ئیسماعیل مەحمود
پاشەكشە و وازهێنانی یانە بەشدارەكان لە خولەكانی كوردستان بەگشتی و خولی نایابی تۆپی پێ بەتایبەتی، ئەگەرێكی كراوەیە، ئەمەش لەبەر قەیرانی دارایی قووڵی یانە بەشدارەكان بەگشتی لەلایەك و لەلایەكی تریشەوە كەمتەرخەمیی یەكێتیی تۆپی پێی كوردستان و هاننەدان و پشتگیریی نەكردنی ماددی و مەعنەویی یانەكان كە یەكێتیی ناوبراو ئەو خەمەی یانەكانی بە هەند وەرنەگرتووە و بەپیرییەوە نەچووە.
هەر زوو هەردوو یانەی سەید سادق و ئارارات بەو هۆیانەوە پاشەكشەیان لە خولەكە كرد، وەك ئاگادارین یانەكانی شەقڵاوە و برایەتیش ماوەی نزیكەی سێ مانگە یاریزانەكانیان مووچەیان وەرنەگرتووە، یانەی هەولێریش ماوەی دوو مانگە مووچەیان وەرنەگرتووە، ئەمەش مەترسییەكی گەورەیە لەسەر ئەم یانانە و ئەگەر ئەم كێشەیەیان چارەسەر نەكرێت، ئەوا رەنگە بژاردەی كشانەوەیان لەخولەكە بێتە ئاراوە.
وەرزش بە پارە دەكرێت، یاریزان مووچەی دەوێت، تیپ بودجەی دەوێت، بەرلەوەی تیپێك بەشداریی خولێك بكات، ئیتر هەرخولێك بێت، پێویستە یانەكەی بودجەی جێگیر و ئامادەكراوی بۆ دابین بكات، نەك بە قەرز و قۆڵە و بەڵێنی مووچەی ئەمڕۆ و سبەی یاریزانان رابگرێت. لەمانەش گرنگتر ئەوەیە یەكێتییە وەرزشییەكانیش دەبێت پشتگیریی ماددیی یانەكان بكەن، خەڵاتی شیاوی دارایی بۆ یەكەم تا سێیەمی ریزبەندیی دابین بكەن، نەك یەكێتییەكە ساڵێك یانەكان بهێنێت و ببات و خەرجی زۆری پێبکات و لەكۆتایی وەرزدا، بە كاسێكی تەختە یان ستیلی هەرزانبەها پاڵەوان بەڕێبكات و خواحافیزییان لێبكات، ئەگەر ئەمانە نەكران، ئەوا ئیتر هیچ پێویست ناكات:
* ئەو یانانەی كوردستان کە ئەم قەیرانانە بەرۆكی گرتوون، هیچ پێویست ناكات بەشداریی خولەكانی كوردستان بكەن.
*ئەگەر یەكێتییە وەرزشییەكان، بەتایبەتی یەكێتیی تۆپی پێی كوردستان پارەی ناوبژیوانانی پێنادرێت، پارەی تەواوی لەبەر دەستدا نییە خەڵاتی دارایی باش بۆ یەكەم تا سێیەمی خولەكان دابین بكات، پارەی وای لەبەر دەستدا نییە یارمەتییەكی دارایی یانە بەشدارەكانی خولەكە بكات، ئەگەر یارمەتییەكی بچووكیش بێت، پێویست ناكات خولەكانی كوردستان رێكبخرێن.
لە كۆتاییدا، با بیر لە چارەسەرێكی شیاو لەو بارودۆخە بكرێتەوە، با یانەكانی بەتێر و تەسەلی بەشداریی خولەكان بكەن، نەك بە قەرز و قۆڵە، با یەكێتییە وەرزشییەكان بەتایبەتی یەكێتیی تۆپی پێی كوردستان، لەڕێگەی لیژنەی ئۆڵۆمپیی كوردستانەوە بودجەی شیاو پەیدا بكات، ئەگەر لە حكومەت بووە یان لە كۆمپانیا و سپۆنسەرەكان، تا یانەكان و وەرزشكارانی كوردستان بە تێروتەسەلی بەشداریی خولەكان بكەن.
