ناكرێت ئەمڕۆ چیتر کاری حزبی تەنها لە کۆبوونەوە داخراوەکان و گفتوگۆ تیۆرییەکان و لە هۆڵە سنووردارەکاندا قەتیس بکرێت، بەڵکو دەبێت زیاتر کراوە بێت و کارلێکەربێت لەگەڵ واقیعی سیاسیی گۆڕاودا و لەگەڵیدا بگونجێت.
لەم چوارچێوەیەدا، دیداری یەکێتیی نیشتمانیی کوردستان وەک دەستپێشخەرییەکی نوێ دێت کە چەمکی کاری حزبی دووبارە دادەڕێژێتەوە، لە رێگەی پێدانی دەرفەت بە کادرە حزبییەکان بۆ بەشداریکردنی راستەوخۆ لە داڕشتنی بڕیارەکاندا، لە بری ئەوەی تەنها پابەندبێت بە جێبەجێکردنی ئەو رێنماییانەی کە لە سەرکردایەتییەوە دەردەچن.
لە سایەی گۆڕانکارییە سیاسییە خێراکاندا، حزب لە هەر قوناغێدا پێویستی بە سەرکردەی نوێیە کە خاوەن دیدگای ستراتیژی و نەرمی بێت لە مامەڵەکردن لەگەڵ گۆڕانکارییەکاندا، ئەوەش ئەوەیە کە دیدار بەدیی دەهێنێت
ئەم هەنگاوە نەک تەنها دینامیکییەتی حزبی بەهێزکردووە، بەڵکو یارمەتیدەرە لە بنیاتنانی بنکەیەکی حزبیی پتەوتر و بە تواناتر لە مامەڵەکردن لەگەڵ قەیرانەکاندا.
حزبە کلاسیکییەکان هەمیشە پشتیان بە ناوەندێتی بڕیار بەستووە، کە سەرکردایەتی رێنماییەکان دەردەکات و سیاسەتەکان دیاری دەکات، لە کاتێکدا رۆڵی کادرە حزبییەکان تەنها جێبەجێکردن بووە، بەڵام یەکێتیی نیشتمانیی کوردستان، لە رێگەی ئەم دەستپێشخەرییەیەوە، رێبازێکی نوێ دەهێنێتەکایەوە کە بنەمای بەشداریکردنی بە کۆمەڵە و تێیدا ئەندامانی حزب لە ئاستە رێکخراوەییە جیاوازەکاندا رۆڵیان دەبێت لە شیکردنەوەی رووداوەکان و دەرکردنی بڕیارە سەرەتاییەکاندا، کە کاریگەریی حزب لە وەڵامدانەوەی خێرا بۆ پەرەسەندنە سیاسییەکان بەهێزتر دەکات.
ئەم رێبازە نوێیە دەرفەتی بۆ کادرە حزبییەکان رەخساندووە کە پەرە بە توانا سیاسی و رێکخراوەییەکانی خۆیان بدەن، هەروەها دەرفەتی شارەزابوونیان لە میکانیزمەکانی کاری سیاسی پتەوتربکەن و تواناکانیان لە داڕشتنی هەڵوێستەکان و کارلێککردنیشیان لەگەڵ بارودۆخە نوێیەکاندا فراوانتر دەکات، بەبێ وەستان و چاوەڕوانکردنی رێنماییەکان لە سەرکردایەتیی باڵا لە هەر هەنگاوێکدا کە پێویستی بە بڕیاری دەستبەجێیە.
یەکێک لە گرنگترین دەرفەتەکان کە دیداری حزبی دەیبەخشێت، توانای دۆزینەوەی ئەو کادرە حزبییانەیە کە خاوەن رۆحی سەرکردایەتین و دەتوانن رۆڵی سەرەکی لە حزبدا بگێڕن. کە لە کاتی گفتوگۆ کراوەکان و دیالۆگە بەردەوامەکاندا دەردەکەون، ئەو کەسایەتییانە دێنە پێشەوە کە توانای شیکردنەوە و بڕیاردان و بەرپرسیارێتی وەرگرتنیان هەیە، ئەمەش رێگە بە حزب دەدات نەوەی داهاتووی سەرکردایەتی خۆی دیاریبکات و ئامادەیان بکات.
ئەم دەستپێشخەرییە وێستگەیەکی بنەڕەتییە لە پرۆسەی بنیاتنانی سەرکردایەتی لەناو حزبدا، لە رێگەی کارلێککردنی راستەوخۆ لەگەڵ پرسە سیاسی و رێکخراوەییەکان و تاقیکردنەوەی کادرەکانە لەسەر ئەرزی واقیع، کە رێگە بە حزب دەدات کەسایەتییە کاراترەکان هەڵبژێرێت بۆ سەرکردایەتی حزب لە جومگە هەستیارەکان و قۆناغە چارەنووسسازەکاندا.
لە سایەی گۆڕانکارییە سیاسییە خێراکاندا، حزب لە هەر قوناغێدا پێویستی بە سەرکردەی نوێیە کە خاوەن دیدگای ستراتیژی و نەرمی بێت لە مامەڵەکردن لەگەڵ گۆڕانکارییەکاندا، ئەوەش ئەوەیە کە دیدار بەدیی دەهێنێت لە رێگەی بەتواناکردنی ئەندامان بۆ پیادەکردنی رۆڵی سەرکردایەتییان لە ژینگەیەکی کارلێککردنی راستەقینەدا.
ئێستا حزب کادری هەیە کە خاوەن زانیاریی و ئامرازی شیکاری پێویستن بۆ وەرگرتنی هەنگاوی سەرەتایی لە مامەڵەکردن لەگەڵ پەرەسەندنە سیاسییەکان. ئەم نەرمییە رێکخراوەییە لەم کایە سیاسییەدا توانای کێبڕکێی گەورەتر بە یەکێتیی نیشتمانیی کوردستان دەبەخشێت، کە دەتوانێت بە خێرایی و کارامەیی کارلێک لەگەڵ رووداوەکاندا بکات، سوود لە تۆڕی کادری شیاو و ئاگادار لە دینامیکییەتی کاری سیاسی وەربگرێت.
ئەم نموونە نوێیەی یەکێتی لە بەشداریپێکردنی هەموواندا پێشکەشی دەکات، لە رێگەی دیداری حزبییەوە تێگەیشتنێکی قووڵی گۆڕانکارییەکان و کاری سیاسییە لە سەردەمی نوێدا.
چیتر ناکرێت حزبە سیاسییەکان بە شێوازی تەقلیدی بەڕێوەببرێن کە پشت بە رێنمایی سەرەوە و پابەندبوونی توندی حزبی لەخوارەوە ببەستێت، بەڵکو نەرمی و کارلێککردنی بەردەوام لەگەڵ بنکەی حزبی، بوونەتە دوو توخمی سەرەکی بۆ دڵنیابوون لە بەردەوامبوونی حزب و بەهێزکردنی رۆڵی لە گۆڕەپانی سیاسیدا.
ئەم رێبازە نوێیە وا لە حزب دەکات، سوود لە فرەچەشنی کادرە حزبییەکان و شارەزاییان وەربگرێت، کە چیتر بیرۆکە و تێڕوانینەکان سنووردار نەکرێن لە بازنەیەکی تەسکی کادری پێشکەوتوودا، بەڵکو ئەنجامی گفتوگۆی فراوانن لە نێوان ئاستە رێکخراوەییە جیاوازەکاندا. ئەمەش بڕیارەکانی گشتگیرتر کردووە و نزیکترە لە واقیع، کە گوزارشت لە دیدێکی گشتی دەکات کە لەلایەن هەموو بنکەی حزبەوە پەسەندکراوە.
دەتوانرێت دیداری حزبی وەک هەنگاوێکی دامەزراوەیی بۆ داهاتوویەکی سەقامگیرتر بۆ ی.ن.ک دابنرێت، کە بۆ قۆناغێکی نوێ بنەما دادەنێت و تێیدا حزب بۆ دیالۆگی ناوخۆیی زیاتر دیموکرات و کراوە دەکات. لە رێگەی بەهێزکردنی میکانیزمەکانی بەشداریکردنەوە، حزب دەتوانێت هەمیشە لە ئاواتەکانی هاووڵاتیان بگات و بە نەرمی وەڵامی ئاستەنگە سیاسییە جیاوازەکان بداتەوە.
ئەم پرۆسەیە دەیسەلمێنێت کە چاکسازیی حزبی تەنها بە گۆڕانکاریی رووکەشی ناکرێت، بەڵکو پێویستی بە دووبارە پێکهێنانەوەی راستەقینەیە کە پشت بە کرانەوە و کارلێککردن لەگەڵ بنکەکانی حزب دەبەستێت.
