ماوەگ بووگ دەستەی نویسەران (كوردستانی نوێ) راوێژ و پرس و رایان دووپێك وەل روشنهویریەل شارەگەمان كرد، ئەرا ئەوەی پشگیگ لە پەڕەگان روژنامەی خوەیان بیەنە ئیمە و لەولانە وەك سەكوگ بتوانین خزمەت وەی پارچەی خاك دابڕیاگ كوردستان بكەین.
قەڵەمیگ وەجەوهەرێگ لە ئاو ئەڵوەن بووگ و خواست و مەیل و ناخ مەردمەیلمان بخەدە سەر لاكاقەز (خانەقی)، لە سلێمانیە و ئەرا گشت كوردستان پەخش بكریەد.
ئێ ئەروسە وەل ناوچەیەل تر باشوور كوردستان و بگرە تەواوی سێ پارچەی ترگ، وشە وە وشە و بڕگە بڕگە ئێ بنارە بخەدە وەچە و مللەت و وەتایبەت هامشاریەلمان لە هەرێم كوردستان ئاشنامان بكەد.
راسە ئەی لاكاقەزە وەگ ناو هەڵگر ناو شاریگە كە پایتەخت كوردستان خوارگە، وەلێ فراوانی جوگرافی ئەی سنوورە لە كیوو (بەموو) و تا بەیرە (بەدرە)س كە ئەی شوینەیەلە گردەو لە بەموو كە وەك هیما و رەمز پارزگاری لە ئاو و خاك كوردستان بست وە بستی خوێن شەهیدەیەل مناڵ گەرمەسێر رژیاس و پەنجەموور پیشمەرگایەتی خەڵكە ساڵان دویر و دریژ وەپیەو دیارە.
هەر لە ناهیەی مەیدان و قوورەتوو خانەقی و گوڵاڵە (جەلەولا) و قزرەواد و حەمرین و نەفخانە و مەنەلی و قازانی و قەرەتەپە و جەبارە و بەدرە یان بەیرەو جەسان و زەڕواتییە شارە ئاڵتوینە غەریبكەفتیەگەمان لە خوەی گرێ كە پانیایی ئەی بەشەی وڵاتمان لە وڵاتەیەلگ وەكو لوبنان و قەتەر گەورەترەكە.
وەك زاریش، زار ئێ كوردەی ئیرە نیشتەجین، كەڵهوڕییە كە نزیك لە نۆ ملیون كەس لە خوارگ و خوەرهەڵات كوردستان وەپی قسەكەن و یەكیگە لە دەوڵەمەنەترین زارەگان و زیاتر لە پێنج شیوەزارش دیرگ و وەك پیویست خزمەت نەكریاس و ئەیەش ئەركە وەسەر شان گشت كەسیگ وەی شیوەزار قسەكەن و دەسە و قەڵەمن و وە شیوەزارەگانی ترەگ كوردی نوویسن یان وەزوانەگان ترەگ دەسڕەنگینن و خزمەت وە فەرهەنگ و ئەدەب و رۆشنهویری ئەو مللەتانە كەن بایەد ماوەو كات بیەنە زارداڵگیان و وەوپەڕی توانا خزمەت بكەن و یە میژووە و دواجار بڕیار لەسەریان دریەد وەم دڵسۆز و یەش بایە بیشیمن زینگ هیشتن ئەی زارە تا ئیسە لەسەر شان مەردم ئەی سنوورە بیە و زیاتریش وەدەس شاعرەیەلگ بیە كە شیعرە گورانی را هونەرمەیل وتنە و وەزوان موسیقا دەم وە دەم كریاس و پارزگار بیە، وەلێ ئیسە لە رێگەی ئەی لاكاقەزە فرسەتیگ خاسە بتوانین وەگشت لایەگمان وردە وردە هەر كامیگمان گوشەگ لەی لاكاقەزە خواست و داخوازی مەردمەیەلمان بخەینە وەرچەو دەسەڵاتداریەل هەرێم و هەوا ناوچەگەمان لە پەڕەگان ئێ لاكاقەزە وە گەل ئاشنا بكەیمن وەمللەتەگەمان وەچوار پارچە با دی ناموو نەوگ و با بزانن لە خوارگ كوردستان مللەتیگ زینگ دیریمن كە خوازی كورد و كوردایەتی زینگ بمینی و وە قەڵەمان دڕیژگ وە ریباس شەهیدیەلمان بەیمن و ئەوان وە خوین ئیمەش وە جەوھەری قەڵەم.
ئەیەش راگەینین ئەی لاكاقەزە تەنیا چی نوسەریەل یەكێتیی وەك حزبی نییە و شوین و ماڵ گشت لایەگە كە بتواد خزمەت بی وەراموەر بكێ و یە گود و یە مەیدان.
