تەها عەبدوڵڵا
یەكێك لەبنەما سەرەكییەكانی دیموكراسیی، هەڵبژاردن و دەستاودەستكردنی دەسەڵاتە، زۆربەی ئەو وڵاتانەی پابەندن بەكاتی هەڵبژاردن و دامەزراندنی دەسەڵاتێكی تازە بۆ حكومڕانی، پێشكەوتنی گەورە و بەرچاویان بەدەستهێناوە، تەنانەت ئەو پابەندییە بۆتە كەلتورێك و نەوە دوای نەوە لەسەری بەردەوامن، بە پێچەوانەشەوە دەبینین لەو وڵاتانەی بەتاكڕەویی و بەبێ گەڕانەوە بۆ دەنگی خەڵك كورسی دەسەڵاتیان وەرگرتووە، خەڵكەكەی چاوەڕوانی بەهارێك دەكەن بۆ ئەنجامدانی گۆڕانكاریی.
لەهەرێمی كوردستانیش لەماوەی 33 ساڵی رابردوودا، چەندین هەڵبژاردن كراوە و لەو ماوەیەدا، نۆ كابینەی حكومەت پێكهێنراوە، ئێستاش ئێمە لەسەروبەندی پێكهێنانی كابینەی دەیەمین، لەوبارەیەوە چەندین دانیشتن و كۆبوونەوە لە نێوان هەردوولایەنی براوەی هەڵبژاردن (ی ن ك) و (پ د ك) ئەنجامدراوە.
ئەوەی هەموولایەك لەسەری كۆكن پێكهێنانی حكومەتێكە لەئاست چاوەڕوانیی خەڵكدا بێت و هەڵە و كەموكوڕییەكانی پێشوو چارەسەر بكات، بەجۆرێك ئەو بەڵێنانەی لەكاتی هەڵبژاردن بەدەنگدران دراوە، لەكابینەی تازەدا رەنگبداتەوە و بەكردار بهێنرێتە دی.
هەروەها دەخوازن لەگەڵ پێكهێنانی كابینەی داهاتوودا، كۆتایی بەو جۆرە حكومڕانییە بهێنرێت، كە لە رابردوودا بەشێوەیەكی تاكڕەوانە بەڕێوەدەچوو، چونكە وەك بینیمان لە ناوەڕاستی رێگای كابینەی نۆیەم، نیگەرانی و گلەییەكی زۆری هاتەسەر، تاڕادەیەكی زۆر پێشێلی شەراكەت و ئەو رێكەوتنانە كرا، كە كابینەكەی لەسەر دامەزرا بوو، بەتایبەتی لەگەڵ حزبێكی گەورەی وەك یەكێتیی نیشتیمانیی كوردستان، هەربۆیە نیگەرانی و بایكۆتكردن لە كۆبوونەوەكانی ئەنجومەنی وەزیران بۆ ماوەیەك بەردەوام بوو، ئەمەش دابڕان و لێكترازانی لێكەوتەوە.
پێویستیی قۆناغەكە وادەخوازێت حكومەتی هەرێم كار بۆ بەرەوپێشبردنی سەرجەم سێكتەرەكان بكات بەبێ جیاوازی، لەسەرووی هەمووشیانەوە، فەراهەمكردنی ئازادیی و ئازادیی رۆژنامەنووسی و خۆپیشاندان بەگوێرەی یاسا و رێساكان، بەتایبەتی لە شارێكی وەك هەولێر كە پایتەختی هەرێمی كوردستانە، چونكە ئەگەر ئێمە بمانەوێت وەك هەرێمێكی دیموكرات و مەدەنی خۆمان بناسێنین، پێویستە پابەندی بنەماكانی ئازادیی بین، ئەوەش دەبێت لە پایتەختەوە رەنگبداتەوە.
