وە بوونەی یاد راپەڕین گەل كورد و وەتایبەت راپەڕین خانەقی پەیامیگ، ئەرا گلایەگ لە مەردم كەنارەنشین ئەڵوەنە و ئەی كوردەیلە كە وەدرێژایی میژوو، لە مەیدان خەبات و كوڵنەدانن ئەرا پاراستن ناسنامە و شوناسیان، پەڕەگان ئەی توومارە شاهیدی و گەواهی ئەوە دەد، جوامێری و میرخاسی وەناو كوڕخاس و دوێتەلمان نویسریاس و كێل و ئەلهەد شەهیدەیلمان لە سەرانسەر خاك كوردستان دانریاس. یەش مەدالیای رەزین و ئیفتخار و شەرەفە ئەرا گشت گەرمەسیریگ هەر لەبنار بەموو تا مەنەلی و بەیرە.
یە سەد ساڵە بگرە زیاتر، شوناسنامەی كوردی هابن بەخەڵ و گیفان روڵەیمان و وە ئیرادەی پوڵایین ئامادەن بمرن و گیان پاكیان فەدا بكەن نەگ ئەمانەت باوپایرەیلیان بگووڕن بكەنەی شت ترەك و، وەپاساو وەرژەوەندی ئاڵشتی بكەن و لەوەریەش رژیمەیل لەناوچیووی یەك لەدوای یەك وەوەردەوامی وەجورەها جوور دژایەتی كردن وە سیاسەت وەزوورەملە وەدەركردنمان و لە كوشتن و بڕین و دزین ناسنامەیلمان و ساختەكردنی لە تەعریب و تەسفیر و تەهجیر و تەبعیس، وەچەش لە خەیاڵ خاویان بی وەسەر ئێ شارە تاقیكردنە و، وەلێ وەدانوەخوگرتن و خووەدسنەدان مەردمەیەلمان پیلانیان وەگوور نریاو مەرامیان پیوچەلكریا.
یەكیگ لەو پەڕەیە لەتوومار شار تا ئەبەد بیسە بەڵگەنامەی سەلمانن كوردستانی بیونمانە، راپەڕینی ساڵی (1991)ەو، 111 كەس لە جوانەكوڕیەلمان گیان پاك خوەیان وەخشی ئەرا چەسپانن ئەی پارچە كوردستانە دابڕیاگە و ناویان وەكو شەهیدی ریگەی سەربەرزی وە جەوھەری زەڕین نویسریا و بیە بەڵگەنامە یادگار و دەسڕەنج ئەوان و بایەد وەگلایەگمان وەگ گلینەی چەومان بپاریزینەی و نەهیڵین لە ئیسەو داهاتوو ناحەز و دوژمن زەفەر وەپیمان بارد و رەنجەڕووی سەد ساڵەی باوپایرەیلمان خوەمان وەفیروو بچد، چیونكە هیشتا دژمن و ناحەزمان فرەس وەشیوەی جوراوجور هانە كەمین و توان مورك و ناسنامەمان بسڕنە و وەتایبەت لە وەختە دوینیمن سیاسەتیان گووڕیاس و لەجی ئەوەی لیولەی توفەنگ بگڕنە وەرمان و شار وەدەرمان بكەن، خەریكن جورەها پیلان ترەكن و دەس ئەرا پیرووزەیەیلمان بەن لە ریگەی ئایین و مەزهەب و ساختەكردن خاوەنداری خاك و ئاوایەلمان توان لەیەكمان بكەنە و یەكدەسی و تەباییمان نەهیڵن.
نازانن ئیمەی كورد خانەقی هیچ چشتیگ ناتواند لەیەكمان بكێگ و حازریمن بمریمن خاك خوەمان هەرزان فرۆش بكەیمن و نە وەرجە بەعس نە بەعس نە دوای بەعسیش، ناتوانن و ئەی خاك تاپووی میژوویی ئیمەس و ئەرا خوەمان میندە و بماركی لە كەس ناكەیمن باوباپیریەلمان وەگیان و روحمیان پارازینەسەی و ئیمەش وەشوین پای ئەوان پانەیمن و یەك وژە وەدوایە و ناچیمن و گیان خوەمان.
