرانبەر کۆبانێ دەکرێت وەک گەلەکۆمەی چەقەڵ دێتە بەرچاو، لە کارژۆڵەیەک کە دەیەوێ بکەوێتە سەر پاشوو، دنیاش زرپ و زەق سەیر دەکات.
من لام وایە، بەرپرسیارێتییەکی ئاکاری لە ئەستۆی رایەدارانی دنیا هەیە، دەرهەق بە کورد بە گشتی و بە کەرکوک و کۆبانێ بە تایبەتی، کۆبانێ لە شەڕی دژی داعشدا هەر ئەوە نەبوو ژنی کردەوە بە خاوەنی دیرۆک و مرۆڤایەتی، داکۆکی لە کەرامەتی مرۆڤایەتیش کرد، ئەو لە رۆژگارێکدا بەگژ تاریکیدا چوەوە، میدیا جیهانییەکان رۆژ نەبوو بە نیشاندانی دڕندەیی داعش هەترەشی دنیا نەبەن، ئەو بەرخودانە گەیشتبووە ئاستی پەڕجوو، خاتونێکی میدیاکاری بیانی دوای چوونە کۆبانێ، بە گومانەوە دەپرسێ؟ ئەو بەرگرییە، بێ وێنەیە ژن و کچی کورد کردیان، چەند شەرمە سەرۆکی وڵاتێ کەوتنی درنجی داعش بە دەستی شێرە ژنی کورد نەبینێت و بێت بڵێ لە شەڕی نۆرماندی لە هاوشانمان نەبوون، کەرکوکیش یەکێکە لەو شارانەی سەت ساڵ پترە، ستەم لە خاوەنە هەقیقییەکەی دەکرێت، ئێستاش لە هەڵەتەکانی شوان و جەباری و پێدەشتەکانی نەوجول و لەیلان و دوبز بۆنی ئەنفال و (احنە البدو) دێت، هێشتا ماڵ لە خاوەن ماڵ حەرامە.
بەلامەوە جێی سەرسوڕمانە، ئەو دوو شارە، سومبولییەی کورد هەندێجار خەڵکی تر لەو پەڕی دنیاوە لە سەریان بە جواب هاتووەو بە دڕندەو بڕندەی گوتووە، دەست هەڵگرە، لێ کوردە حەیاتەکە، ئێستاش ئامادە نییە لە پێناویاندا پێکەوە بێت، پێکەوەبوون بەو مانایەی برینی جەستەی ئەو دوو شارە برینی جەستەی شارەکانی دیکەش بێت، تۆ بڵێی ئەو رۆژە بێت هەموو پێکەوە لە سەنگەری داکۆکی لەشوناسدا کەرکوک و کۆبانێ بە هی خۆمان بزانین، یان هەروا پرش و بڵاو و کەلەلا دەبین.
