لە بارودۆخێکی لەم جۆرەی ئێستاماندا کە کۆمەڵێک قەیرانی گشتیی بەرۆکی گرتووین، جینۆسایدی گەلەکەمان دۆخــــی جوانتر نابێت لـــــە کایەکانی دیکەی ژیـــــان، لەگەڵ ئەو راستییەی کە ئەوە تەنها گەلی کورد نییە رووبەڕووی جینۆساید بووەتەوە، لە مێژووی نزیکدا چەندین نموونەی دیکە هەیە، بەڵام ئەوان چۆن كاریان لە مەسەلەی جینۆسایدی خۆیاندا كردووە و چۆن وەبەرهێنانیان لە بەرز راگرتنی شكۆی قوربانییەکانیاندا كردووە، لە گەلێک حاڵەتیشدا چۆن لە رووی بەهێزكردنی بەرەی ناوخۆ و راكێشانی پاڵپشتیی نێودەوڵەتی چ كارێكیان كردووە، بۆ بەزیندوو هێشتنەوەی یادی قوربانییەكانیان، نەوە لە دوای نەوە چییان كردووە لە رێکخستن و بە دیکۆمێنتکردنی بەڵگەنامەکان، جێکردنەوەی لە پرۆگرامەکانی خوێندن لە سەرجەم ناوەندەکانی فێربووندا، هەروەها ناوەندی توێژینەوەکانیان.
چۆن لە ئاست گەورەیی كارەساتەكانیان تەواوی ململانێ و ناكۆكیی سیاسی و حزبییان وەلا ناوە و بەردەوام ئەو مەسەلەیە لە سەرجەم بوار و چالاكییەكانی ژیانیاندا پارێزراوە، بەڵام ئەوە نەبێ ململانێی سیاسیی هێز و حزبی جۆراوجۆریشیان نەبووبێت.
رەنگە لێرەدا زۆر شیاو نەبێت، دووبارە و سێ بارە بێین باس لەوە بكەین كە ئێمە چی بكەین و چی نەكەین بۆئەوەی بچێتە خزمەتی هێشتنەوەی یادەوەریی جینۆسایدی كورد وەك تۆڕێکی كۆكەرەوە بۆ سەرجەم کارەساتەکان لە مێژووی میللەتدا، بە جۆرێك كە پشتاوپشت ئەم یادەوەرییە تاڵە بە زیندویی رابگرین، نەهێڵین كاڵبێتەوە بگرە پەرە بە رەهەندەكانی مامەڵەكردن لە گەڵیدا بدەین و لۆبی بۆ بكەین لە ئاستی ناوخۆ و دنیادا، كار بۆ قەرەبووكردنەوەی قوربانییەکانن بكەین لە رووی یاسایی، مادی، كۆمەڵایەتی و سایكۆلۆجییەوە و بتوانین ساڵ بە ساڵ پلان و بەرنامەی كاری ئەو ساڵەی بۆ دابنێین، دوور لە فرمێسک و تەماشاکردن و بە رابردووکردن و دروشمبازی و بازرگانیی سیاسی، چۆن بیكەینە وتارێكی نیشتمانی چەسپاو و دوور بڕوانین بۆئەوەی بابەتی دروستکردنی دەوڵەتی لەسەر بنیات بنێین، نەك بیكەینە بابەتێک تەنها بۆ نیشاندانی خۆمان وەک قوربانی و هیچی تر، لە ململانێی بچووکی حزبی و بردنەوە و دۆڕاندا زۆری لەسەر بڵێین و بنووسین پاشانیش بە راستی و لەکاتی پێویستدا لە بیری بکەین.
