لاواندن وشەیەکی کوردیی شیرینە جیاوازە لە لاواندنەوە، بە مانای دڵدانەوە و دڵنەوایی دێت، بەڵام لاواندنەوە پیادا هەڵدانە بە گریان و گۆرانییەوە. هەستم کرد لاواندن، وشەیەکی شایستە بە هەڵەبجە و هەڵەبجەییەکانە لە سەروبەندی یادی غەمگینی کیمیاباران کردنی هەڵەبجەدا، کە لە 16/3/1988 لەلایەن دارودەستەی رژێمی سەدام حسێنەوە و بە سەرپەرشتیی راستەوخۆی عەلی حەسەن مەجید ناسراو بە عەلی کیمیایی، خەڵکی سڤیلی شارەکە ژەهرباران کران و زیاتر لە پێنج هەزار شەهیدی لە نێو ماڵ و کوچە و کۆڵانەکانی شارەکەدا بەجێهێشت کە زۆربەیان ژن و منداڵ بوون. باشترین یادکردنەوە بۆ زامی ئەو شارە و خەڵکەکەی خزمەتکردن و دابینکردنی پێداویستییەکانی پێشخستنیەتی، چونکە هەڵەبجە بەرلەوەی کیمیاباران بکرێت شارێکی پێشکەوتوو بوو لە رووی کەلتوری و کشتوکاڵی و پەروەردە و داهێنانی ئەدەبی و هونەرییەوە بەڵام خنکاندن و سووتاندن بە چەکی کیمیایی زۆر بردییە دواوە و زەبری کوشندەی وەشاند لە پێکهاتە ژیانییەکانی تەنانەت خێزانەکانی پەرتەوازە کرد و دوای ئەو هەموو ساڵەیش هێشتا منداڵە ونبووەکانی هەڵەبجە گرفتێک و تراژیدیایەکی مرۆییە کە تەواوی کوردستان پێیەوە دەتلێتەوە وەک دەردێکی بێ دەرمان. هەموو پێناسە و شیعر و پەخشانەکان ناتوانن بە هانای دانیشتووانی شارەکەوە بچن هێندەی پرۆژە ستراتیجی و گرنگەکان بۆ ئایندەی هەڵەبجە. بە پارێزگا کردنی شارەکە و دانانی ئیدارەیەکی خزمەتگوزار و کارامە بۆی و دامەزراندنی نەوە تازە پێگەیشتووەکەی و چارەسەرکردنی کێشەکانی هەژاریی و بێکاریی لە هەنگاوە هەرە لە پێشینەکانن، ئێمە حکومەتێکی خزمەتگوزارمان دەوێت ئەوە بکات کە قوباد تاڵەبانیی لەیادی کیمیابارانکردنی هەڵەبجەدا کردی و بەردی بناغەی پردی تەنگی سەید محەمەدی دانا کە هەڵەبجە و گەرمیان بەیەکەوە دەبەستێتەوە، ئەم هەنگاوە جێگەی دەستخۆشییە، بەڵام هەرگیز هێندە بەس نییە و دەبێت پرۆژەکان بێنەدی و پەلە بکرێت لە گۆڕینیان بۆ واقیعێکی بەرجەستە کە خەڵکی هەڵەبجە لە خێروبێرەکەی بخۆن. بۆئەوەی هەڵەبجە بلاوێنین هەر هێندە بەس نییە سەعات یانزەی هەموو شانزەی سێ یەک بۆ گیانی پاکی شەهیدانی ئەو کارەساتە رابوەستین، بەڵکو دەبێت هەموو کاتەکانی ساڵ دەستە و نەزەر لە خزمەت هەرئەرکێکدا بە پێوە راوەستابین کە لە قازانجی شارە جوانەکەی هەڵەبجەکەماندا بێت.
