بۆ هەڤاڵانی دیدار،

لەپێناوی رێکخستنەوەی یاد و مەراسیمەکانی یەكێتیدا

 لەهەموو دنیادا حزبیش وەك هەموو دەزگا و دامەزاوەیەکی تر پێویستیی بە گۆڕانکارییە کە خۆی لەگەڵ هەلومەرجەکانی سەردەم بگونجێنێت، بۆیە دەبێت دەستبەرداری هەندێک لەو کار و چالاکییە کلاسیكییانە ببێت کە سەردەمێكە حزب وەك نەریت کاریان لەسەردەکات لەپێناوی هێشتنەوەی مێژووەکەی و ناساندنی نەوە لەدوای نەوەی سەردەمەکان کە یەکێتیی نیشتمانیی کوردستان پێیدا تێپەڕیوە و خاوەنی هەزاران مێژووی هەمەجۆرە لە دامەزراندن و مێژووی شەهیدبوونی هەزاران قارەمانی سەنگەر و سێدارە و سەرکردە و شەڕ و داستانی بێ وێنە و کۆچی دوایی دەیان سەرکردە و فەرماندەی دیاری سەر ئاستی کوردستانی و ناوچەیی و تۆمارکردنی سەدان هەڵویستی نەتەوەیی و دەپێشخەری هتد... 

دەکرێت رێزگرتن لەم بۆنە و پیرۆزییانە بگۆڕدرێت بۆ شێوازێکی تری هاوچەرخ، میکانیزمی تر بدۆزینەوە و واز لەو شێوازە کلاسکییە بهێنرێت و بەپێی سەردەم رێز لەو مێژووانە بگرین

  ئەوەی من مەبەستمە بیڵێم، هەموو ئەو مێژووانە لە بەروارێكدا تۆمارکراون و جێگای شانازی حزبن و دەبێت بپاریزرێ و شانازییان پێوە بکرێت، بۆ هەریەکێك لەوانیش كە یاد و یادەوەری و رێزگرتن لەوانەی سەرەوە بە بەردەوامی رێکدەخات، دەکرێت رێزگرتن لەم بۆنەو پیرۆزییانە بگۆڕدرێت بۆ شێوازێکی تری هاوچەرخ، میکانیزمی تر بدۆزینەوە و واز لەو شێوازە کلاسکییە بهێنرێت و بەپێی سەردەم رێز لەو مێژووانە بگرین.
بۆ بەرچاو روونیی زیاتر، لێرەدا هەندێک نموونە دەخەمەڕوو و دەکرێت ئەمە بۆ زۆر ئۆرگانی تریش گونجاوبن بۆ ئەوەی گۆڕانکاریی تێدا بکرێت و بۆچوونەکەم زیاتر ئاسانکاری بکات، تاوەکو هەڤاڵانی دیدار زیاتر بیر لە جێگرەوەی ئەو جۆرە بۆنە و مەراسیمانە بكەنەوە کە مێژوویەکە کاری پێ دەکەن، بۆ نموونە:- 
یەكەم: رۆژی شەهیدانی  یەكێتی لە 21/11ی هەموو ساڵێکماندا جێگیرکردووە بۆ یادکردنەوەی شەهیدە نەمرەکانمان، لێرەدا دەكرێت جۆری یادکردنەوەكە رێکبخرێتەوە و شێوازێکی تر لە خۆبگرێت و لەو چواچێوەیەی ئێستا دەرچێت، بۆیە دەکرێت شوێنێکی شایستە بۆ دروستکردنی پەیکەرێکی مەرکەزی بە ناوی (شەهیدی یەکێتی) دیاری بکرێت، ئەوەش لەسەر ئاستی هەموو پارێزگایەك، لە شوێنێك کە موڵکی حزب بێت و ناوی تەواوی شەهیدانی ی.ن.ك -ی ئەو پاریزگایەی لەسەر تۆماربکرێت، هەروەها هەموو ساڵێك لە 21/11 دا لەلایەن خێزان و هەڤاڵانی یەکێتییەوە چەپکە گوڵی لەسەر دابنرێت، ئەمەیش بۆ ئەوەی یادەوەرییەکە ناوەندی بێت و لە نێوان یادکردنەوەی شەهیداندا جیاوازی نەکرێت، دەکرێت ئەورۆژەش بکرێتە رۆژێک كە کەسوکاری شەهیدان هەر داواکارییەکیان هەبێت لەو رۆژەدا و لەوێدا پێشکەش بە حزبی بکەن. 
دووەم: راگەیاندنی یەکێتی، یادی كوردستانی نوێ و سەتەلایت و دەنگی گەلی کوردستان و دەزگای میدیایی كەركوك و پیوکەی میدیا و مرصد و كەناڵ و بەشەكانی تری هتد... هەر هەموو ئەمانە بکاتە یادی راگەیاندنی یەکێتی و یادەكەش ناوەندی بێت، لەم بارەیەوە بیستوومانە كە بڕیارێك دەرچووە بەو ئاراستەیە كە هیوادارین پەیڕەوی بكەن.
سێیەم: پیرۆزباییەکان مەرکەزی بن، بۆ نموونە لە یادی یەکێتی و راپەرین و کۆڕەو و کیمابارانی هەڵەبجە و یادەی تاوانی ئەنفال و جەژن و نەورۆزو 8 ی مارس و هتد...سەرجەم یادەورییەکانی تری مەرکەزی بێت، یان ئەو ئۆرگان و دەزگایانەی تایبەتن و پەیوەندارن بەو بۆنانەوە وتار و پیرۆزباییان هەبێت، نەك هەر هەڤاڵێك و بەرپرسێك بە تاک و تایبەت و سەربەخۆ پیرۆبایی بکات.
ئەمانە چەند نموونەیەکن بۆ ئەوەی هەڤاڵانی دیدار ئیشی لەسەر بكەن و لەبری ئەو هەموو مەراسیم و ئاهەنگگێڕانە جۆراوجۆرانە کە دەکرێن، مۆدێلی پوخت و هاوچەرخ هەڵببژێرن و بۆنەكان کەم بکرێنەوە، یان شێوازی تری داهێنەرانە پێشنیار بكرێت، ئەم بیرۆكانە لەڕووی مادیشەوە گێڕانەوەی خەرجییەكی زۆریشە بۆ حزب کە ساڵانە بۆ مەراسیم و بۆنە و یادەکان خەرج دەکرێت، بەهیوام هەڤاڵانی دیدار زیاتر ئەم بۆچوونەی بەندە دەوڵەمەند بکەن و وەك پرۆژەیەکیش لیژنەی باڵای دیدار لەبەرچاوی بگرێت.

بەردەوامیی دووەمین دیداری یەکێتی