تابان شێخ عەبدوڵڵا گەرمیانی
دەمێکە لە زۆر کەس دەبیستم کە ئەوان لە یەکێ لە بوارەکاندا خاوەنی بیرۆکەیەك بوون، بەهۆی باسکردنی لەگەڵ هاوڕێ و ئەو کەسانەی کە پەیوەندیدارن بە هەمان بوارەوە بۆ ئەوەی هاوکاریان بن و راوێژیان پێ بکەن بۆ ئەنجامدانی، کەچی لە پڕێكدا بێرۆکەکەی دەدزن و دەیکەنە هی خۆیان!.
بەراستی ئەمە دیاردەیەكی نا ئاكارییە و دوورە لە هەموو بەهایەکی جوانی مرۆڤبوون، چونکە دزی مەرج نییە لە کانزا و پارە و ماڵ و مۆڵکدا بکرێت، دەکرێت ئەمەش جۆرێكی تر بێت لە دزین. بەتایبەتی زۆرجار كاتێك بیرۆکەکە دەدزرێت كە خاوەنی بیرۆکەکە لە تەواوبوونی بیرۆکەکەدایە وەك پرۆژەیەك. ئەمە جگە لەوەی ماوەیەکی زۆر هێزی جەستەیی و کات و تەمەن و لایەنی ماددیی خۆی بۆ تەرخان کردووە، یان لە نیوەی جێبەجێکردنی بیرۆکەکەدایە، کەچی بیرۆکەکەی دەقۆزرێتەوە و دەبرێت و دەدزرێت و لەولاشەوە كەسی بیرۆكەدز بە شانازییەوە نمایشی ئەنجامی دزینی بیرۆکەی خەڵك دەکات و وەك دەستکەوتێكی کەسی و تایبەت خۆی پێوە دەنوێنێت!.
ئەمە دیاردەیەكی نا ئاكارییە و دوورە لە هەموو بەهایەکی جوانی مرۆڤبوون، چونکە دزی مەرج نییە لە کانزا و پارە و ماڵ و مۆڵکدا بکرێت، دەکرێت ئەمەش جۆرێكی تر بێت لە دزین
گرفتەکە لێرەدایە كە دەبێت خاوەنی بیرۆکەکە بیسەلمێنێت بیرۆکەکە هی ئەوە، سەلماندنەکەش تەنیا لەڕێی قسەکردن و گفتوگۆدا بووە لەنێوان خاوەنی بیرۆکەکە و بیرۆکە دزەکەدا کە رۆژێك بە مەبەستی بەدەستهێنانی زانیاری، یان راوێژپێکردن لە نێوانیاندا باسکراوە، کەچی دوایی بۆت دەردەكەوێت كە ئەو كەسە، بەداخەوە، ئەمانەتی گفتوگۆكە ناپارێزێت و بە نیازی دزینی تەواوی بیرۆکەكە لەگەڵتدا گفتوگۆی كردووە.
پرسیارەکە ئەمەیە ئایا ئەمە دەبێتە بەڵگە و پشتڕاستکردنەوەی جۆری دزینەکەی؟، ئەی کێ و کام دەزگا و دامەزراوە هەیە كە تایبەت بێت بە چارەسەركردنی ئەم دیاردە خراپە؟ یان ئەگەر بیرۆکەدز بەرپرسێک یان کاربەدەستێکی لە پشتەوە بوو، چۆن دەتوانرێت حەق بگێڕدرێتەوە بۆ خاوەن حەق؟.
بە راستی، ئەمە سەختە و لەگەڵ ئەوەشدا بۆتە دیادەیەکی ناشیرین و بێ متمانەیی و کۆڵەوارکردنی ئەوانەی رۆژێك بیربکەنەوە لە یەکێك لە بوارەکاندا و خزمەتی کۆمەڵگە و مێژووی ئەم نیشتمانە بکەن و خۆیان خاوەنی بیرۆکەی پرۆژەکانی خۆیان بن و وەك خۆیان جێبەجێی بکەن كێشەیە، چونكە كاتێك بیرۆكەكان دەدزرێن و هەندێکجاریش بە سەقەتی ئەنجام دەدرێن، زۆر ناخۆشە، چ جای ئەوەی بە ناجۆری و نیوەناچڵی و كەموكوڕییەوە بکرێنە مێژوو، بەتایبەتی ئەو کەسەی كە بیرۆکەی پڕۆژەی ئەوانیتر دەدزێت، ناتوانێت وەك خاوەنی بیرۆکەکە هەمان تێگەیشتن و گرنگی بیرۆکەکە ببینێت و بزانێت کە بۆ چییە و ئامانج لە بیرۆکەی پڕۆژەکە لە چییەوە سەریهەڵداوە؟ بەمەش دەکرێت هەزاران بیرۆکەی جوان کە خزمەت بە بوارە جۆراوجۆرەکانی کۆمەڵگە بکەن، بشێوێنرێن و لەباربچن. بۆیە دەکرێت نووسەران و رۆژنامەنووسان و میدیا بە گشتی لەسەر ئەم حاڵەتە بوەستن و نموونەکان و ئەوانەی بیرۆکەیان دزراوە قسەی تێدا بکەن. بە دیوێکی تردا ئەوانەی دڵسۆزانە راوێژیان پێكراوە و ئەمانەتیان پاراستووە، بە کەسی بیرۆکەدز بڵێن بوەستە، وابزانین ئەم پڕۆژەیەی جەنابتان هی فڵان کەس بووە و تۆ دزیوتە، ئەو ساڵانێکە پێوەی ماندوو بووە، بۆ ئەوەی ئەم دیاردە ناشیرینە کۆتایی پێ بێت، هەر کەس خاوەنی بیرۆکەی جوان و بە سوودە بۆ گۆمەڵگە، پێشکەشی بکات و خاوەنی بیرۆکاکان نەمرێنن.
