فەوزی بەهجەت
كەسێن خودان باوەرنامە، كەسێن لێهاتی و خودان شییان، نەشێن ركابەریێ بكەن، ژبەركو رەنگەكێ دییێ ركابەریی یێ دروست دبیت
ئەم دناڤ جڤاكەكێ یێن مەزن بووین، بەردەوام پەیڤێن كێم و بێ بها و بێ رامان پێشكێشی زارۆكان دكەین، بێی كو ئەم هزر تێدا بكەین و بێی بزانین كا چ تشت ل پشت وان پەیڤان و كارتێكرنا وان هەیە. ئێك ژ وان پەیڤان وەك نموونە، دەمێ دایك و باب دبێژنە زارۆكێن خو (تو ب كێر چ ناهێی)! بێی ئەم هەست پێبكەین، ئەڤ پەیڤە كارتێكرنەكا مەزن ل سەر مێشك و دەرونێ وی دكەت و دبیتە ئەگەرێ وێ چەندێ كو دەستا ژ هەر تشتەكێ بەردەت، ژبەركوو بەردەوام گوھـ ل پەیڤێن كێم دبیت و ئەو هزر دكەت ئەڤ چەندە راستییە دژیانا ویدا رویدایی و دێ ل سەر وێ چەندێ یێ بەردەوام بیت و دێ دگەل ڤێ چەندێ مەزن بیت، لدووماھیێ ژی، دێ بیتە كەسەكێ لاواز و ئەگەر هیڤییەك ژی هەبیت، دێ دەستا ژێ بەردەت.
بەلێ پێدڤییە دایك و باب بزانن هەر مرۆڤەكێ خودایێ مەزن دابیت ل ژیانێ بێ بەرهەم نابیت و خودێ چ مرۆڤان نادەتە ژیانێ كو ب یێ ڤالا بیت و تشتەكێ و كارەكێ نەزانیت. دبیت زارۆكێ تە بەردەوامێ ب خواندنێ نەدەت ، بەلێ ئەگەر تو دگەل روینیە خوارێ و ببینی ب كارەكێ دی یێ زیرەكە و هزرا وی بۆ بابەتەكێ دی یێ مەزنە یان ژی بۆ خواندنێ زیرەك بیت، لێ بۆ كارێن دی لاوازە. هەر مرۆڤەكێ بهێز و شیانەكا تایبەت هەیە، نابیت سەرا خالەكا لاوازیێ ژیانا زارۆكی ب تەمامی بهێتە گوهورین، بەلكو یا ل سەر دایك و بابان پێدڤی یە زارۆك د چ بواردا یێ خودان شیانە و حەژ چ بوار دكەت ب وێ رێكێ پشتەڤانی لێ بهێتەكرنێ.
گەلەك ژ زانا و فەیلەسوف و یاریكەر و داهێنەرێن جیهانی خواندنا قوتابخانێ تەمام نەكریە، بەلێ د بوارێن دیدا سەركەفتنەكا مەزن بدەستڤە ئینایە و هەتا بوینە ئێكەمینێن جیهانێ و هەتا هەتایێ ناڤێ وان دێ هەبیت ل جیهانێ.
