ساڵنامەی خوێندن، ناوی بێ ناوەڕۆك

ئەگەر ئەوان خۆیان بەها و سەنگێك بۆ پلانەكەیان دانەنێن كە خۆیان بۆ خوێندنگاكان دایانناوە، ئیدی بۆچی رەخنە لە مامۆستایان دەگرن كە پلانی وانە وتنەوەیان نییە، یاخود پڕۆگرامەكانی خوێندنیان پێ تەواو نەكراوە؟

هەموو ساڵێك، لەگەڵ دەسپێكی وەرزی نوێی خوێندن، وەزارەتی پەروەردە ساڵنامەیەكی خوێندن بۆ گشت خوێندنگاكان و نێوەندەكانی خوێندن گشتاندن دەكات. لەو ساڵنامەیەدا رۆژەكانی خوێندن، وادەی ئەزموونی مانگانە، ئەزموونی وەرزی، پشووەكان دیاریكراوە، كە دەبێ ساڵی خوێندنن بە پێی ئەو ساڵنامەیە بێت، وەك ئەوەی وەزارەتی پەروەردە، لە رێگەی سەرپەرشتیارانی پەروەردەییەوە، جەخت لەوە دەكاتەوە كە دەبێ پڕۆگرامەكانی خوێندن تەواو بكرێن. ئەم ساڵنامەیە، تەنها نووسراوێكی رۆتینییە و ناوی بێ ناوەڕۆكە، چونكە وەزارەتی پەروەردە نەك هەر ناتوانێت كار بەو ساڵنامەیە بكات كە خۆی دایناوە، بەڵكو بە هۆی پشووەكان و جێ گۆڕكێكردن بە رۆژەكانی دەوام و كاتی ئەزموونەكان، مامۆستایان و خوێندكاران هەموو پلانێكی خوێندنیان لێ تێك دەچێت. گەرچی لە ساڵنامەكەدا، رۆژەكانی پشوو دیاریكراون، كەچی دەیان رۆژ دەكرێنە پشووی دیكە كە كاریگەرییەتی راستەوخۆیان بە سەر پرۆسەی پەروەردە دەبێت. بۆ نموونە: تەنها لە وەرزی یەكەم، هەفتەیەك پشوو بە هۆی هەڵبژاردنەوە راگەیاندرا، دوو رۆژ پشووی سەرژمێری، دوانزە رۆژ پشووی سەری ساڵ، ئیدی نازانم چۆن پڕۆگرامەكانی خوێندن لە وەرزێكدا تەواو دەكرێن؟ لە ماوەی نێوان 23/12 تاكو 4/1، پشووی سەری ساڵ بوو، كە پێویست نییە، لە 4/1هەڵسەنگاندنی پۆلەكانی یەكەم و دووەم و سێیەم ئەنجامدرا تاكو 8/1 ، لە 8/1 تاكو 18/1 ئەزموونەكانی وەرزی یەكەم كران، لە 18/ 1 تاكو 25/1 پشووی وەرزی یەكەم بوو، بەو جۆرە لە ماوەی نێوان 23/12 تاكو 26/1 ، واتا سی و سێ رۆژ یەك وانەش نەخوێندرا! ئیدی چەندین بابەتی وانەكان كە دەبوو لە وەرزی یەكەم تەواو بكرێن، كەوتنە وەرزی دووەم و نابێ لەو وەرزەش بخوێندرێن، چونكە زۆربەی وانەكان پرۆگرامەكانییان بە پێی وەرزەكان دیاریكراوە كە دەبێ بخوێندرێن و تەواو بكرێن. بۆیە مامۆستایان بەرپرس نین لە تەواونەكردنی بابەتەكانی خوێندن و باشتر وایە وەزارەتی پەروەردە بە شێوەی ناوی بێ ناوەڕۆك، مامەڵە لەگەڵ ساڵنامەی خوێندن نەكات، بەڵكو پابەند بێت بە نووسراوێكی كارگێڕی و فەرمی و پەروەردەیی، كە خۆی دایناوەوە واژۆی وەزیری پێوەیە. ئەگەر ئەوان خۆیان بەها و سەنگێك بۆ پلانەكەیان دانەنێن كە خۆیان بۆ خوێندنگاكان دایانناوە، ئیدی بۆچی رەخنە لە مامۆستایان دەگرن كە پلانی وانە وتنەوەیان نییە، یاخود پڕۆگرامەكانی خوێندنیان پێ تەواو نەكراوە؟.